Bẹrẹkọn Apụ 1 - Kịrịkẹnị Baịbụl

Juda Na Simiọnị Na Sẹ Ma Adonaị-Bizẹk Ḅe Kunmẹ

¹ Jọsụwa ḅe fị ḅọrọ so se so Izrẹlapụma nwọse Nyanaḅọ Ḅe gbelamẹ, “Mịna sẹma ḅụ nde sẹ tatarị mun owu se Kenan apụma pakaḅe?”

² Nyanaḅọ Ḅe nwọse ini pẹkẹrẹmẹ, “Juda sẹ mị tatarị munḅịa. Ama mị à se inia ḅarachụa aḅẹ.”

³ Judapụma nwọse Simiọnị-a tomonima ḅẹmẹ, “Ó ḅo mịnaḅụ sọ ini ḍie wa pịrị pẹkẹrẹ mị mun se ye wa gboloma owu se Kenan apụma paka. Anịọkụma wa ómine na ini tọn ọ́ pịrị pẹkẹrẹ mị munḅịa.” Anị ḅụ Simiọnị sẹma na

⁴ pịkị Juda sẹ mị na gboloma ọmụ mị mun mẹ. Nyanaḅọ Ḅe ọ̀ mịẹ sarasarama ini pịrị se ini Kenan apụma na pịkị Pẹrizaị apụma na nẹngịmamẹ, se Bizẹk mị ḅie kịnị-a si sọnọ ẹndẹ fịnjị ini nwọ nẹngịmamẹ owuni ḅụ.

⁵ Anịju ḅụ ini Adonaị-Bizẹk ḅe ọrị se ori na owu sọmẹ.

⁶ Ọ̀ mangịmẹ, ọkụma ini ò ḍuko mun ò kun se oria opu ḅaratụmgbalị ma na pịkị oria opu ḅụọtụmgbalị ma na pẹlẹ sinmẹ.

⁷ Adonaị-Bizẹk ḅe nwọ ḅẹmẹ, “Opu ḅaratụmgbalị ma na opu ḅụọtụmgbalị ma na pẹlẹ sinsa amanyanapụ-a tesi oyi fịnjị ị̀ya dẹbụl mị chuku ḅie ḅụ pumburo gbala fịfịmẹ. Mịọkụ Tamụnọ Ḅe à se ini mịẹye mị ọ̀ nwọse ị̀ mịẹsam.” Ini ori ọkị so Jerusalẹm mun mẹ, se anịju ḅụ ọ̀ fịmẹ.

Juda Sẹ Mị Jerusalẹm Mị Na Hibrọn Mị Na Nẹngịmamẹ

⁸ Juda owunima owu se Jerusalẹm mị paka se anị ọkịmẹ. Ini tomonima ḅaa se fịnị se opuama mị ḅụ chụamẹ.

⁹ Mịn mị ḅọrọ sịkị ini mun Kenan apụma na owu sọmẹ, anị chịngị ọgọnọ sẹ mị ḅie angapụma, chịngịma chuku na, pịkị kpoinkpoin kiri sẹ mị na chukuju damun ọrụ ḅụ.

¹⁰ Ini nwẹngị sọ mun Hibrọn opuama mị ḅie anga Kenan apụma damamunmẹ, anị Kiriat Aba ini nwọse chịn apụma. Anịju ḅụ ini Shẹshaị apụma na, Ahiman apụma na, pịkị Talmaị apụma na nẹngịmamẹ.

Otniẹl Ḅe Diba Opuama Mị Nẹngịmamẹ

¹¹ Anịju ḅụ Juda owunima nwẹngị sọma Diba opuama mị mun mẹ, anịsịkị ḅụ ini nwọse anị chịnmẹ Kiriat Sẹfa.

¹² Inia ḅie gbọrịḅọ, Kelẹb ini nwọse chịnḅọ ḅe, nwọ ḅẹmẹ, “Ị̀ya eremeni tọkụ Aksa ma à nwọse ineda Kiriat Sẹfa mị ọkịḅọ goyegoye nwọ pịrị se ori árị na simeḅịa.”

¹³ Otniẹl, Kelẹb numbireowu tọkụ Kinaz yaḅe, opuama mị ọkịmẹ, anị ẹrẹchị Kelẹb ḅe ḅarọ Aksa ma seni ọ̀ piri se ori árị na simemẹ.

¹⁴ Ereya ene mị ḅụ Otniẹl ḅe nwọse á ḅẹmẹ na á ḍawu ḅe ḅara ozukiri nwọ ḅi. Arịa yepụra asụn ḅe ọgọnọ á koromẹ, se Kelẹb ḅe á ḅiarịye nwọse á gbelamẹ.

¹⁵ Á nwọse ọ̀ pẹkẹrẹmẹ, “Mengi ideripaka ḅoḅịa nyọ anị à ḅiye-ẹ. Ị́ seni ị̀ pịrị kiri mị kpoinkpoin kiri sẹ mị ḅie ḅụ anị omi-ẹ.” Anị ẹrẹchị Kelẹb ḅe ọgọnọ ọrụ na chuku ọrụ na ideri mengi ma se á pịrịmẹ.

Juda Na Bẹnjamin Na Sẹ Ma Ḅara Iḅi Ọmụ Ma

¹⁶ Moziz ta ma ḍawu Kenaịḅọ ḅe furo ḅie apụma Juda apụma ḅụ sọ Jẹriko mị mun mẹ, anị enemi kọrọ ma sime opuama mị ḅụ ọkịmun fịye pakụmaka sẹ mị ḅie mun Erad mị lamẹ chukuju daọrụ ḅụ Juda mị ḅie. Anịju ḅụ ini Amalẹkapụ ma ḅie angamẹ.

¹⁷ Judapụma na, Simiọnị apụma na gboloma mun Kenan apụma nẹngịmamẹ, anị Zifat opuama mị ḅie anga apụma. Ini worinime se opuama mị pịrịmẹ, ini anị kansin, se nwọse anị chịnmẹ Họma.

^18-19 Nyanaḅọ Ḅe ọ̀ ḅarachụa Juda mị pịrịmẹ, se ini chịngị ọgọnọ sẹ mị ọkịmẹ. Ọkụma ini ineda Gaza mị na, Ashkẹlọn mị na, anịkanịka Ẹkrọn mị na, pịkị àrị kelema koro amama na nwọ ọkịkẹ. Tọrụ mị aka ḅụ anga apụma ini ikulele kporokporo owuni arụ nyanamẹ, anị gose Juda apụma ini ineda ini depakụmakẹ.

²⁰ Moziz ḅe tọnsa ḅaraḅụ, Hibrọn mị ini se Kelẹb ḅe pịrịmẹ, anị opuama mị ḅie Anak furo ḅie apụ tẹrẹ-a sẹma depakụmaḅọ ḅe.

²¹ Ọkụma Bẹnjamin sẹ mị ḅie apụma ini Jebus apụma depakụmakẹ anị Jerusalẹm mị ḅie angapụma; anịẹrẹchị Jebus apụma ini pa Bẹnjamin apụma na Jerusalẹm mị ḅie anga ḅo mịmgba lamẹ.

Ifrem Na Manasẹ Na Sẹ Ma Bẹtẹl Mị Kanmẹ

^22-23 Ifrem na Manasẹ na sẹma mun owu se Bẹtẹl, ini anịsịkị Lụz se chịn opuama mị pakamẹ. Nyanaḅọ Ḅe ọ̀ ḅarachụa ini pịrịmẹ. Ini ama ẹnyẹ apụ se opuama mị fịrịmamẹ,

²⁴ ini opuama mị ḅie pakasoarị gbọrị owuḅọ nwọ ọrị se nwọse ọ̀ ḅẹmẹ, “Ḅọrọ mun opuama mị ḅie sọḅịa ọkụ se wa ḍie, wa ye se ị́ lama ẹkẹ.”

²⁵ Anịẹrẹchị ò se ini ḍiemẹ, se Ifrem apụma na, Manasẹ apụma na opuama mị ḅie sime ḅọ goyegoye ḅaa famamẹ, ọkụma ḅe ḅọ ḅe na ò furo mị na kẹngẹ kọnmẹ.

²⁶ Anịeso ò so Hitaị apụma ama nwọ mun mẹ se anịju ḅụ gbọrị opuama nwọ namamẹ, se Lụz nwọ se anị chịnmẹ, anị mịọkụ sọ pa anịa ẹrẹ mị-ẹ.

Izrẹlapụma Depakụmaka Apụma

²⁷ Manasẹ sẹ mị anị opuamama ḅie anga sime apụma depakụmakẹ anị Bẹt Shan na, Teanak na, Do na, Ibleam na, Mẹgido na, pịkị àrị na kpeki amama na; Kenan apụma ini pa pịkị anịju ḅụ anga mamunmẹ.

²⁸ Izrẹlapụma ḅo kele kụrọ sịkị, ini kụrọḅara se Kenan apụma mịẹse ini fịrịnwẹngị ini pịrịmẹ, ọkụma anịẹḅẹsọnị, inimgba ini nwọ depakụmakẹ.

²⁹ Ifrem sẹ mị anị Gaza opuama mị ḅie anga Kenan apụma depakụmakẹ, anịẹrẹchị Kenan apụma ini pa pịkị ini na Gaza mị ḅie anga waraḅẹ.

³⁰ Zẹbụlọnị sẹ mị anị ma opuamama ḅie anga sime apụma depakụmakẹ, anị Kitrọn mị na, pịkị Nahalol mị na, anịẹrẹchị Kenan apụma pa pịkị ini na angamẹ se ini kụrọḅara se Kenan apụma mịẹse ini fịrịnwẹngị ini pịrịmẹ.

³¹ Asha sẹ mị anị ma opuamama ḅie anga sime apụma depakụmakẹ, anị Akọ na, Saịdọn na, Alab na, Akzib na, Hẹlba na, Efịk na pịkị Rihọb na.

³² Ashapụ ma ini Kenan apụma na angamẹ, ini nwọ ini depakụmaka sịkị.

³³ Naftalaị sẹ ḅie apụma opuamama ḅie anga sime apụma ini ini depakụmakẹ, anị Bẹt Shimẹsh mị na, pịkị Bẹt Anat mị na. Naftalaị apụma ini Kenan apụma na anga gbolomamẹ ọkụma ini kụrọḅara se ini mịẹse ini fịrịnwẹngị ini pịrịmẹ.

³⁴ Amọraị apụma ini Danị sẹ mị demun chịngị ọgọnọ sẹ mị ḅie chumẹ, ngịsị ini ḅerenikẹ ini tukoroḅo sẹrẹrẹkiri mị la.

³⁵ Amọraị apụma Aịjalọn mị na, Shealbim mị na, pịkị Hirẹs Tụndụ mị ọgọnọ ḅụ ini pa anga waraḅẹ, ọkụma Ifrem na Manasẹ na sẹma ini se inia chuku ḅie koroma se ḅẹrẹtọn ini pịrịmẹ, kụrọḅara se ini mịẹse ini fịrịnwẹngị ini pịrịmẹ.

³⁶ Sila ọgọnọju daọrụ ḅụ Idọm apụ eke mị ḅọrọmun Akrabim Ḅọrọnyọ mị lamẹ.