Aịzaya 8 - Kịrịkẹnị Baịbụl

Aịzaya Tọkụ Ḅe Elekimaye Sọ Tomoni Ma Pịrịmẹ

¹ Nyanaḅọ Ḅe nwọseni ị̀ ḅẹmẹ, “Ye gịẹịnḅịa gbọrị opuye ọkị se anịa ọgọnọ ḍụḅaḍụḅa ḍiri mgbọlụ nwọ gịẹịn: ‘Be, sarama Sima.’

² Kuḅie-se-ḅụgbana gbẹịn mama apụ nwọ ọkị, Yuraya agbamịẹḅọ ḅe na Zẹkaraya, Jịbẹrịkaya tọkụ ḅe na, onyechịẹapụ ḅaraḅụ.”

³ Ḅo gbọrị sịkị lasịkị, ị̀ tama á simekọnmẹ. Mịna tọkụ ḅe á nwọ yisịkị, “Nyanaḅọ Ḅe nwọseni ị̀ ḅẹmẹ, ‘Be-Sarama-Sima nwọseni ọ̀ chịn.’

⁴ Tẹrẹmẹ tọkụ ḅe sẹnịḅo ‘Nne na Ḍaḍa na’ chịnḅịa sịkị, Damaskọs apụ ngọ mamgba na Sameriapụ na ọfọịnso aye mamgba na Asiria amanyanaḅọ ḅe ò deki soḅịa.”

Asiria Amanyanaḅọ Ḅe Ò Ḅoaḅẹ

⁵ Nyanaḅọ Ḅe pịkịna ọkwẹịn ị̀ pịrịmẹ.

⁶ Ọ̀ nwọḅẹmẹ, “Mịnapụ ma ini Shaịlọ-dein-kala ideri mengi mị sịkịmẹ ini pịkịna Amanyanaḅọ Rezịn ḅe na Amanyanaḅọ Pẹka ḅe na tọrọkọ ḅụ ḅụgerergereye gose,

⁷ Ị̀rị̀, Nyanaḅọ Ḅe, àrị Asiria sẹdaḅọ ḅe na oria owuni mamgba na ọkịḅo owu seni Juda mị pakaḅịa. Yufretis Tọrụ mị owoima seri anịa akasịkị mamgba ḅilema ḅara anị ini seri ḅoḅịa ọkụ-ẹ.

⁸ Ini Juda mị ḅilemaḅịa ḅara anị opu mengi seri tomoni aba ḅọrọmun yegoyegoye ḅilema ọkụ simemẹ.” Tamụnọ Ḅe ò mịnaḅụ omi-ẹ! Oria pamba ma ò finjima ama mị gbẹịnmẹ.

⁹ Ḅalafaḅụ ó koḅirima, ómine sẹma! Ó poki, ómine sẹkiri ḅie ḅọlọ-a nyọma! Iin, ọ́ ḅụkarakarama seni owusọ, ọkụma ọ́ ḅalafa nyana! Iin, ọ́ ḅụkarakarama, ọkụma ọ́ ḅalafa nyana!

¹⁰ Ọ́ mịẹḅịaye ọ́ nwọ tọn! Ọkụma ngịsị àrị ḅịrị ẹkẹ. Ọ́ kọnḅịa ọkwẹịn mamgba ọ́ nwọ kọn, ọkụma arịmgba yesọkẹ, anịatịḅị Tamụnọ Ḅe ọ̀ mịnaḅụ omi-ẹ.

Nyanaḅọ Ḅe Ịkịankoroḅọ Ḅe Ḅerijinemẹ

¹¹ Nyanaḅọ Ḅe oria opu kụrọ ḅụ ị̀ ḅeri nụnụmẹ na à tomonima ḍuko ini nwẹngịarị ateli mị nwẹngịma. Ọ̀ nwọḅẹmẹ,

¹² “Ḅụse tomonima mịẹarị siaye ma ḅie chuma, pịkị inia ḅalafamarịaye ma ḍikiḅalafama.

¹³ Seḅiekoroma na, Ị̀rị̀ Kụrọmamgba Nyanaḅọ Ḅe, à fịafịamẹ; Ị̀rị̀ mị ị́ ḍikiḅalafaḅịaḅọ ḅe-ẹ.

¹⁴ Ị̀ya opu ḅalafama fịafịa mị gose, tomoni ḅụọ tọmbụlọ se ḅịkịḅịa ḍụparị à nwọ kịkẹmẹ; Juda na Izrẹl na amanyanakiri ma na Jerusalẹm apụma na kunḅịa ḍẹịn à nwọ kịkẹmẹ.

¹⁵ Tọntọn apụ ḅụọ tọmbụlọḅịa, ini ḅịkị kọsịḅịa. Ini ḍẹịn ḅie ini kunḅịa.”

Fịḅọrọsapụ Chịn Yegbela Mị Ḅe Ḅerinụnụ

¹⁶ Ómine ị̀ ḍukonwẹngịarị apụma, Tamụnọ Ḅe seni ị̀ pịrịsa oku ma, ómine àrị ọbị pịkịna àrị koko.

¹⁷ Nyanaḅọ Ḅe, oria tomonima ḅụ ori ọ̀ ḅụ ḅọịsam, ọkụma ò ḅerenimẹ, à pịkịna ị̀ kuḅie seni ò ḅụgbanamẹ.

¹⁸ Nyanaḅọ Ḅe seni ị̀ pịrị awọmẹnịma na ị̀rị̀ na mịanga wa omi-ẹ. Kụrọmamgba Nyanaḅọ Ḅe, Zaịyọn Tụndụ ọgọnọ sime emine mị nyanaḅọ ḅe, ḍumo oku ọ̀ nwọse wa fịrịmamẹ ḍuko se Izrẹlapụma pịrị.

¹⁹ Ọkụma tomoni ómine ḅẹḅịa, ó mun ḅịrịapụ na tọrụtoluapụ na ḅara yegbela, ini anị kala-feni-awọ ọkwẹịn ọkụ se ọkwẹịn pịkịna pụkọḅie pụkọḅie nwọseni ọkwẹịn seni tomoni ini kọn àrị ọkwẹịn ma naanaakapụ ma-ẹ. Ini nwọḅẹmẹ, “Anị mịẹgbẹịnka, tomoni tẹmẹ na ḍụẹịn na ḅara yegbela, ḍumo apụma gose?”

²⁰ Ómine ini pẹkẹrẹḅịa, “Nyanaḅọ Ḅe seni ó telimarịye ma ọ́ nwọ poki! Ọ́ tọrụtoluapụ pokima anịatịḅị ini ḍuko ọ́ pịrịḅịa yema ineda ḅụfụka ḅie ọ́ ḍụa ẹkẹ.”

Tọrụsiọrị Sịkị

²¹ Tomonima ama ḅie ini nwẹngịma nwẹngịma ḅọrọḅịa damun-arị nyọ nemika ḅaraḅụ, kuḅie lọkọ na fịye pụkọtarị ḅụ na. Inia fịye pụkọtarị ḅụ na yeḅụosọ ḅụ na ḅie, mị inia amanyanaḅọ ḅe na inia Tamụnọ Ḅe na ini nwọ woriḅịa. Ini pa tọrụdeki so mị ḍikiḅịa,

²² anịkanịka kiri mị ḍikiḅịa, ọkụma ini ọrịḅịa gbọrịye sọnị ofori-ẹ, tọrụsiọrị na kanakana na sikima, ḅalafama kanakana ḅie mị ini ini demun chu-ẹmun-arịye-ẹ.