Bẹrẹkọn Apụ 3 - Kịrịkẹnị Baịbụl

Sẹ Mị Ḅie Kọn Ama Ma

¹ Anịẹrẹchị, Nyanaḅọ Ḅe ọ̀ wẹrịso se da sẹ pa ama mị ḅie kọnmẹ se Izrẹlapụma ḍaḍikiḅịa ẹrẹchị anị Kenan ḅie owusọka Izrẹlapụma.

² Ọ̀ mịn mị mịẹmẹ anị se ọmụ gbolomaye seni Izrẹlapụma ḅụ ḅụọ-ḅụọ ḍieḅịaye kẹngẹ gose, anịtẹịn anga ma ngịsị ọmụgbinka apụma.

³ Ama mị ḅie kọn apụma anị Filistia apụ sọnọ-a opuama ma-ẹ, bebe Kenan apụ mamgba na, Saịdọn apụma na pịkị Hivaị apụma na, anị Lẹbanọn Tụndụ ma ḅie anga apụma, Beal Hamọn Tụndụ mị ḅụ ọkịmun Hamat Ḅọrọnyọ mị la.

⁴ Ini ḍaḍiki sọ Izrẹl mị pịrịḅịa, se ḍiepakụma nwọfa Nyanaḅọ Ḅe, Moziz ḅe ḅụ ḅọrọ se inia olomu-a ḍapụma pịrị olokoma ini kokoḅịa na ini koko ẹka na.

⁵ Anịẹrẹchị Izrẹlapụma, Kenan apụma na, Hitaị apụma na, Amọraị apụma na, Pẹrizaị apụma na, Hivaị apụma na, pịkị Jebus apụma na ḅie ḅụ simemẹ.

⁶ Ini ini na eresime gboloma pịkị inia oru ma tẹkẹtẹkẹmẹ.

Otniẹl Ḅe

⁷ Izrẹlapụma Nyanaḅọ inia Tamụnọ Ḅe ini ò se ḅieḅaramamẹ; ini ọ̀ ḅụ simịẹmẹ se ini Beal oru mị na Ashera mị na nwọ tẹkẹmẹ.

⁸ Anịẹrẹchị Nyanaḅọ Ḅe ori Izrẹl mị ḅụ ịganị nyanamẹ se Amanyanaḅọ Kọshan Rishateim anị Mẹsopotemịaḅọ ḅe wẹrịso se ori ini nẹngịmaye-ẹ, se nine-a kụra ọ̀ nwọse ḅẹrẹtọn ini pịrịmẹ.

⁹ Anịsịkị Izrẹlapụma ini owu Nyanaḅọ Ḅe pịrịmẹ, se ọ̀ gbọrịḅọ se ini fịrịmamẹ se ori ini ḍụapakụmamẹ. Anị Otniẹl, Kelẹb numbireowu tọkụ Kinaz ya ḅe-ẹ.

¹⁰ Nyanaḅọ Ḅe ori na omi-ẹ, se ò ḅo tịḅịnịḅọ sọ Izrẹl mị pịrịmẹ. Otniẹl ḅe ori ọmụ mun mẹ se Nyanaḅọ Ḅe ọ̀ mịẹ sarasarama ọ̀ pịrịmẹ, se ò Mẹsopotemịa amanyanaḅọ ḅe nẹngịmamẹ.

¹¹ Deinma ama mị ḅie sime mun kụra mesi lamẹ, anịeso mị Otniẹl ḅe fịye-ẹ.

Ihud Ḅe

¹² Izrẹlapụma ini pịkịna simịẹmẹ Nyanaḅọ Ḅe ḅụ. Mịn mị ẹrẹchị Nyanaḅọ Ḅe Amanyanaḅọ Ẹglọn Moab ḅọ ḅe mịẹse ọ̀ kụrọtẹịn Izrẹl mị nẹngịmẹ.

¹³ Ẹglọn ḅe Amọn apụma na Amalẹk apụma na ọkị gbolomamẹ; ini Izrẹl mị nẹngịma se Jẹriko mị ọkịmẹ, anị enemi kọrọ chịnma sime opuama mị.

¹⁴ Izrẹlapụma, Ẹglọn ḅe chuku ḅie ini sime mun maịnfasi kụra nwọ lamẹ.

¹⁵ Anịsịkị Izrẹlapụma, ini owu Nyanaḅọ Ḅe pịrịmẹ, se ọ̀ gbọrị ḍụaḅọrọmaḅọ se ini fịrịmamẹ se ori ini ḍụapakụmamẹ. Anị Ihud, kọndọḅọ ḅe-ẹ, Gira yaḅe, Bẹnjamin sẹ mị ḅie. Izrẹlapụma ini Ihud ḅe se Amanyanaḅọ Ẹglọn ḅe fịrịmamẹ, Moab ḅọ ḅe, pịkị ḍiepịrịaye na.

¹⁶ Ihud ḅe mamatọrụ nyana kongo ọ̀ nwọ mịẹ ọ̀ ḅụ pịrịmẹ, anịa ịsụn mị gbọrị ḅụọ-na-ikiḅa-lamẹ. Oria amaḅara anga ḅụọ mị ḅụ ori anịse kpọmẹ oria ḅụchụayema chuku ḅieḅụ.

¹⁷ Anịsịkị ò ḍiepịrịayema ọkị se Ẹglọn ḅe damamunmẹ, anị opuma ḍụḅaḅọ ḅe.

¹⁸ Ihud ḅe ḍiepịrịayema se ọ̀ pịrị so sịkị, ọ̀ nwọse àrị pụra apụma ḅẹmẹ na ini vinpịkị so inia ama mun.

¹⁹ Ọkụma Ihud ḅe ò vinpịkị so ini kara ḍụparịma nyọ mun mẹ, Gilgalị mị na kpeki anga ḅụ, ò vinpịkị so Ẹglọn ḅe damamun se nwọse ọ̀ ḅẹmẹ, “Amanyanaḅọ, à ḅọịma ḍuko ị́ pịrịḅịa oku omi-ẹ.” Anịẹrẹchị amanyanaḅọ ḅe nwọse oria fịrịnwẹngịapụma ḅẹmẹ, “Ọ́ paka wa pịrị!” Se inimgba paka somẹ.

²⁰ Anịsịkị, amanyanaḅọ ḅe oria warị ochu ọgọnọ deinḅie mị ḅie ọ̀ kpọnjị sime waraḅẹ ori ngẹrị, Ihud ḅe sọmun la se nwọse ọ̀ ḅẹmẹ, “Tamụnọ Ḅe ị̀ fịrịma se à ḍuko ị́ pịrịḅịa oku omi-ẹ.” Amanyanaḅọ ḅe ọ̀ sịsẹ chịẹmẹ.

²¹ Ihud ḅe oria kọndọ ḅara mị se oria amaḅara anga ḅụọ mị ḅụ kongo mị wọrọ pakụmaḅo se, anị se amanyanaḅọ ḅe ḅụlọ temi chumẹ.

²² Bebe kongo mị mgba sọmunmẹ, tụḅụlụ mị na anịmgba na se ḅẹlẹkị anịmgba gbẹịnmẹ. Ihud ḅe amanyanaḅọ ḅe ḅụlọ ḅie ori anị wọrọ sinkẹ, se anị mun ọḅụju tolupakamẹ, ọ̀ ḅụọma ogboku.

²³ Anịsịkị Ihud ḅe ọ̀ paka nụngọ ḅọrọ, se ḅọkọ ma palị ọ̀ pịrị se àrị ịkasịmẹ,

²⁴ se somẹ. Fịrịnwẹngịapụ ma ḅo se ḅọkọ ma ịkasị sime ḅara mị ọrịmẹ, ọkụma ini nwọ chịnmẹ na amanyanaḅọ ḅe ḅieju ò sime ịnyọsaraḅẹ.

²⁵ Ini koru mun la na iḅi ḅara ini nwọse korumẹ, ọkụma ọ̀ pa ḅọkọ mị finjika sịkị, ini sambị mị ọkị se anị finjimẹ. Se anịju ḅụ ini nyanaḅọ ḅe kiri ọgọnọ ọ̀ ḅọlọlọ sime waraḅe fị ḅụ.

²⁶ Ihud ḅe ini koruarị sịkị ḅụ ò somẹ. Ò somun ini kara ḍụparịma ḅọrọ se mangị mun Seira mị ḅie sọmẹ.

²⁷ Ò mun anịju ḅụ Ifrem chịngị ọgọnọ sẹ mị lasịkị, ori oḍu ofuro Izrẹl owunima chịnmẹ ini ḅo ọmụgbinḅịa ẹrẹchị; anịsịkị ọ̀ tọrọkọda ini na chịngịma ọgọnọ ḅụ ideri koromẹ.

²⁸ Ọ̀ nwọse ini ḅẹmẹ, “Ómine ị̀ ḍuko! Nyanaḅọ Ḅe ọ̀ mịẹ sarasarama ọ́ pịrịse ómine na taraka Moab apụma nẹngịmamẹ.” Anị ini Ihud ḅe ḍuko ideri mun Moab apụma ḅọrọ Jọdan mị saḅaḅịa nyọ mị nwọ ọkịye-ẹ; ini ḅerenikẹ gbọrịḅọ kẹngẹ sọnị saḅaḅọrọ.

²⁹ Anị ene ḅụ Moab owunima ḅụ kụrọtẹịn apụma ḅụ ineda kịnị si sọnọ ẹndẹ fịnjị la apụ ini nwọ ḅaamẹ; inia ḅie gbọrịḅọ sọnị sokẹ.

³⁰ Anị ene ḅụ Izrẹlapụma ini Moab mị nẹngịmamẹ, se deinma ama mị ḅie sime mun kụra iniasi nwọ lamẹ.

Shamga

³¹ Ò ḍukoma jịn tịḅịdaḅọ anị Shamga Enat ya ḅe-ẹ. Ori sọnị ori Izrẹl mị ḍụaḅọrọmamẹ, anị ini se nambulo fomu se àrị nwẹngị tọrọkọ munmun ḅịpị mịọmịọ nangwọ chịn mị se Filistia apụma ḅụ kịnị-a ẹndẹ oyiasi fịnjị ḅaaḅọ ḅe.