Bẹrẹkọn Apụ 14 - Kịrịkẹnị Baịbụl

Samsịn Ḅe Na Timna Eremenitọkụ Ma Na

¹ Gbọrị ene Samsịn Ḅe ò so Timna mun mẹ, anịju gbọrị Filistia eremenitọkụ ọ̀ nwọ ọrịmẹ.

² Ò vinpịkị so ama mun se nwọse ḍawu ḅe na nyọngọrọma na ḅẹmẹ, “Gbọrị Filistia eremenitọkụ Timna omi-ẹ, árị ị̀ ḅụḅẹlẹmẹ. Ómine á nyana ḅo ị̀ pịrị; àrị árị na sime ḅimẹ.”

³ Ọkụma ḍawu ḅe na nyọngọrọma na nwọse ọ̀ gbelamẹ, “Cheye ẹrẹchị oruḅẹrẹ nemi Filistia apụma ḅie ị́ mun eresimeḅe? Mịna sẹ ḅie, mịna tomonima ḅie ị́ simeḅịa gbọrị eremenitọkụ sọnị ị́ ọrịka?” Ọkụma Samsịn ḅe nwọse ḍawu ḅe ḅẹmẹ, “Árị ma anị ị́ nyana ḅo ị̀ pịrị à nwọ ḅi ḅọma-ẹ, árị ị̀ ḅụḅẹlẹmẹ.”

⁴ Ḍawu ḅe na nyọngọrọma na ini nemikẹ na Nyanaḅọ Ḅe anị Samsịn ḅe mịẹse ọ̀ mịn mị mịẹarịye-ẹ; anịatịḅị Nyanaḅọ Ḅe ori ẹmbẹ ḍọkịaḅẹ ò Filistia apụma na owusọḅịa ọkụ. Mị sịkị ḅụ Filistia apụma anị ḅẹrẹtọn Izrẹl mị pịrịarịye-ẹ.

⁵ Anị Samsịn ḅe na ḍawu ḅe na nyọngọrọma na so Timna mị mun ye-ẹ. Ini ozuma ḅie ḅọrọarị sịkị, gbọrị ayamburama chịrịḅa ekerea àrị ogbo ọ̀ naamẹ.

⁶ Nyanaḅọ Ḅe kụrọ mị bẹkẹma ḅaraḅụ Samsịn ḅe mịẹse ọ̀ kụrọmẹ se ori ọ̀ ḅarama se chịrịḅa ḅe nụnụkanịmẹ, anị oḅori tọkụ nụnụkanị ọkụ mị. Ọkụma ọ̀ mịẹye mị ò ḍuko ḍawu ḅe na nyọngọrọma na pịrịkẹ.

⁷ Anịsịkị ò mun ọkwẹịn tọkụ ma pịrịmẹ se árịa mịẹye pịkị ọ̀ ḅụḅẹlẹmẹ.

⁸ Boka kala ḍin ḅọrọ sịkị Samsịn ḅe ò vinpịkị mun á simemẹ. Ò soarị sịkị ori agba ọ̀ ḅaa koroma chịrịḅa ḅe ḍikimẹ, se anị ọ̀ ḅụgbiripumamẹ na akama kpo na ḅẹịn na fịsa chịrịḅa ḅe oju ḅie ọ̀ nwọ ọrịmẹ.

⁹ Ọ̀ ḅẹịn mị ịngọlị se ọ̀ ḅarama ḅie chụa se anị taḅama nwẹngịmẹ. Anịsịkị ò so ḍawu ḅe na nyọngọrọma na damamun se kele se ini pịrịmẹ. Ini anị taḅamẹ, ọkụma Samsịn ḅe ò ḍuko ini pịrịkẹ na fịsa chịrịḅa oju ḅie ọ̀ ḅẹịn mị ọkịḅomẹ.

¹⁰ Ḍawu ḅe ò so tọkụ ma árịa warị mun mẹ, se Samsịn ḅe ori anịju ḅụ alalị koroma ini pịrịmẹ. Anị asẹmẹnị awọma inia mịẹmịẹye-ẹ.

¹¹ Filistia apụma ini ori ọrị sịkị, asẹmẹnị ma ḅụ ori na simeḅịa apụ kịnị soi ini nwọse ọ̀ fịrịmamẹ.

^12-13 Samsịn ḅe nwọse ini ḅẹmẹ, “Ye à gbọrị kaḅo kọn ọ́ pịrị. Se àrị ọ́mịna ḅie ḅọḅọ na ḅarachụaḅịa na ómine ineda anị fieye ḍuko ị̀ pịrịka mun ereya sọnọma ḍin ma ḅọrọḅịa. Iḅi lọkọ ḅịtẹ warị na kịrịkịrị iḅi ḅụchụaye na anị à se ómine na ḅarachụaḅịaye-ẹ.” Ini nwọse ọ̀ ḅẹmẹ, “Ị́ya kaḅo mị ḍuko wa pịrị se wa anị naa.”

¹⁴ Ọ̀ nwọse ini ḅẹmẹ, “Ye pẹịpẹịwu ḅe ḅie ḅụ fịfịye pakaḅomẹ; Ịnyọ nyana wu ḅie ḅụ ḅẹlẹye pakaḅomẹ.” Tẹrẹ-a ḍin ḅọrọ sịkị kaḅo mị fieye ini pa anị pufinjikẹ.

¹⁵ Inein-a ḍin karama ene mị ḅụ ini nwọse Samsịn tama ḅẹmẹ, “Epele se ị́ de ḅe ti se ọ̀ kaḅo mị fieye mị ḍuko wa pịrị. Ị́ anị mịẹkẹ ḅẹḅẹ, wa fịnị se ị́ ḍaḅe warị ḅụ chụa se anị na ị́rị́ na dọkịma gbolomaḅịa. Ómine mama apụma ọ́ wa chịnmẹ mịna ḅara ye pọkọ ọkịḅịaye ẹrẹchị, anịka?”

¹⁶ Anị Samsịn tama owuma ọ̀ damamun se nwọse ọ̀ ḅẹye-ẹ, “Ị́ ị̀ ḅẹlẹmakẹ ngịsị! Ị́ opuma ị̀ ḍikiḅieḅumẹ! Ị́ kaḅo kọn ị̀ya ikiapụ ma pịrịmẹ se anị fieye mị ị́ ḍuko ị̀ pịrịkẹ!” Ọ̀ nwọse á ḅẹmẹ, “Ḍiki, ị̀ ḍaḅe na ị̀ nyengima na sọnị à ḍuko ini pịrịkẹ. Nde à gose anị ḍuko ị́ pịrịḅịaye?”

¹⁷ Árị anị gose owumẹ bebe alalịfị sọnọma ḍin mamgba ḅie. Ọkụma sọnọma ḍin karama ene mị ḅie kaḅo mị fieye ọ̀ nwọ ḍuko á pịrịmẹ, anịatịḅị árị anị gose opuma ọ̀ ḅụ ḅalaḅalamamẹ. Anị árị anị ḍuko se Filistia apụma pịrịye-ẹ.

¹⁸ Se sọnọma ḍin karama ene mị ḅie Samsịn ḅe ma ọ̀ warịsọ mọnọka simeogbo, opuama mị ḅie apụma nwọse ọ̀ ḅẹye-ẹ, “Cheye ḅẹlẹtẹịn ḅẹịn nẹngịḅe? Cheye ịnyọ nyanatẹịn chịrịḅa nẹngịḅe?” Samsịn ḅe nwọse ini pẹkẹrẹmẹ, “Ó nemikase ị̀ya nambulo ḅe na ozu mị kọrịka ọkụma, Mgbọkụ mịọkụ sọnị pẹkẹrẹḅịpị ma ó nemi-ẹkẹ.”

¹⁹ Bẹkẹma ḅaraḅụ Nyanaḅọ Ḅe kụrọ mịẹse ori ịnyọ nyanamẹ, se ò so Ashkẹlọn mị mun mẹ, anịju ḅụ kịnị soi ọ̀ nwọ ḅaamẹ, owuapụ ḅụ, inia iḅia ḅụchụayema sin ọkị se àrị seni kaḅo mị fieye mị pẹkẹrẹ apụma pịrịmẹ. Anị ḅọrọ sịkị, pakaye mị ḅe ịganị ò ḅie simearịogbo ò so ama mun mẹ,

²⁰ se tarọ ma ini á se ereya mị ḅie ọ̀ ḅụ yelatẹịnḅọ ḅe pịrịmẹ.