Bẹrẹkọn Apụ 7 - Kịrịkẹnị Baịbụl

Gidiọnị Ḅe Midia Apụ Ma Nẹngịmamẹ

¹ Gbọrị ene Gidiọnị ḅe na oria owunima na ḅaso ḅie sịsẹ se Harọd-Ideri-Mengi mị anga sịkị ḅụ ikowarị pike simemẹ. Midia apụma, pẹsịkiri mị ḅie inia ọgọnọju daọrụ ḅụ Morẹ Chịngị mị anga sịkị ini inia ikowarịma pike simemẹ.

² Nyanaḅọ Ḅe nwọse Gidiọnị ḅe ḅẹmẹ, “Ị́ nyana owunima opuma ḅakamẹ, à ḅi ẹkẹ àrị ị́ mịẹse inia ḅụ ḅọrọ Midia apụma nẹngịma. Ini nwọ chịnḅịa na ini ma ḅarana ọmụ mị gbin kanmẹ, se ḅarị sime ị̀ pịrị opu seni ị̀ pịrị-ẹkẹ.

³ Ḍuko tomonima pịrị, ‘Ḅalafarịḅọ goyegoye vinpịkị so ama mun, se wa mị Giledị Tụndụ mị ọgọnọ ḅụ simeḅịa.’” Anịẹrẹchị kịnị mama poku na jie ẹndẹ na vinpịkị somẹ, ọkụma kịnị poku na sọnọ-a ẹndẹ na kọnmẹ.

⁴ Anị Nyanaḅọ Ḅe nwọse Gidiọnị ḅe ḅẹye-ẹ, “Tomonima ini pa ḅaka waraḅẹ. Ini ọkị mengi mị nyọ mun se anịju ḅụ à ḅarana ini sẹlẹsikima ị́ pịrịḅịa. À nemikase ị́ ḅẹ na ḅeḅọ ḅe ori ị́rị́ na munḅịa nwọḅẹḅọ ḅe, ò munḅịa. À pịkị ḅẹ na ḅeḅọ ḅe ori ị́rị́ na mun-ẹkẹ nwọḅẹḅọ ḅe, ò mun-ẹkẹ.”

⁵ Gidiọnị ḅe ò tomonima ọkị iderimengi mị nyọ mun mẹ, se Nyanaḅọ Ḅe nwọse ọ̀ ḅẹmẹ, “Nụḅọ ḅẹlẹ mị se obiri mengi ḅu ọkụ se lapụ-lapụma ḅuḅọ goyegoye sikima, nụḅọ ḅụọịkpụkụ se kpẹrẹkị ḅuḅọ goyegoye pịkị sikima.”

⁶ Anịju ḅụ kịnị-a jieasi inia ḅarama se mengi mị ḍu se ḅẹlẹ seni lapụ-lapụma anị ḅumẹ; ísí apụ mamgba ini inia ḅụọịkpụkụ ma se kpẹrẹkị mengi mị ḅumẹ.

⁷ Nyanaḅọ Ḅe nwọse Gidiọnị ḅe ḅẹmẹ, “Àrị ọ́ ḍụaḅọrọma pịkị mịẹse ó Midia apụma nẹngịmaḅịa anị lapụ-lapụma mengi mị ḅu kịnị-a jieasi ma na ị́rị́ na. Ísí kirikọn apụ mamgba ḅẹ ini vinpịkị se ọrụḅọḅọ so nụḅọ ama mun.”

⁸ Anị Gidiọnị ḅe bebe Izrẹlapụ mamgba seni ama fịrịmaye-ẹ, ini kịnị-a jieasi ma sikima ọkụma, anị ini se chụa munḅịaye mamgba na pịkị oḍu ma ḅara sime apụma na. Midia apụma pike sime ikowarịma inia chuku ḅie simemẹ pẹsịkiri mị ḅie ḅụ.

⁹ Anị ḍin mị ḅie Nyanaḅọ Ḅe nwọse Gidiọnị ḅe ḅẹmẹ, “Sịsẹ owu se ini pike sime ikowarịma paka; à mịẹ sarasarama ị́ pịrịse ị́ ini nẹngịmaḅịa.

¹⁰ Ọkụma nemikase owu paka mị ị́ ḅalafamẹ ḅẹḅẹ, ị́ya fịrịnwẹngịḅọ Pura ḅe na ini ikowarịma pike sime nyọ mị mun.

¹¹ Ini ḍukoarịye mị ị́ nwọ naaḅịa, se anịsịkị ị́ kuḅie kụrọḅịa owu se ini paka ḅụ.” Anị Gidiọnị ḅe na oria fịrịnwẹngịḅọ Pura ḅe na koro tarakapụma ikowarịma pike sime nyọ mị aka sịkị mun ye-ẹ.

¹² Midia apụma na Amalẹk apụma na, pịkị onwun ele mị ḅie sime sẹma ḅie apụma na pẹsịkiri mị ḅie, igurube sara ọkụ se sara sime waraḅẹ, tọrụ aka ḅụ onwun ḅaka la-ọkụ, anị ini nyana ike-nambuloma pịkị ḅaka la-ọkụ-ẹ.

¹³ Gidiọnị ḅe ò mun nyọ mị lasịkị, gbọrịḅọ ọ̀ kọn ḍawọ ḍuko oria ikiaḅọ pịrịaḅẹ. Ọ̀ nwọ ḅẹaḅẹ, “À ḍawọmẹ na fịturu gbọrị okpokpo imbibile wa pike sime ikowarịma ḅie sọ se mun gbọrị ikowarị ḅụ jiamẹ. Ikowarị mị ḅịkị se kiri ọgọnọ sara simemẹ.”

¹⁴ Oria ikiaḅọ ḅe nwọse ọ̀ pẹkẹrẹmẹ, “Izrẹlḅọ ḅe oria kongo mị anị-ẹ, anị Gidiọnị Joash ya ḅe-ẹ! Anị jịnye fie-ẹkẹ! Tamụnọ Ḅe ọ̀ mịẹse ò Midia apụma nẹngịmaḅịa!”

¹⁵ Gidiọnị ḅe tomoniḅọ ḅe kọn ḍawọ mị na anị fieye mị na nwọ naa sịkị, ọ̀ kpẹrẹkị Tamụnọ Ḅe tẹkẹmẹ. Anịsịkị ò vinpịkị so Izrẹlapụma ikowarịma pike sime nyọ mun se nwọ ḅẹmẹ, “Ọ́ sịsẹ! Nyanaḅọ Ḅe ọ̀ mịẹse wa Midia ọmụogbo mị nẹngịmaḅịa!”

¹⁶ Oria kịnị-a jieasi ma ọ̀ nwọse tẹrẹ-a kpo pumẹ se gbọrị oḍu na pịkị tọnjie ḅie sime kuku na ọ̀ nwọse ḅọḅọ pịrịmẹ.

¹⁷ Ọ̀ nwọse ini ḅẹmẹ, “À mun ikowarịma pike sime nyọ akasịkị lasa ḅẹḅẹ, ómine ị̀ ḍiki se à mịẹọkụ mịẹ.

¹⁸ Ị̀ya kpo mị na ị̀rị̀ na mịna oḍu ma ofurosa ḅẹḅẹ, ómine sọnị pịkị ọ́mịnaye ma ofuro ini pike sime ikowarịma kelema se nwọ oloku, ‘Sime Nyanaḅọ Ḅe pịrịmẹ pịkị sime Gidiọnị ḅe pịrịmẹ!’”

¹⁹ Gidiọnị ḅe na oria kịnị-a sọnọasi ma na mun ikowarịma pike nyọ mị aka sịkị mị lamẹ, ma anị ḅo karakarama ḍin-ogbo laka simeogbo, ini nyọ koruapụma ḍinma kirikiri. Anị ini oḍu ma ofuro se inia ḅara sime kuku ma ḅaaye-ẹ,

²⁰ se ísí mama kpo ma sọnị pịkị ọkọ mịẹmẹ. Inimgba inia ereḅara ḅie tọnjie ma ọlọmẹ, oḍu ma inia amaḅara ḅie omi-ẹ, se nwọ olokumẹ, “Kongo mị sime Nyanaḅọ Ḅe pịrịmẹ pịkị sime Gidiọnị ḅe pịrịmẹ!”

²¹ Ọrụḅọḅọ nụḅọ kiri ḅụ chịẹ pike sime ikowarịma kelemamẹ, se bebe tarakapụma inia ọmụogbo mị ḅalafa na mangị somẹ.

²² Gidiọnị ḅe na oria tomonima na pa inia oḍu ma ofuroarị sịkị, Nyanaḅọ Ḅe tarakapụma mịẹse ini inia kongo ma seni owu se jịnḅọ jịnḅọ pakamẹ. Ini mangị Zarẹtan mị da somun Bẹt Shita mị lamẹ, ọkịmun Ebẹl Mihola ama mị la Tabat mị aka ḅụ simeye mị.

²³ Anịsịkị Naftalaị na Asha na sẹma ḅie owuapụma na pịkị Manasẹ mama pẹkẹrẹ ma ḅie owuapụma na ini nwọ chịn se ini Midia apụma ḍukomẹ.

²⁴ Gidiọnị ḅe ori okumun-apụ se bebe Ifrem chịngị ọgọnọ sẹ mị mgba fịrịma se nwọse ini ḅẹmẹ, “Ó koroḅo Midia apụma na owusọ. Jọdan Tọrụ mị na pịkị Bẹt-Bara iderimengi mamgba ómine ọlọchịẹma, ó ḅereni se Midia apụma ini saḅa ḅọrọma.” Ifrem owuapụma ini nwọ chịn koḅirima, se ini Jọdan Tọrụ mị na pịkị Bẹt-Bara iderimengi ma ọlọchịẹmamẹ.

²⁵ Midia mama alapụ ini nwọ kunmẹ, Orẹb ḅe na Ziẹb ḅe na; Orẹb Ḍụparị mị nyọ ḅụ ini Orẹb ḅe ḅaamẹ, pịkị anịsịkị Ziẹb ḅe, Ziẹb irumịẹ nyọ ḅụ ini ọ̀ ḅaamẹ. Ini pa Midia apụma ḍukoma mun mẹ, se ini Orẹb ḅe na Ziẹb ḅe na tịḅị ma ọkịḅo Gidiọnị ḅe pịrịmẹ, anị Jọdan mị ḅụ ịrụapakapaka nyọ daọrụ ḅụ simeḅọ ḅe.