Chukusakị 12 - Kịrịkẹnị Baịbụl

Tamụnọ Ḅe Ebram Ḅe Chịnmẹ

¹ Nyanaḅọ Ḅe nwọse Ebram ḅe ḅẹmẹ, “Ị́ya sẹ mị wẹrịso, ị́ya mịnapụma na, ị́ ḍaḅe warị mị na, se so à seni ị́ ḍieḅịa ama mị mun.

² À ḅakama awọ se ị́ pịrịḅịa, ini opu sẹ sọḅịa. À ḅakama ị́ ḅẹlẹmaḅịa; à pịkịna mịẹḅịa ị́ya ẹrẹ mị opuma soḅịa; à mịẹsosịkị ị́ ḅo ḅẹlẹma sọḅịa.”

³ “Ị́ ḅẹlẹma apụma àrị ini ḅẹlẹmaḅịa, Ọkụma ị́ wori apụma àrị ini woriḅịa. Ị́ ḅụ à pịkịna ḅọrọ se sẹ mamgba ḅẹlẹmaḅịa.”

⁴ Ebram ḅe ò ḅo kụra tesi oyi fịnjị na sọnọ-a kụra nwọ lasịkị mị ori Heran mị wẹrịsoye-ẹ, anị Nyanaḅọ Ḅe ọ̀ ḅẹ na ọ̀ mịẹ nwọḅẹ ḅara mị; Lọt ḅe ori ò seni chụa mun mẹ.

⁵ Ebram ḅe tarọ Seraị ma na, numbireowu ḅe tọkụ Lọt ḅe na, Heran ḅie ini nyana ngọma na, omoniapụ mamgba na nwọse Heran ḅie pakaso Kenan ama mị mun mẹ. Ini mun Kenan mị lasịkị,

⁶ Ebram ḅe ọ̀ sakị nwẹngị ama ama ḅọrọ nweni ò ḅo Morẹ ḅie osiḅụ sime eje mị lamẹ, anị Shẹkẹm ḅie fịafịa nyọ mị. (Anịsịkị mị ḅụ Kenan apụma ama mị ḅie ini pa anga waraḅẹ.)

⁷ Nyanaḅọ Ḅe ḅụpakụma Ebram ḅe ḍie seni nwọse ọ̀ ḅẹmẹ, “Mị anị à seni ị́ furo ḅie pakaḅoḅịa apụma pịrịḅịa sẹ mị-ẹ.” Anị Ebram ḅe anịnyọ ḅụ gbọrị agbamịẹ ẹbẹ pike Nyanaḅọ Ḅe pịrịye-ẹ, anị ḅụ se ò ḍie ḅọ ḅe.

⁸ Anịḅọrọso ọ̀ nwẹngị chuku daọrụ ḅụ chịngịma sime amama damẹ, anị Bẹtẹl opuama mị ḅụ anị ịrụapakapaka nyọ daọrụ mị, anịnyọ ori oria ikowarị mị pikemẹ, anị Bẹtẹl mị ḅụ ịrụasọsọ nyọ mị na Eaị mị ḅụ ịrụapakapaka nyọ mị na ḅe ogboku. Anịnyọ sọnị ori agbamịẹ ẹbẹ pike seni agbamịẹ Nyanaḅọ Ḅe pịrịmẹ.

⁹ Anịsịkị ọ̀ nwẹngị nyọ nyọ mun mẹ, ọkịmun Kenan mị ḅụ chukuju ọrụ mị lamẹ.

Ebram Ḅe Ori Ijipt Ḅie Omi-ẹ

¹⁰ Ọkụma Kenan ḅie ḅuruḅaa omi-ẹ, ḅuruḅaa mị opuma kụrọ ye gose, Ebram ḅe ọ̀ nwẹngị Ijipt ḅụ chuku daọrụ mị mun mẹ, se igoniḅọ ḅara se anịju ḅụ angamẹ.

¹¹ Ọ̀ saḅa Ijipt eke mị ḅie sọ-ẹtọn àrị sịkịḅụ, ọ̀ nwọse tarọ Seraị ma ḅẹmẹ, “Ị́rị́ anị iḅi pịkị ḍikitọrụgbẹịn eremeniḅọ-ẹ.

¹² Ijipt apụma ị́ ọrịḅịa sịkị ini nwọ ḅẹ ḅịa, ma tarọ ma árị-ẹ, anị mịẹse ini ị̀ ḅaaḅịa se ị́ wẹrịso se ị́ ḍumoḅịa.

¹³ Ḍuko ini pịrị na ị́rị́ mbụra-ẹ; anịsịkị ị́ gose ini ị̀ wẹrịso se à ḍumoḅịa.”

¹⁴ Ọ̀ saḅa Ijipt eke mị ḅie sọsịkị, Ijipt apụma ini ọrịmẹ na tarọ ma árị opuma iḅi pịkị ḍikitọrụgbẹịnmẹ.

¹⁵ Amanyanaḅọ odo ḅie fịrịnwẹngị dapụ árị ọrị se árịa iḅi mị ḍuko amanyanaḅọ ḅe pịrịmẹ; anịḅụ ini árị ọkịso oria odo ḅie mun mẹ.

¹⁶ Árị gose amanyanaḅọ ḅe ori iḅiḅara nwọ seni Ebram ḅe na angamẹ, ọ̀ pịkị kịrịkịrị nama ogbo seni ọ̀ pịrịmẹ, anana na oḅori na, tọn-a nambulo na, yepụra asụn na, omoniapụ na, pịkị ike-nambulo na.

¹⁷ Amanyanaḅọ ḅe ò Seraị ma ọkịye gose, Nyanaḅọ Ḅe ḅalafama-si-obi nwọ seni amanyanaḅọ ḅe oju saramẹ, pịkịna oria odo ḅie sime apụma na.

¹⁸ Anị amanyanaḅọ ḅe Ebram ḅe fịrịma ọkị se ò gbelaye-ẹ, “Mị cheye ị́ nwọse ị̀ mịẹ? Cheye gose ị́ ḍuko ị̀ pịrịka na árị ma ị́ ta-ẹ?

¹⁹ Cheye gose árị ma ị́ mbụra-ẹ ị́ nwọḅẹ, se àrị árị ọkị se ị̀ ta mịẹ? Ị́ tama ma árị-ẹ; árị ọkị se pakaso!”

²⁰ Amanyanaḅọ ḅe ọ̀ kụrọ seni oria tomonima pịrịmẹ se ini Ebram ḅe depakụmamẹ, tarọ ma na ọ̀ nyanaye goyegoye mamgba na, anị sẹ mị ḅie.