Aịzaya 6 - Kịrịkẹnị Baịbụl

Tamụnọ Ḅe Aịzaya Ḅe Chịnmẹ Ò Ḅo Ịkịankoroḅọ Sọ

¹ Amanyanaḅọ Ọzaya ḅe fị kụra mị ḅie à Nyanaḅọ Ḅe ọrịmẹ. Oria chịẹ gololo emine mị ọgọnọ ọ̀ kpọnjị sime waraḅẹ, oria fịrịnwẹngịapụma Oputẹkẹwarị mị ḅie mgba ini ḅeinmẹ.

² Ḅịarị enjẹlapụ chịẹ ò kelemamẹ, gbọrịḅọ sonio-a pamba, sonio-a pamba nyanamẹ. Gbọrịḅọ mama pamba, mama pamba àrị nwọseni arịa tọrụ gbẹịnmẹ, pịkịna mama pamba se arịa ojuma gbẹịnmẹ, seni ísí mama pamba ma àrị nwọse finmẹ.

³ Àrị nwọseni jịnye jịnye ḅẹaḅẹ: “Fịafịa, fịafịa, fịafịa! Kụrọmamgba Nyanaḅọ Ḅe ọ̀ fịafịamẹ! Oria boma tomonikiri mị ḅie ḅeinmẹ.”

⁴ Arịa pụkọ ḅie fiearị ḅara mị, Oputẹkẹwarị mị chukusẹkẹ-ḍụparị ma jikemẹ, se Oputẹkẹwarị mị na mịnaḅụ na onwoin anịa ḅie ḅeinmẹ.

⁵ À nwọḅẹmẹ, “À mịẹḅịaye ḅarị ofori-ẹ! À fasam, anịatịḅị ị̀ ḅịpị-a pẹkẹrẹ ma ḅie ḅọrọ ọkwẹịn goyegoye siaye-ẹ, à pịkịna sịkịmamgba si ọkwẹịn kọnkọn apụ ḅie angamẹ. Anịẹḅẹsọnị àrị ị̀ tọrụmgbọlụma seni Amanyanaḅọ Kụrọmamgba Nyanaḅọ Ḅe ọrịsam.”

⁶ Anị enjẹlapụma ḅie gbọrịḅọ finkoro ị̀ damaḅoye-ẹ agbamịẹ ẹbẹ mị chukuḅụ anyị-tandaye ọ̀ nwọseni deki kọrịarị anyị na.

⁷ Kọrịarị anyị mị ọ̀ nwọseni ị̀ ḅịpịpẹkẹrẹ ma lama se nwọḅẹmẹ, “Mịn mị ị́ ḅịpịpẹkẹrẹ ma lasam, anị ẹrẹchị mịọkụ ị́ya sima sosam, ini pịkị ị́ya sima ḅụ ḅarasin ị́ pịrịsam.”

⁸ Anịsịkị ḅụ Nyanaḅọ Ḅe ḍukoye à nwọ naamẹ, “À tụḅọ fịrịmaḅe? Tụḅọ mịna okunwẹngịḅọ nwọ sọḅe?” À pẹkẹrẹmẹ, “À munḅịa! Ị̀ se sẹịn!”

⁹ Anị ori ị̀ ḅẹye-ẹ na, à mun mị oku mị ḍuko tomonima pịrị: “Ị́ poki la-ọkụ la-ọkụ sọnị, ị́ kaịnḅo ẹkẹ, ị́ ḍiki la-ọkụ la-ọkụ sọnị, mịẹarịye ị́ nemi ẹkẹ.”

¹⁰ Se ọ̀ nwọseni ị̀ ḅẹmẹ, “Mị-ẹ mịna apụma kuḅie oḅoku, inia ḅeri ma iniki, inia tọrụmgbọlụma pịkị pụn, mịẹsosịkị ini ineda yeọrịka, pịkịna yenaaka anịkanịka ini ineda yekaịnḅo ẹka ọkụ, ọkọpakaka ọkụma ini vinpịkị ị̀ damaḅoḅịa se ini gwọ nyanaḅịa.”

¹¹ À gbelamẹ, “Anị mị ḅara sime mun nde sịkị laḅe, Nyanaḅọ?” Ọ̀ nwọ pẹkẹrẹmẹ, “Ọkịmun opuamama faso sịkị la pịkịna arịa ḅie gbọrịḅọ sọnị oforika sịkị—ọkịmun ama mị na mịnaḅụ na fasosa ama se kpọngọlọma sime sịkịlaḅịa.

¹² Tomonima àrị ini seni ḅọlọnyọ sẹịnḅịa se bebe ama mị seni tomoni angaka nyọ wẹrịḅịa.

¹³ Oyi-apụ ḅụ, gbọrịḅọ ngẹrị ama mị ḅie kọnmẹ ḅẹḅẹ ori sọnị ọ̀ fịḅịa; ini pẹlẹgbinsa kuru-chịn-chuku simeọkụ anị ò simeḅịa ọkụ-ẹ.” (Chuku mị Tamụnọ-a tomonima ḅụ ịwọma sakịarịapụ ḅara ini nwọ sọḅịa.)