Bẹrẹkọn Apụ 10 - Kịrịkẹnị Baịbụl

Tola Ḅe

¹ Abimẹlẹk ḅe fị ḅọrọ sịkị, Tola, Pua yaḅe ḅo Izrẹl mị ḍụaḅọrọmamẹ, oria opu ḍaḅọ anị Dodo ḅe-ẹ. Ori Ịsaka furoḅieḅọ-ẹ se Shamẹ mị ḅie ori angamẹ Ifrem chịngị-ọgọnọ-sẹ mị ḅie.

² Sitẹrẹ-a kụra fịnjị ọ̀ nwọse tịḅịda Izrẹl mị pịrịmẹ. Anịsịkị ọ̀ fịmẹ se ini ò se Shamẹ mị ḅieḅụ ḍipimẹ.

Jea Ḅe

³ Tola ḅe ḅọrọ sịkị Jea Giledịḅọ ḅe ḅo kiri ọkịmẹ. Simaịn kụra fịnjị ọ̀ nwọse tịḅịda Izrẹl mị pịrịmẹ.

⁴ Owuapụ awọ ḅụ kịnị soi ọ̀ nwọ yimẹ, ini pịkị yepụra asụn ḅụ soi nwọse nwẹngị-nwẹngịmẹ. Giledị mị ḅie opuama soi ini nwọ nyanamẹ, mịọkụ sọnị ini pa nwọse àrị chịn-aḅẹ Jea ịwọamama.

⁵ Jea ḅe fịmẹ se ini ò se Kamọn mị ḅieḅụ ḍipimẹ.

Jẹfta Ḅe

⁶ Izrẹlapụma ini pịkị simịẹmẹ, Nyanaḅọ Ḅe ḅụ anị Beal ma na Astate na tẹkẹ mị gose, pịkị Siria na, Saịdọn na, Moab na, Amọn na pịkị Filistia apụ oru ma tẹkẹ mị gose. Ini Nyanaḅọ Ḅe sịkịmẹ ini pịkị ḅarị ọ̀ tẹkẹkẹ.

⁷ Anịẹrẹchị Nyanaḅọ Ḅe Izrẹlapụma ḅụ ò ḅụosọ nyanamẹ, se ini wẹrịso se Filistia apụma na, Amọn apụma na ini nẹngịmamẹ.

⁸ Maịnfasi kụra na gbasịye ini nwọse tọrụdekika na pịkị ḅụfụka na se Izrẹlapụ mamgba pịrịmẹ anị Amọraị apụ sẹ mị ḅie Jọdan Tọrụ mị ḅụ ịrụapakapaka nyọ daọrụ anga apụma Giledị mị ḅieḅụ.

⁹ Amọraị apụma pịkị Jọdan mị sọnị saḅa mun owu se Juda na Bẹnjamin na pịkị Ifrem na pakamẹ. Izrẹl mị anị opu tọrụsiọrị ḅie simemẹ.

¹⁰ Anịẹrẹchị Izrẹlapụma ini owu Nyanaḅọ Ḅe pịrị se nwọ ḅẹmẹ, “Wa ị́ ḅụ simịẹsam, anịatịḅị wa ị́rị́, mịna Tamụnọ Ḅe wẹrịso, se mun Beal ma re nwọ tẹkẹmẹ.”

¹¹ Nyanaḅọ Ḅe nwọse ini pẹkẹrẹmẹ, “Ḅọrọsa sịkị ḅụ, Ijipt apụma na, Amọraị apụma na, Amọn apụma na, Filistia apụma na,

¹² Saịdọn apụma na, Amalẹk apụma na, pịkị Meọn apụma na ḅereni se ọ́ tọrụdekika sịkị, ọ́ kọkọ owu ị̀ pịrị. Inia ḅara ḅie àrị ọ́ ḍụaḅọrọmaka?

¹³ Anịẹḅẹ sọnị ọ́ pa ị̀ wẹrịso se mun jịn-a oru ma tẹkẹmẹ, mị gose à ḅarị ọ́ ḍụapakụmaḅo ẹkẹ.

¹⁴ Ó somun owu ọ́ sẹlẹọkị oru ma pịrị. Ye árị ọ́ ḍụapakụmaḅo ó mun ḅụfụka ḅie sọ sịkị.”

¹⁵ Ọkụma Izrẹlapụma nwọse Nyanaḅọ Ḅe ḅẹmẹ, “Wa simịẹsam. Ị́ ḅụḅẹlẹye goyegoye mịẹ, ọkụma, sisi, pa mịmgba wa ḍụaḅọrọma.”

¹⁶ Anị ini inia jịn sẹ oru ma wokuma se Nyanaḅọ Ḅe tẹkẹye-ẹ, se Izrẹl mị ọrịarị tọrụsiọrị ma ḅo ḅụḅalaḅala se ọ̀ pịrịmẹ.

¹⁷ Anịsịkị Amọn apụ ọmụogbo mị owupakaḅịa ẹrẹchị ḅụkarakaramamẹ se Giledị mị ḅieḅụ ikowarịma pike simemẹ. Izrẹlapụma sọnị ḅo Giledị ḅie sime Mizpa mị ḅie ḅụ koḅiria se inia ikowarịma pike simemẹ.

¹⁸ Anịju ḅụ Izrẹlapụma sẹma na inia tịḅịnịma na nwọse jụmḅọ jụmḅọ gbelamẹ, “Tụḅọ tịḅịda Amọn apụma na ọmụ mị gbinḅe? Anị mị mịẹḅọ goyegoye anị tịḅịnịḅọ sọ se Giledị mị ḅie simeḅọ goyegoye pịrịḅịaye-ẹ.”