Bẹrẹkọn Apụ 12 - Kịrịkẹnị Baịbụl

Jẹfta Ḅe Na Ifrem Apụ Ma Na

¹ Ifrem apụma iniaḅụ karakaramamẹ ọmụgbinḅịa ẹrẹchị; ini Jọdan Tọrụ mị saḅa Zefọn mị mun se nwọse Jẹfta ḅe ḅẹmẹ, “Cheye ẹrẹchị ị́ eke mị saḅa mun Amọn apụma na owusọ se wa chịn ị́ ḅụ chụaka ḅaraḅụ? Ị́ya warị mị wa dọkịma ị́ tịḅị ogbo saraḅịa!”

² Ọkụma Jẹfta ḅe nwọse ini ḅẹmẹ, “Ị̀ya tomonima na ị̀rị̀ na wa kụrọma Amọn apụma na kamụsọmẹ. Àrị ọ́ chịnmẹ, ọkụma ómine ị̀ ḍụa ḍụkụkẹ inia ḅara ḅie.

³ Ómine ị̀ ḍụa ẹka ọkụ à nwọ ọrị sịkị, à ḅarị ị̀ ḍumo abalakẹ se eke mị saḅa mun ini na owusọmẹ, se Nyanaḅọ Ḅe ori ị̀ mịẹ seni àrị ini nẹngịmamẹ. Cheye ẹrẹchị ó ḅo owu se ị̀ paka ebo-o mịọkụ?”

⁴ Jẹfta ḅe ò Giledị owuapụ mamgba ọkịḅo koḅirima, se Ifrem apụma na owusọ se ini nẹngịmamẹ. (Ifrem apụma nwọ ḅẹmẹ, “Ómine Giledị apụma anị Ifrem mị ḅie kansoapụ-ẹ, ómine nwọ Ifrem mị na Manasẹ mị na ḅieḅụ sime apụma!”)

⁵ Mịẹse Ifrem apụma mangịso ẹkaye ẹrẹchị, Giledị apụma ini ḅọrọ mun Jọdan mị saḅaḅịa nyọma nwọ ọkịmẹ. Nemikase Ifremḅọ mangịsoḅịa ẹrẹchị se tọrụ mị saḅaḅịa kụrọ ḅimẹ ḅẹḅẹ, Giledị apụma ini ò gbelaḅịa, “Ị́rị́ Ifremḅọ?” Nemikase “Ẹn-ẹn,” ọ̀ nwọ ḅẹmẹ ḅẹḅẹ,

⁶ ini nwọse ọ̀ ḅẹḅịa, “Ḅẹ-ẹ, ‘Shibolẹt’” Ọkụma ọ̀ nwọ ḅẹḅịa, “Sibolẹt” anịatịḅị ori ineda anị chịn kurama ẹkẹ. Ini ò kun se ọ̀ ḅaaḅịa anịju, Jọdan mị saḅaḅịa ọrụ ma ḅụ gbọrị nyọ ḅụ. Anịsịkị ḅụ Ifrem apụma ḅụ kịnị sọnọ-a poku na sọnọ-a ẹndẹ na ini nwọ ḅaamẹ.

⁷ Jẹfta ḅe sonio-a kụra ọ̀ nwọse tịḅịda Izrẹl mị pịrịmẹ. Anịsịkị ọ̀ fị̀mẹ, se oria ama Giledị mị ḅie ini ò ḍipimẹ.

Ibzan Ḅe Na, Ilọn Ḅe Na, Pịkị Abdọn Ḅe Na

⁸ Jẹfta ḅe ḅọrọ seso, Ibzan Bẹtlihẹmḅọ ḅe tịḅịda Izrẹl mị pịrịmẹ.

⁹ Owuapụ awọ soi na eremeni awọ soi na ọ̀ nwọ yimẹ. Oria eremeni awọma ọ̀ nwọse jịn anga ya pịrịmẹ, se jịn anga ḅụ eremeni awọ soi nwọ yaḅo oria owuapụ awọma pịrịmẹ. Ibzan ḅe sọnọma kụra ọ̀ nwọse tịḅịda Izrẹl mị pịrịmẹ,

¹⁰ anịsịkị ọ̀ fịmẹ se Bẹtlihẹm mị ḅie ini ò ḍipimẹ.

¹¹ Ibzan ḅe ḅọrọ seso, Ilọn Zẹbụlọnịḅọ ḅe tịḅịda Izrẹl mị pịrị mun oyi-a kụra nwọ lamẹ.

¹² Anịsịkị ọ̀ fịmẹ se Aịjalọn mị ḅie ini ò ḍipimẹ Zẹbụlọnị eke mị ḅụ.

¹³ Ilọn ḅe ḅọrọ seso, Abdọn Hilẹl ya Paịratọnḅọ ḅe tịḅịda Izrẹl mị pịrịmẹ.

¹⁴ Owuapụ awọ ḅụ kịnị-a mesi ọ̀ nwọ yimẹ se oria awọma yi apụma kịnị soi, anị yepụra asụn ma ḅụ tesi oyi fịnjịma se nwẹngị-nwẹngịapụ ma. Abdọn ḅe ọ̀ tịḅịda Izrẹl mị pịrị mun nine-a kụra nwọ lamẹ,

¹⁵ anịsịkị ọ̀ fịmẹ se Paịratọn mị ḅie ini ò ḍipimẹ Ifrem eke mị ḅụ anị Amalẹk apụ chịngị ọgọnọ-sẹ-mị ḅie ḅụ.