Bẹrẹkọn Apụ 18 - Kịrịkẹnị Baịbụl

Maịka Ḅe Na Danị Sẹ Mị Na

¹ Izrẹl mị ḅie amanyanaḅọ ofori-ẹ anị sịkị ḅụ. Àrị enema ḅie Danị sẹ mị anị ọkị angaḅịa nyọ anị nwọ ḍọkịaḅẹ anịatịḅị Izrẹl sẹma ḅie ma ini inia ḅarakuḅu nyọ nyanakẹ.

² Anịẹrẹchị Danị furo ḅie apụma sọnọ-a ḅịpịḅẹrẹla owuapụ sẹlẹ pakụmaḅomẹ sẹ sẹ mamgba ḅie se ini Zora na Ẹshtaol na amama ḅie ini fịrịma pakụma se tọn ini pịrịmẹ na ini ama mị ẹnyẹ. Ini ḅo Ifrem chịngị ọgọnọ sẹ mị lasịkị, ini Maịka warị bịanmẹ.

³ Ini anịju simearị sịkị ini asẹmẹnị Livaịḅọ ḅe ọkwẹịn ḅẹlẹ mị nemisam, anị ini ọ̀ damamun se ò gbelaye-ẹ, “Mịanga ị́ cheye-ao? Tụḅọ ị́ se mịanga ḅo?”

⁴ Ọ̀ nwọse ini pẹkẹrẹmẹ, “Maịka ḅe na ị̀rị̀ na nyana ḅịpịogbosọ omi-ẹ, oria agbamịẹ fịrịnwẹngịḅọ ḅaraḅụ ori ị̀ gbẹịn aḅẹ.”

⁵ Ini nwọse ọ̀ ḅẹmẹ, “Pasisi Tamụnọ Ḅe gbela nwọfa wa mun-arịye mị ḅịrịḅịa otuḅo.”

⁶ Agbamịẹḅọ ḅe nwọse ini ḅẹmẹ, “Ó gose kpalakpalaḅịaye ofori-ẹ. Nyanaḅọ Ḅe ọ̀ tọrụ ọ́ mịnaḅụ omi-ẹ ó mun-arịye mị ḅụ.”

⁷ Anị sọnọ-a owuapụma pakaso Leish ama mị mun ye-ẹ. Anịju ḅụ anga apụma dein ḅụ sime ọkụ ini nwọ ọrịmẹ, anị Saịdọn apụma ḍumokọn ọkụ mị. Ini anị deinma ḅụ sime pịkị ḅẹrẹ mịẹ ḅẹlẹmaka tomoni-ẹ, gbọrịḅọ sọnị na yejineaka apụ; iniaḅụ palịmaye ofori-ẹ. Saịdọn apụma na ini na salama ini angamẹ, ini pịkị jịn apụ na mịẹye nyanakẹ.

⁸ Ini sọnọ-a owuapụma vinpịkị somun Zora mị na Ẹshtaol mị na lasịkị inia sẹ mị ḅie owuapụma ini ḍọkị pakụmaḅoye nwọse ini gbelamẹ.

⁹ Ini nwọse ini pẹkẹrẹmẹ, “Ó ḅo wa owu se Leish mị paka. Wa ama mị ọrịmẹ; anị kọn iḅi ḅakamẹ. Ọ́ papa mịanga gbin koro simema; ọ́ ḅara sarama! Ó ye wa somun anị ọkị nyana!

¹⁰ Ó mun lasịkị ómine ọrịḅịa na inia ḅie ye tọnkẹ. Karakarama opu sẹ-ẹ; tomoniḅọ ḅụ palịmaye goyegoye anị nyanamẹ se Tamụnọ Ḅe ori anị seni ọ́ pịrịsam.”

¹¹ Anị kịnị ẹndẹ oyiasi fịnjị Danị sẹ ḅie ḅụ so Zora na Ẹshtaol na mun ye-ẹ ḅụkarakarama ọmụgbinḅịa ẹrẹchị.

¹² Ini mun Kiriat Jearim mị ḅụ ịrụasọsọ nyọ daọrụ ḅụ ikowarị pike simemẹ Juda mị ḅie ḅụ. Anị ini gose pa Danị ikowarị pike nyọ nwọse nyọ mị chịn ḅo mịmgba sọ laye-ẹ.

¹³ Ini anịju ḅụ somun Maịka warị mị lamẹ Ifrem chịngị ọgọnọ sẹ mị ḅie ḅụ.

¹⁴ Anịsịkị mun Leish pẹkẹrẹ mị ẹnyẹ sọnọ-a owuapụma nwọse ini na ḅo apụma ḅẹmẹ, “Mịanga sime warịma ḅie gbọrị warị ḅie ḅụ ini chịn se kara se seleḅa seni sara-oḅolo koroma oru omi ọkụ ó nemi? Jịn ini karasa oru na pịkị ifọd na omi-ẹ. Nde ọ́ chịn ḅara wa mịẹḅịaye?”

¹⁵ Anị ini Maịka ḅe warị ḅie sọmunye-ẹ, anị asẹmẹnị Livaịḅọ ḅe anga nyọ mị, se mịẹye ori na sime ọkụ se Livaịḅọ ḅe gbelamẹ.

¹⁶ Mị sịkị mị ḅụ, ḅụkarakarama ọmụgbinḅịa ẹrẹchị Danị owuni ẹndẹ oyiasi fịnjịma onu mị ḅọkọ ḅụ ini chịẹ waraḅẹ.

¹⁷ Ini ama ẹnyẹ sọnọ apụma nwẹngị warị mị ḅie sọmun, se ini chịn-se-kara se seleḅa seni sara oḅolo oru mị na, ísí ini kara koroma oru ma na, pịkị ifọd mị na dekimẹ, agbamịẹḅọ ḅe pa nụngọ ḅọkọ ḅụ ọmụaye ọlọ kịnị ẹndẹ oyiasi fịnjịma na chịẹ waraḅẹ.

¹⁸ Owuapụma Maịka ḅe warị ḅie sọmun se osiḅụ simeayema deki sịkị, agbamịẹḅọ ḅe nwọse ini gbelamẹ, “Nde ọ́ mịẹarịye?”

¹⁹ Ini nwọse ọ̀ ḅẹmẹ, “Deinma sime. Gbọrị ọkwẹịn sọnị kọnma. Ḅo mine na so se wa tetemaḅọ na agbamịẹḅọ na nwọsọ wa pịrị. Ị́ agbamịẹḅọ sọ bebe Izrẹl sẹ mị pịrị mị, iḅitẹịn gbọrịḅọ furo agbamịẹḅọ sọ mị nẹngịka?”

²⁰ Mịn mị anị opuma agbamịẹḅọ ḅe ḅieḅẹlẹmamẹ, anị ori osiḅụ sime ayema deki se ini na soye-ẹ.

²¹ Ini vinpịkị somẹ, inia awọma na, namama na, iniaye mamgba na tọrọkọ mun aḅẹ.

²² Maịka ḅe, ọmụgbin gose ori na anga apụma chịn sịkị, ini iḅiọkụma nwẹngị mun ḅọlọju lasam. Ini mun Danị furo ḅie apụma lamẹ

²³ se oloku ini pịrịmẹ. Danị furo ḅie apụma vinpịkị se Maịka ḅe gbelamẹ, “Cheye paka? Cheye gose ị́ mị tomoni ogbo mgba se ḅo?”

²⁴ Maịka ḅe nwọse ini pẹkẹrẹmẹ, “Nde ó fiearịye, ‘Cheye paka?’ Ómine ị̀ya agbamịẹḅọ ḅe na à tẹmẹ koroma oru ma na deki se nwẹngị somẹ! Nde ị̀yaye ma ḅụ kọnye?”

²⁵ Danị furo ḅie apụma nwọse ọ̀ ḅẹmẹ, “Ị́ tẹrẹ deinma gbọrịye sọnị ọkwẹịnka ḅaraḅụ soka, mịna owuapụma yeḅụosọ ḅụ owu se ọ́ paka ọ́ nwọ ḅi otuḅo. Anị ị́rị́ na ị́ya bebe furo mị mgba ọ́ fịsoḅịa.”

²⁶ Anịsịkị ini Danị furo ḅie apụma sakị nwẹngịma mun ye-ẹ. Maịka ḅe ọrịmẹ na ori ineda ini da-ẹkẹ, anịẹrẹchị ò vinpịkị so oria ama mun mẹ.

^27-28 Danị furo ḅie apụma, agbamịẹḅọ ḅe na Maịka ḅe tẹmẹ koroma ayema na deki so ḅọrọ sịkị, ini mun owu se Leish mị pakamẹ, anị deinma ḅụ sime pịkị ḅẹrẹ mịẹ ḅẹlẹmaka tomonima anị Bẹt Rihọb mị na gbọrị pẹsịkiri ḅie ḅụ sime apụma. Ini ama mị nyanapụ ma ḅaafama pịkị ama mị dọkịmamẹ. Ini ḍụaḅịa gbọrịḅọ sọnị ofori-ẹ, anịatịḅị Leish mị ḅụ ọkịmun Saịdọn mị la opuma sasamẹ, ini pịkị jịn sẹ apụ na mịẹgbolomaye nyanakẹ. Danị furo apụma kpoto ama mị nama se anịju ḅụ angamẹ.

²⁹ Ini anịa ẹrẹ Leish mị ḍinma se Danị nwọse anị chịnmẹ anị inia olomu ḍaḅọ ḅe ẹrẹ mị Jekọb yaḅe.

³⁰ Danị furo ḅie apụma, ini oru mị tẹkẹḅịaye gose ini anị se chịẹmamẹ se Jonatan, Gashọm yaḅe, anị Moziz yaḅe agbamịẹḅọ sọ Danị furo mị pịrịmẹ, pịkị ò furo ḅie apụma anị agbamịẹapụ fịrị mị nwẹngị se Danị furo mị pịrịpịrịye-ẹ, ọkịmun ini ama mị ḅieapụ ma nwọ kun so sịkị mị lamẹ.

³¹ Tamụnọ tẹkẹ Ikowarị mị nwọ Shịlo ḅie sime la-ọkụ mị Maịka oru mị anịnyọ sime la-ọkụ-ẹ.