Bẹrẹkọn Apụ 11 - Kịrịkẹnị Baịbụl

¹ Jẹfta, Giledịḅọ ḅe, ori kuḅie kụrọ owuniḅọ-ẹ, sẹ fị eremeniḅọ ò yimẹ. Ḍawu Giledị ḅe

² tarọ ma ḅụlọ ọ̀ jịn owuapụ awọ yimẹ, se ini sẹnị ḅo ogu lasịkị, Jẹfta ḅe ini ò desinmẹ ama mị ḅie ḅụ. Ini nwọse ọ̀ ḅẹmẹ, “Mịna ḍaḅe warị ḅie ị́ ḍiekiri nyana ẹkẹ, anịatịḅị ị́rị́ jịn eremeniḅọ tọkụ-ẹ.”

³ Jẹfta ḅe oria owuapụ mịnapụma ḅụ ọ̀ mangị somun Tọb ama mị ḅie angamẹ. Anịju ḅụ oria mịẹmịẹaye yeḅụsọkapụ gbọrị kpo ḅụḅẹlẹ se ini ori na nwẹngịma ḅọrọmẹ.

⁴ Sịkị kele ḅọrọ seso Amọn apụma mun owu se Izrẹl mị pakamẹ.

⁵ Mịn mị ḅo mịẹ sịkị, Giledị mị ḅie tịḅịnịma Jẹfta ḅe ọkịḅoḅịa ẹrẹchị so Tọb ama mị mun mẹ.

⁶ Ini nwọse ọ̀ ḅẹmẹ, “Ḅo mịna tịḅịnịḅọ sọ, mịẹse wa Amọn apụma na owusọḅịa ọkụ.”

⁷ Ọkụma Jẹfta ḅe nwọse Giledị tịḅịnịma pẹkẹrẹmẹ, “Ómine ị̀ ḍikiḅieḅu so ọkụma, ị̀ ḍaḅe warị ḅie ómine ị̀ depakụmamẹ. Cheye ẹrẹchị ómine ị̀ ḍọkịmaḅo, ḅụfụka ḅo mịọkụ ọ́ lasịkị?”

⁸ Ini nwọse Jẹfta ḅe ḅẹmẹ, “Wa gose ị́ ḍọkịmaḅoye wa ḅimẹ mịọkụ ị́ mine na somun Amọn apụma na owusọ, se ị́ tịḅịdaḅọ sọ bebe Giledị apụ mamgba pịrị.”

⁹ Jẹfta ḅe nwọse ini ḅẹmẹ, “Ó nemikase ị̀ ọkịso ama mun Amọn apụma na owusọ se Nyanaḅọ Ḅe ọmụḅaraiḅi se ị̀ pịrịmẹ ḅẹḅẹ, àrị ọ́mịna amadaḅọ sọḅịa.”

¹⁰ Ini nwọse ọ̀ pẹkẹrẹmẹ, “Wa ḅerenimẹ, Nyanaḅọ Ḅe anị mịna onyechịẹḅọ-ẹ.”

¹¹ Anị Jẹfta ḅe ò Giledị tịḅịnịma na mun ye-ẹ, se ini ò se amadaḅọ na pịkị tịḅịnịḅọ na nwọ mịẹmẹ. Jẹfta ḅe oria ọkwẹịn ma nwọ kọnmẹ Mizpa mị ḅie Nyanaḅọ Ḅe tọrụkuḅu.

¹² Anịsịkị Jẹfta ḅe ori okunwẹngịapụ se Amọn amanyanaḅọ ḅe fịrịma se nwọ ḅẹmẹ, “Nde dada ị́ mine na ịgbanịarịye? Cheye ẹrẹchị ị́ ḅo owu se mịna sẹ mị paka oḅo?”

¹³ Amọn amanyanaḅọ ḅe nwọse Jẹfta okunwẹngịapụma pẹkẹrẹmẹ, “Izrẹlapụma Ijipt mị ḅie pakaḅo sịkị, ini ị̀ya ama ọkịmẹ Anọn Tọrụ mị ḅụ sakị mun Jabọk Tọrụ mị na pịkị Jọdan Tọrụ mị na la. Mịọkụ ị́ tẹrẹ anị se ị̀ pịrịḅịa deinma ḅaraḅụ.”

¹⁴ Jẹfta ḅe kpoto okunwẹngịapụma seni Amọn amanyanaḅọ ḅe fịrịma

¹⁵ se nwọ ḅẹmẹ: “Izrẹlapụma Moab ama anịkanịka Amọn amama ọkịmẹ nwọḅẹye mị kọkọmayekẹ.

¹⁶ Mị anị paka ọkụ-ẹ: Izrẹlapụma Ijipt mị ḅie pakaso sịkị, onwun ele mị ḅie ini ḅọrọmun Akaba Ọpọ mị lamẹ se ini ḅo Kedẹsh mị lamẹ.

¹⁷ Anịsịkị ini okunwẹngịapụ se Idọm amanyanaḅọ ḅe fịrịma se ọ̀ ḅara kụrọ ḅimẹ oria ama mị ḅie toluḅọrọḅịa ẹrẹchị. Ọkụma Idọm amanyanaḅọ ḅe ọ̀ ḍụkụkẹ. Ini pịkị Moab amanyanaḅọ ḅe ḅara kụrọ ḅimẹ, ọkụma ori sọnị pịkị ḍụkụkẹ ini oria ama mị ḅie toluḅọrọ. Anịẹrẹchị Izrẹlapụma ini Kedẹsh mị ḅie simemẹ.

¹⁸ Anị ini onwun ele mị ḅie ḅọrọsoye-ẹ, Idọm ama mị na pịkị Moab ama mị na kanaḅọrọ se ḅo Moab mị ḅụ ịrụapakapaka nyọ daọrụ mị lamẹ, Anọn Tọrụ mị ḅụ ísí saḅamanga mị. Ini anịju ḅụ ikowarịma pike simemẹ, ọkụma Anọn mị ini anị saḅakẹ anịatịḅị anị ma anị Moab eke mị-ẹ.

¹⁹ Anịsịkị Izrẹlapụma okunwẹngịapụ se Saịhọn, Amọraị amanyanaḅọ ḅe fịrịmamẹ, Hẹshbọnḅọ ḅe ọ̀ ḅara kụrọ ḅimẹ na ò ḅereni ini pịrị ini oria sẹ mị ḅie toluḅọrọ ḅo inia ama la.

²⁰ Ọkụma Saịhọn ḅe ọ̀ ḍụkụkẹ Izrẹlapụma toluḅọrọ. Oria ọmụogbo mị mgba ọ̀ nwọ ọkịḅo gboloma se Jehaz ḅie ikowarị pike sime, se owu se Izrẹl mị pakamẹ.

²¹ Ọkụma Nyanaḅọ Ḅe, Izrẹl Tamụnọ Ḅe ọ̀ mịẹse Izrẹlapụma ini Saịhọn ḅe na oria ọmụogbo mị na nẹngịmamẹ. Anị ḅụ Izrẹlapụma ini Amọraị apụ eke mị mgba nwọ ọkịmẹ anị anị sẹ mị ḅie anga apụma.

²² Ini Amọraị apụ eke mị mgba ọkịmẹ Anọn chuku daọrụ ḅụ simeye mị ḅụ sakị mun Jabọk mị la ọgọnọju daọrụ ḅụ pịkị onwun ele mị ḅụ ịrụapakapaka nyọ daọrụ ḅụ sakị mun Jọdan ḅụ ịrụasọsọ nyọ daọrụ ḅụ simeye mị lamẹ.

²³ Anịọkụma, Nyanaḅọ, Izrẹl Tamụnọ Ḅe, anị ḅarana Amọraị apụma desin oria tomoni, Izrẹlapụma pịrịye-ẹ.

²⁴ Mịọkụ ị́ ḅo kpoto anị ọkị oḅo-o? Ọ́mịna oru Kimọsh mị se ọ́ pịrịye omi-ẹ ḅẹḅẹ ómine anị mị ọlọchịẹma. Ọkụma Nyanaḅọ, mịna Tamụnọ Ḅe ọkị wa pịrịye goyegoye wa anị ọlọchịẹmaḅịa.

²⁵ Ị́ chịn ḅara ị́rị́ pa kele iḅi Belak, Zipọ yaḅe nẹngị, Moab amanyanaḅọ ḅe? Ngịsị ori Izrẹl mị na tụḅụrụkẹ, ori anị na tụḅụrụ? Ò mine na ọmụgbin sịkị omi?

²⁶ Kụra jieasi lasam Izrẹl mị Hẹshbọn mị na, Aroa mị na, àrị kelema amama na, pịkị Anọn tọrụaka ma ḅụ sime opuama mamgba na ọkị angasam. Cheye ẹrẹchị ma ị́ pa àrị ọkịka ḅo nwọ la anị sịkị ngịsị?

²⁷ Ẹn-ẹn, à se ị́ mịẹirimasaye ofori-ẹ. Ị́ siye mịẹ-aḅẹ ị́ nemikase ị̀rị̀ na ọmụgbinḅịa nwọḅẹ ọkụma. Nyanaḅọ Ḅe ḅẹrẹkọnḅọ-ẹ. Ori anị ḅẹrẹ mị kọn pẹlẹḅịaye-ẹ mịmgba Izrẹlapụma na Amọn apụma na ogboku.”

²⁸ Ọkụma Amọn amanyanaḅọ ḅe, mị Jẹfta ḅe se ọ̀ fịrịma oku mị ò kiri se anị pịrịkẹ.

²⁹ Anị Nyanaḅọ Ḅe sosikima kụrọ se Jẹfta ḅe pịrịye-ẹ. Giledị na Manasẹ ḅie na ọ̀ ḅọrọmẹ, se ọ̀ pịkị pịkịmaḅo Giledị ḅie Mizpa mị lamẹ, se pịkị mun Amọn mị lamẹ.

³⁰ Jẹfta ḅe ò ye ḅereni Nyanaḅọ Ḅe pịrịmẹ, “Ị́ nemikase ọmụḅaraiḅi se ị̀ pịrị se àrị Amọn apụma nẹngịmamẹ ḅẹḅẹ,

³¹ ị̀ya warị ḅie ḅụ tatarị pakaḅo ị̀rị̀ na ịrịaḅọ goyegoye à se dọkịma agba mịẹ ị́ pịrịḅịa, àrị ọmụḅaraiḅi ḅụ vinpịkị ḅosa ḅẹḅẹ. Anị ḅọ mị à se agbamịẹ ị́ pịrịḅịa.”

³² Anị ḅụ Jẹfta ḅe ọ̀ tọrụ mị saḅa mun Amọn apụma na owusọmẹ, se Nyanaḅọ Ḅe ori ọmụḅaraiḅi se ọ̀ pịrịmẹ.

³³ Aroa mị ḅie ḅụ ọ̀ sakị ini ḅaa nweni mun Minit pẹkẹrẹ mị lamẹ, arịmgba si lamẹ opuamama ḅụ, pịkị ọkịmun Ebẹl Keramim mị la. Ini ḅaa apụ opuma ḅakamẹ, se Izrẹlapụma Amọn apụma nẹngịmamẹ.

Jẹfta Ḅe Ḅarọ Ma

³⁴ Jẹfta ḅe ò vinpịkịso Mizpa oria ama mị mun sịkị, ḅarọ ma ḍọkọḍọkọ ọnwẹnẹ ḅụ sime akwa nwọ farịma ḅo pịkị sẹkịma ḅo ori na bịamamẹ. Árị kẹngẹ anị ò yiye-ẹ.

³⁵ Ori árị ọrị sịkị, ori oria ḅụchụayema kanmẹ kururu ḅụ se nwọ ḅẹmẹ, “Yei, ị̀ ndụḅa! Ị̀ kuḅie ị́ kansam! Cheye ẹrẹchị ị́rị́ re ị̀ ḅụ akụmaḅọ sọ? À kụrọma yeḅereni Nyanaḅọ Ḅe pịrịmẹ, à pịkị ineda anị chịnpịkịẹkẹ!”

³⁶ Árị nwọse ọ̀ ḅẹmẹ, “Ị́ nemikase yeḅereni Nyanaḅọ Ḅe pịrịmẹ ḅẹḅẹ, ị̀ se ị́ ḅereniye mị mịẹ, Nyanaḅọ Ḅe nwọ ị́rị́ na tarakapụ, Amọn apụma ḅụ sowuḅi ị́ pịrịsa sịkị.”

³⁷ Ọkụma á nwọse ḍawu ḅe ḅẹmẹ, “Pa mị gbọrịye mị nwọ mịẹ ị̀ pịrị. Mama akalụ nwọse ị̀ pịrị à se mun ị̀ juo iriawọ ma na tụndụma ḅie nwẹngị kelekele, se kururu ị̀ ḅụ pịrị anị àrị owuḅọ nemika ḅaraḅụ sime fịḅịa nwọḅẹye ẹrẹchị.”

³⁸ Ọ̀ nwọse á ḅẹmẹ mun se mama akalụ ọ̀ nwọse á pịrịmẹ. Árị na árịa ikiapụ ma na tụndụma kpọlị mun se kururumẹ anịatịḅị owuḅọ simeka pịkị tọkụ yika ḅaraḅụ á sime fị omuaḅẹ.

³⁹ Mama akalụ ma kara sịkị, á vinpịkị so ḍawu ḅe damaḅomẹ. Se ori á se ò ḅereni Nyanaḅọ Ḅe pịrịye mị nwọ mịẹmẹ, se árị owuḅọ nemika ḅaraḅụ fịmẹ. Mịn mị anị Izrẹlapụma inia ama anganga ḅara mị chuku-ẹ,

⁴⁰ Izrẹl mị ḅie iremeni awọma kụrakụra ḅụ inein-a ḍin se mun kururu Jẹfta Giledịḅọ ḅe ḅarọ ma pịrịpịrị mịẹmịẹye mị.