Aịzaya 64 - Kịrịkẹnị Baịbụl

¹ Cheye gose ị́ so mị kan finji se koroḅoka? Tụndụ ma àrị ị́ ọrịḅịa, se ḅalafaḅụ arịa ḅụgeregereḅịa.

² Owoi fịnị ọgọnọ ḍarịarị mengi geregere ọkụ anị àrị geregereḅịa ọkụ-ẹ. Ḅo ị́ya kụrọ mị ḍiepakụma ị́rị́na-tarakapụ ma pịrị se mịẹ sẹma arịa ḅụgeregere ị́ tọrọkọ ḅụ!

³ Gbọrị-sịkị, ị́ ḅo wa-se-ḅietọnka ḅalafama aye nwọ mịẹmẹ; tụndụma àrị ị́ ọrịmẹ se ḅalafa ḅụ àrị jikemẹ.

⁴ Ị́ sime ọkụ sime Tamụnọ gbọrịḅọ sọnị ma jịn sịkị ọrị pịkị ọ̀ ḅụ ye naakẹ, anị iḅiaye mịẹse kuḅie-se-ọ̀ ḅụgbanapụ ma pịrị mị ḅụ.

⁵ Ḅẹlẹ kuḅie nyana karakaraye mịẹmịẹapụma ị́ ini ọkị ị́ ḅụ pịrịpịrịmẹ, anị kaịnḅo se ị́ ḅụḅẹlẹ ḅara se mịna ḍumo wẹrị apụma. Ị́ ịganị nyana wa pịrịmẹ, ọkụma wa pa simịẹ ma mun aḅẹ, ị́ opuma ịganịmẹ nwọḅẹ sọnị wa pa olomu sịkị ngịsị mịẹ-na-iḅikaye ma mịẹma mun aḅẹ.

⁶ Mine mgba wa si mịẹsam; mịẹmịẹaye ḅụ wa mịẹ iḅitẹịnmẹ ḅe aye mamgba ḅụngụngụmaye sikima jịnye ofori-ẹ. Mịna sima wa mịẹse wa nyọnị, fọrụ ofuro sinḅịa ịnyanya kịkẹmẹ.

⁷ Tẹkẹ ḅụ pịkịma ị́ damaḅo gbọrịḅọ sọnị ofori-ẹ, ḅarachụa gose ị́ damaḅo gbọrịḅọ sọnị ofori-ẹ. Ị́ mịna ḅụ ị́ ḅụ sikima ḅọị se wa sarakoromasam mịna sima gose.

⁸ Ọkụma ị́rị́ mịna ḍa-ẹ, Nyanaḅọ. Wa aḅaịn sime ọkụ simemẹ, se ị́rị́ pịkị ḅẹlẹ tẹmẹḅọ ḅe sime ọkụ simemẹ. Ị́rị́ wa tẹmẹmẹ,

⁹ anịẹrẹchị ḅarị opuma ịganị wa pịrịma, pịkị mịna sima se ḅiekoroma gbasoma. Mine ị́ya tomoni-ẹ; wa ḍikiḅụgerere.

¹⁰ Osi nyana ị́ya opuamama àrị onwun ele kịkẹsam; Jerusalẹm mị kan gulugulu se nweni koroma so sa nyọ-ẹ,

¹¹ mịna ḅieju-aḍapụma ị́ boma boma osi nyana, iḅi Oputẹkẹwarị mị, fịnị anị dọkịmasam. Mịna ḅụḅẹlẹ-a nyọ mamgba gulugulusam.

¹² Nyanaḅọ, maye mamgba mịẹ sọnị ị́ ḅụ ị́ jike ẹka? Gbọrịye sọ ị́ mịẹ ẹka se wa ḅarị ineda inemaka ḅụ tọrụsiọrị ḅe?