Bẹrẹkọn Apụ 15 - Kịrịkẹnị Baịbụl

¹ Sịkị kele ḅọrọ sịkị Samsịn ḅe ò mun toluma tarọ ma ḍiki-ẹ mun mẹ, fịturu mịẹ ịpịamgba pẹlẹ sịkị mị ḅụ, gbọrị ayamburama oḅori ọ̀ nwọse mun á pịrị-ẹ mun mẹ. Ọ̀ nwọse tarọ ma ḍaḅe ḅẹmẹ, “À ḅimẹ àrị ị̀ ta ma jukuru ḅie sọmun.” Ọkụma ò ḅerenikẹ ọ̀ sọmun.

² Ọ̀ nwọse Samsịn ḅe ḅẹmẹ, “Kọkọmaye ḅụ à nwọ chịnmẹ na ị́ á ḍikiḅieḅumẹ, anịẹrẹchị àrị á se ị́ya ikiaḅọ ḅe pịrịmẹ. Ọkụma nụmbụrarọ tọkụ ma iḅitẹịnmẹ, ḍikitọrụḅụ. Ị́ ineda á se á kiri ḍinmaḅịa.”

³ Samsịn ḅe nwọ ḅẹmẹ, “Mịọkụ à seni Filistia apụma mịẹyemịẹye ị̀ ḅara ḅokẹ!”

⁴ Anị ò somun pụnụ a jieasi nwọ kunye-ẹ. Mamaye gbọrịḅụ gbọrịḅụ ọ̀ nwọ kpọ gbolomamẹ arịa tumo ma ḅụ. Se tọnjie se ịkpụkụma ḅie chụa koromamẹ.

⁵ Ọ̀ fịnị tọnjị tọnjiema ḅụ chụa se pụnụ ma wẹrịso se àrị galagala Filistia apụ fịturu mịẹ ịpịamgba ozuma ḅie sọmẹ. Mị ḅara mị ḅụ ò fịturu mịẹ ịpịamgba ma ḅụ pẹlẹsaye ma na ma pẹlẹkaye ma na dọkịmamẹ, oliv ozuma sọ dọkịmẹ.

⁶ Filistia apụma ini mịn mị mịẹḅọ nwọ gbela sịkị, ini naamẹ na Samsịn ḅe anị mịẹmẹ, anịatịḅị Samsịn ta ma ḍa Timnaḅọ ḅe ori á se Samsịn ḅe ikiaḅọ pịrịsam. Anịgose Filistia apụma ini mun eremeniḅọ ma dọkịma ḅaamẹ pịkị ḍawu ḅe warị dọkịma sinmẹ.

⁷ Samsịn ḅe nwọse ini ḅẹmẹ, “Mị ọ́ mịẹ ọkụ-ẹ anịka! À yekarịfịmẹ na àrị anị se ọ́ gbẹịnka simeogbo à ḅarasin ẹkẹ!”

⁸ Ọ̀ kụrọma owu se ini pakamẹ pịkị iniaḅụ tọn-a apụ nwọ ḅaamẹ. Anịsịkị ò somun Itam ḍụparị pokolo mị ḅie sọ simemẹ.

Samsịn Ḅe Filistia Apụ Ma Nẹngịmamẹ

⁹ Filistia apụma ini ḅo Juda mị ḅie ikowarị pike simemẹ, se owu seni Lihaị mị pakamẹ.

¹⁰ Juda owuapụma nwọse ini gbelamẹ, “Cheye ẹrẹchị ómine owu seni wa paka-ao?” Ini nwọ pẹkẹrẹmẹ, “Wa ḅimẹ wa Samsịn ḅe kun se ikoliḅọ mịẹ pịkị ò se wa mịẹ ọkụ seni ọ̀ mịẹ.”

¹¹ Anị Juda owuapụ, nweni-a sọnọma ẹndẹ oyiasi fịnjịma so Itam pokolo mị ḅie Samsịn ḅe damamun se ọ̀ ḅẹye-ẹ, “Filistia apụma ini ḅẹrẹtọn wa pịrịarịọkụ ị́ nemika? Mị cheye ị́ nwọse wa mịẹ?” Ori nwọ pẹkẹrẹmẹ, “Ini se ị̀ mịẹ ọkụ anị ị̀rị̀ sọnị pịkị se ini mịẹ ọkụ-ẹ.”

¹² Ini nwọse ọ̀ ḅẹmẹ, “Wa ḅo ị́ fịna se mun ini pịrị-ẹ ḅomẹ.” Samsịn ḅe nwọse ini ḅẹmẹ, “Ọ́ kọkọmaye ḍuko ị̀ pịrị na ómine ị̀ ḅaa-ẹkẹ.”

¹³ “Iḅimẹ,” ini nwọ ḅẹmẹ, “Wa papa ị́ fịna se ị́ seni ini pịrịḅịa. Wa ị́ ḅaa-ẹkẹ.” Anị ini mama ịwọ ḍiki nwọse ọ̀ fịna se pokolo mị ḅie ori ọkị pakụmaḅoye-ẹ.

¹⁴ Ò Lihaị mị lasịkị, Filistia apụma mangị ọ̀ damaḅo, se ọ̀ tịḅị olokuaḅẹ. Bẹkẹma ḅaraḅụ Nyanaḅọ Ḅe kụrọ mị ịnyọ se ọ̀ pịrịmẹ se dọkịsa iri pẹlẹ ọkụ ọ̀ nwọse ọ̀ ḅarakọngọma na pịkị ọ̀ ḅarama na ḅụ kpọ ḍikima pẹlẹsinmẹ.

¹⁵ Anịsịkịma ḅọlọka sịkị ḅụ fị̀sa yepụra asụn ḅapuko imgbe ọ̀ nwọ ọrịmẹ, ò tu anị deki se anị seni kịnị-a mẹndẹ oyiasi fịnjị nwọ ḅaamẹ.

¹⁶ Anịẹrẹchị Samsịn ḅe mị nime mị chumẹ, “Yepụra asụn ḅapuko imgbe à nwọse kịnị-a mẹndẹ oyiasi fịnjị nwọ ḅaamẹ; Yepụra asụn ḅapuko imgbe mị à nwọse ini tan tunduruma koromamẹ.”

¹⁷ Anịeso, ḅapuko imgbe mị ọ̀ nwọse gbin wokumamẹ. Mị ye mị paka nyọ mị ini nwọse anị chịnmẹ Remat Lihaị.

¹⁸ Anịsịkị Samsịn ḅe ọ̀ pụkọ opuma samịnamẹ, anị ọ̀ Nyanaḅọ Ḅe chịn se nwọ ḅẹye-ẹ, “Ị́rị́ mị opu ọmụḅaraiḅi mị seni ị̀ pịrịmẹ, se mịọkụ pụkọ samịna ḅụ à fị̀-ẹ mun aḅẹ, se mịna oruḅẹrẹnemi Filistia apụma ḅo ị̀ kun soḅe?”

¹⁹ Anị Tamụnọ Ḅe kiri mị ḅie gbọrị pokolo nyọ pakụmaye-ẹ anịnyọ Lihaị ḅie se mengi anịa ḅie pupakaḅomẹ. Samsịn ḅe ori anị ḅu se ḅụ dein nyanamẹ. Anịẹrẹchị anị ideri mengi mị ini nwọse anị chịnmẹ Hakore; mịọkụ sọnị anị pa omi-ẹ Lihaị ḅie.

²⁰ Samsịn ḅe si kụra ọ̀ nwọse tịḅịda Izrẹl mị pịrịmẹ Filistia apụma ḅẹrẹtọn àrị sịkịḅụ.