Bẹrẹkọn Apụ 13 - Kịrịkẹnị Baịbụl

Samsịn Ḅe Yi Mị

¹ Izrẹlapụma ini pịkịna Nyanaḅọ Ḅe ḅụ simịẹmẹ, se ò Filistia apụma wẹrịso se ini ḅẹrẹtọn Izrẹlapụma pịrị mun kụra mesi nwọ lamẹ.

² Anịsịkị mị ḅụ Manoa nwọ chịn gbọrị owuḅọ simemẹ Zora ama ḅọ-ẹ. Danị sẹ ḅie ḅọ-ẹ. Tarọ ma jịn sịkị ma á tọkụ yikẹ.

³ Nyanaḅọ Ḅe enjẹlḅọ ḅụḍiepakụma á pịrị se nwọ ḅẹmẹ, “Jịn sịkị ma ị́ tọkụ yikẹ, ọkụma ḅọlọ ẹkẹ ị́ fura se gbọrị owutọkụ nwọ yiḅịa.

⁴ Ọrị na gbọrị ere-iru sọnị ị́ ḅukẹ anịkanịka biya sọnị, pịkị fịma nwọḅẹ fịye layelaye sọnị;

⁵ se ị́ tọkụ ḅe yisa ḅẹḅẹ, ọ̀ tịḅị inime mị kịrịma, anịatịḅị ị́ nwọ ò yi koroma gbọrị ene mị ḅụ sakị, ịkpalị inime nyanaḅọ ọ̀ nwọ sọ osiḅụ sime Tamụnọ Ḅe pịrịḅịa. Ori Izrẹl mị ḍụaḅịa fịrị mị sakịḅịa Filistia apụma ḅaraḅie.”

⁶ Anị eremeniḅọ ma mun nwọse dewu ḅe ḅẹye-ẹ, “Gbọrị Tamụnọ tomoniḅọ ị̀ damaḅomẹ, ḍikitọrụ ḅụ Tamụnọ enjẹlḅọ ḅalafama ọkụ anị ọ̀ ḅalafama ọkụ-ẹ. Ò sime ḅo anga àrị ò gbelakẹ, oria ẹrẹ sọnị ọ̀ pịkị go ị̀ pịrịkẹ.

⁷ Ọkụma ọ̀ nwọse ị̀ ḅẹmẹ na à fura se gbọrị owutọkụ nwọ yiḅịa. Ori ị̀ ḅẹmẹ na gbọrị ere-iru sọnị à ḅuma anịkanịka biya sọnị, pịkị fịma nwọḅẹ fịye layelaye sọnị, à fịma anịatịḅị tọkụ ḅe ori ịkpalị inime nyanaḅọ sọ osiḅụ sime Tamụnọ Ḅe pịrịḅịa oria ḍumo ene mamgba ḅụ.”

⁸ Anị Manoa ḅe Nyanaḅọ Ḅe tẹkẹye-ẹ, “Sisi, Nyanaḅọ, ye ị́ fịrịma sẹịn Tamụnọ tomoniḅọ ḅe vinpịkịḅo se tọkụ ḅe yisa ḅẹḅẹ wa mịẹḅịa ọkụ mị ḍuko wa pịrị.”

⁹ Tamụnọ Ḅe Manoa ḅe ḅi yemị ọ̀ mịẹmẹ, se oria enjẹlḅọ ḅe vinpịkị eremeniḅọ ma damaḅomẹ ozu mị ḅie á kpọnjị sime nyọ mị ḅụ. Dewu Manoa ḅe ori árị na ofori-ẹ,

¹⁰ anịẹrẹchị kirikiri á mangị mun nwọse ọ̀ ḅẹmẹ, “Ḍiki! Ísí ene ḅo ọ̀ ḅụḍiepakụma ị̀ pịrịḅọ ḅe ọ̀ pịkịna ḅosam.”

¹¹ Manoa ḅe sịsẹ tarọ ma ḍukomunmẹ. Ò tomoniḅọ ḅe damamun se ò gbelamẹ, “Ḅẹrẹḍuko ị̀ tama pịrịḅọ ḅe ị́rị́?” Ọ̀ nwọse ọ̀ pẹkẹrẹmẹ, “Iin, Ị̀rị̀-ẹ.”

¹² Anị Manoa ḅe nwọse ọ̀ gbelaye-ẹ, “Ị́ya ọkwẹịnma ḅo kọkọmaye sọ ọkụma, nde tọkụ ḅe ọ̀ mịẹḅịaye? Ndende sime ḍumo ḅara ọ̀ nwọ kọnḅe?”

¹³ Nyanaḅọ Ḅe enjẹlḅọ ḅe nwọse ọ̀ pẹkẹrẹmẹ, “Ye ị́ tama árị ọrị na àrị á ḅẹ ḅara goyegoye á nwọ mịẹmẹ.

¹⁴ Iru-mịẹ chịn ḅụ ḅoye goyegoye á ḅịpị la ẹkẹ; gbọrị ere-iru sọnị á ḅu ẹkẹ anịkanịka biya sọnị, pịkị fịma nwọ ḅe fịye layelaye sọnị. À ḍuko á pịrịsaye goyegoye árị anị mịẹḅịa.”

^15-16 Manoa ḅe ò nemikẹ na Nyanaḅọ Ḅe oria enjẹlḅọ-ẹ, anịẹrẹchị ọ̀ nwọse ọ̀ ḅẹmẹ, “Sisi ma soma. Ye wa gbọrị ayamburama oḅori chụọ se ị́ pịrị.” Ọkụma enjẹlḅọ ḅe nwọ ḅẹmẹ, “À ḅọrọ nemikase simemẹ ḅẹ sọnị àrị ị́ya fịye fị ẹkẹ; ọkụma ị́ nemikase anị mịẹ ḅimẹ ḅẹḅẹ, anị seni dọkịma agba ḅaraḅụ mịẹ Nyanaḅọ Ḅe pịrị.”

¹⁷ Manoa ḅe nwọ pẹkẹrẹmẹ, “Ị́ ẹrẹ go wa pịrị, mịẹse wa osi se ị́ pịrịḅịa ọkụ ị́ya ọkwẹịn ma ḅo kọkọmaye sọsa ḅẹḅẹ.”

¹⁸ Enjẹlḅọ ḅe nwọse ò gbelamẹ, “Cheye ẹrẹchị ị́ ị̀ya ẹrẹ nemi ḍọkị? Ḅụgbiripuma ẹrẹ-ẹ.”

¹⁹ Anị Manoa ḅe gbọrị ayamburama oḅori na pịkị mgbọlụfịaye na nwọ ọkị, se agbamịẹ ḍụparị ẹbẹ mị ọgọnọ ḅụ agba mị mịẹ seni Nyanaḅọ Ḅe pịrịye-ẹ anị ḅụgbiripuma fịrị nwẹngị-nwẹngịḅọ ḅe.

^20-21 Fịnị ḅẹlẹ mị agbamịẹ ẹbẹ mị ḅụ kọrị iwoarị sịkị, Manoa ḅe na tarọ ma na, enjẹlḅọ ḅe fịnị ḅẹlẹ mị ḍuko iwo so mun-arị ọkụ mị ọrịmẹ. Anịsịkị anị Manoa ḅe ò nemiye-ẹ na tomoniḅọ ḅe Nyanaḅọ Ḅe oria enjẹlḅọ-ẹ, se ori na tarọ ma na kiri ọgọnọ ḅịkịkoro se iḅo simemẹ. Ini ḅarị pịkịna enjẹlḅọ ḅe ọrịkẹ.

²² Manoa ḅe nwọse tarọ ma ḅẹmẹ, “Pikipikiye ofori-ẹ, wa fịḅịa anịatịḅị wa tọrụ se Tamụnọ Ḅe ọrịsam!”

²³ Ọkụma tarọ ma nwọse ọ̀ pẹkẹrẹmẹ, “Nemikase Nyanaḅọ Ḅe ọ̀ wa ḅaa ḅimẹ nwọḅẹ ọkụma, mịna agbamịẹ ḍiepịrịayema ori ọkị ẹkẹ; mịn mị ò se wa ḍie ẹkẹ anịkanịka nwọ sime aye sọnị ò ḍuko wa pịrị ẹkẹ mịọkụ.”

²⁴ Eremeniḅọ ma gbọrị owutọkụ à nwọ yimẹ se á nwọse ọ̀ chịnmẹ Samsịn. Tọkụ ḅe ọ̀ sẹnịmẹ se Nyanaḅọ Ḅe pịkị ḅẹlẹma se ọ̀ pịrịmẹ.

²⁵ Se Nyanaḅọ Ḅe kụrọ ịnyọ seni ọ̀ pịrịmẹ anị Zora na Ẹshtaol na ogboku ò sime nyọ, Danị ikowarịma pike sime nyọ ḅụ.