Chukusakị 14 - Kịrịkẹnị Baịbụl

Ebram Ḅe Lọt Ḅe Ḍụamẹ

¹ Inein-a amanyanapụ, Amrafẹl Babilọnḅọ ḅe na, Arịọk Elesaḅọ ḅe na, Kedolaoma Ilamḅọ ḅe na, pịkị Taịdal Goyịmḅọ ḅe na,

² ọmụ nwọ seni mun jịn sọnọ-a amanyanapụ pakamẹ: Bira Sọdọmḅọ ḅe na, Beasha Gomọraḅọ ḅe na, Shinab Admaḅọ ḅe na, Shẹmiba Zẹboịmḅọ ḅe na, pịkịna Bela anịkanịka (Zoa amanyanaḅọ) ḅe na.

³ Mịna sọnọ-a amanyanapụma ḅịpị se ogbosọ se Sidim Pẹsịkiri mị ḅie, anị mịọkụ Fị Tọrụ ini nwọse chịn nyọ mị ḅụ koḅiria mẹ.

⁴ Kedolaoma ḅe chuku ḅie oyimaịn kụra fịnjị ini nwọse simemẹ, ọkụma oyitẹrẹ fịnjị karama kụra mị ḅie ini kụrọtịḅị ḅie chụa ọ̀ pịrịmẹ.

⁵ Oyi inein-a kụra fịnjị karama kụra mị ḅie Kedolaoma ḅe na ori na gboloma ọmụogbo mị na ḅo Ashtarọt Kanaim ḅie sime Rifeim mị na, Ham ḅie sime Zuzịm mị na, Kiriateim ḅele nyọ mị ḅie sime Imim mị na,

⁶ pịkị Idọm tụndụma ḅie sime Horaị apụ mamgba na inuma pịkịna gbọtụma ini demun Ẹl-Paran onwun ḍapa aka mị lamẹ.

⁷ Anị ini vinpịkị Kedẹsh (anịsịkị ini nwọse anị chịnmẹ Ẹnmịshpat) mun ye-ẹ. Amalẹk apụ ama mamgba ini kanmẹ pịkị Hazazọn Tema ḅie sime Amọraị apụma na inumamẹ.

⁸ Sọdọm na, Gomọra na, Adma na, Zẹboịm na, Bela na amanyanapụma inia owunima ọkịḅo gboloma se Sidim Pẹsịkiri ḅie owupakamẹ

⁹ ini owu se Ilam na, Goyịm na, Babilọn na, Elesa na, ini sọnọ amanyanapụ owu seni inein-a amanyanapụ pakamẹ.

¹⁰ Pẹsịkiri mị ḅie agba olulu ḅakamẹ, Sọdọm na Gomọra na amanyanapụma owu mị ḅie ḅụ mangịso àrị sịkị ini sokoro olulu ma ḅie koromẹ; ọkụma tẹrẹ-a amanyanapụ mangị tụndụma ḅie sọmẹ.

¹¹ Inein-a amanyanapụma, Sọdọm na Gomọra na ḅie sime aye mamgba ini tansomẹ, fịaye mamgba na.

¹² Lọt, Ebram numbireowu tọkụ ḅe Sọdọm ḅie ori angamẹ anịsịkịḅụ, ori na ọ̀ nyanaye mamgba na ini tansomẹ.

¹³ Ọkụma gbọrịḅọ pọkọ mangịso mun se maye mamgba ḍuko Ebram Hibruḅọ ḅe pịrịmẹ, anị Mamre Amọraị apụma nyọ osi nyana ejema na kpekima anga ḅọ ḅe. Mamre ḅe na numbireowu Ẹshkọl ḅe na pịkịna Ena ḅe na, Ebram ḅe na ḅịpị se ogbosọ apụ-ẹ.

¹⁴ Ebram ḅe ḅo naamẹ na numbireowu tọkụ ḅe ini ò kunsomẹ nwọḅẹ sịkị, oria warị ḅie sime owusọ ḍin apụ mamgba ọ̀ nwọ chịn ọ̀ ḅụ chụamẹ, inimgba kịnị-a jieasi oyi fịnjị na nine apụ lamẹ. Ini inein-a amanyanapụma ḍuko mun Danị mị lamẹ.

¹⁵ Anịanga ḅụ oria tomonima ọ̀ nwọ ḍiama kpokpo ḅụ koroma se ḍin owu nwọse tarakapụma pakamẹ, se ori ini nẹngịmamẹ. Ori ini demun Damaskọs ọgọnọju sime Hoba mị lamẹ

¹⁶ ini ọfọịnso aye mamgba ori ọkịḅomẹ. Numbireowu tọkụ Lọt ḅe na oriaye mamgba sọ ori ọkịḅomẹ, eremeni ma na pịkịna jịn ikoliapụ sọnị.

Mẹlkizẹdẹk Ḅe Ebram Ḅe Ḅẹlẹmamẹ

¹⁷ Ebram ḅe Kedolaoma ḅe na ísí amanyanapụma na nẹngịma se vinpịkịḅo àrị sịkị, Sọdọm amanyanaḅọ ḅe Shevẹ Pẹsịkiri, (ini pịkị nwọse anị chịnmẹ Amanyanaḅọ Pẹsịkiri) mị ḅie ḅo ori na ịrịamẹ.

¹⁸ Mẹlkizẹdẹk, Deinma amanyanaḅọ, pịkịna Geletẹịn Tamụnọ Ḅe agbamịẹḅọ ḅe fịturu na iru na ọkịḅo Ebram ḅe pịrịmẹ,

¹⁹ ori ọ̀ ḅẹlẹma se nwọḅẹmẹ, “Ye Geletẹịn Tamụnọ Ḅe anị so mị na sẹkiri mị na tẹmẹḅọ ḅe Ebram ḅe ḅẹlẹma!

²⁰ Ye tokoni sime Geletẹịn Tamụnọ Ḅe pịrị anị ọ̀ mịẹ sarasarama ị́ pịrịse ị́ ị́rị́ na tarakapụma nẹngịmaḅọ Ḅe!” Anịsịkị Ebram ḅe, ori ọfọịnḅo ayema ḅụ oyi-a kiri ḅụ gbọrị kiri nwọse Mẹlkizẹdẹk ḅe pịrịmẹ.

²¹ Sọdọm amanyanaḅọ ḅe nwọse Ebram ḅe ḅẹmẹ, “Ị́ ọfọịnḅo aye mamgba ọkị, ọkụma ị̀ya tomonima seni ị̀ pịrị.”

²² Ebram ḅe nwọse ọ̀ pẹkẹrẹmẹ, “Nyanaḅọ, Geletẹịn Tamụnọ, so mị na sẹkiri mị na tẹmẹḅọ ḅe tọrụkuḅu à kụrọma yekarịfịmẹ,

²³ na ị́yaye ma ḅie gbọrịye sọnị àrị ọkịkẹ, anị ḅọrọ ye gbin iri anịkanịka akpaka-kpọ-ḍiki kẹngẹ sọnị. Mịẹse ị́ ḅẹ ẹka ọkụ na, ‘Ị̀rị̀ ma mị Ebram ḅe mịẹse ori ngọ kọnye-ẹ.’

²⁴ Gbọrịye sọnị àrị ọkị ị̀ ḅụ pịrị-ẹkẹ. Ị̀ya tomonima ọkị sa ayema sikima. Ọkụma ye ị̀ ḅụ sọ se ọmụgbin apụma, anị Ena ḅe na, Ẹshkọl ḅe na, pịkị Mamre ḅe na, inia ḍiekiriaye ma ọkị.”