Aịzaya 57 - Kịrịkẹnị Baịbụl

Izrẹl Oru Tẹkẹ Mị Ini Ḅẹrẹsikọn Anị Pịrịmẹ

¹ Iḅiye mịẹapụ fịmẹ, gbọrịḅọ sọ ini ḅara-wẹrịma fị ḅara kaịnḅo kẹ anịkanịka abalakẹ. Ọkụma inia fị mị ḅụ ini ḅarị siaye ḅụ ḅụ ọyị nyanakẹ.

² Iḅi ḍumo kọn apụma, fị ḅụ ini dein na ịnyọsara na nyanamẹ.

³ Ọ́ mịanga ḅo ini ḅẹrẹpẹlẹ ọ́ pịrị, ómine simịẹapụma! Ómine iḅitẹịn arịapụ na sẹfịapụ na amanwẹngịapụ na nẹngịkẹ.

⁴ Ọ́ tụḅọ se kpọti-ao? Ọ́ tụḅọ kombo-ao, ómine iruo apụma?

⁵ Ó se osiḅụ wẹrị ejema chukuḅụ anị ómine ọ́mịna fịaye pakụma oru ma tẹkẹtẹkẹ pịkị gboloma gbolomaye-ẹ. Ideri mengi ma na kpeki ḍụparị pokolo ma ḅie anị ómine ọ́mịna awọma se agba mịẹmịẹye-ẹ.

⁶ Ómine arịaḅụ mọnịmọnị ḍụparịma ọkị se oru mịẹse àrị tẹkẹtẹkẹmẹ. Ómine iru sara, pịkị fịayemgbọlụ ọkịḅo agba mịẹ àrị pịrịpịrịmẹ. Ọ́ chịnḅara mịn mị ị̀ ḅieḅẹlẹma?

⁷ Gololo tụndụma ọgọnọ ó mun agba mịẹ pịkị gboloma gbolomamẹ.

⁸ Ọ́mịna warị-a ḅọkọ ma tọrọkọ anị ọ́mịna ḅụngụngụma oru ma se chịẹma koromaye-ẹ. Ómine ị̀ sịkịmẹ, ómine ọ́mịnaḅụ ḅụchụayema sinmẹ, se ómine igbiki se gbẹịn ómine na lekiriapụ ma na, ọ́mịna opu-a mọnọayema kpọlị ini na ḅọlọlọ mọnọmẹ. Anịju ọ́mịna yeḅụoforika mịẹmịẹaye ma mịẹ ọ́mịna pụkọ tanmamẹ.

⁹ Ọ́ kụnụ olo ma na oju fịafịama olo ma na ọmbị so mị ó mun Mọlẹk oru ḅe tẹkẹtẹkẹye-ẹ. Ọ́ tẹkẹḅịa oru nwọ ḍọkị gose, ómine okunwẹngịapụ fịrịma pakụma finjimamẹ, fịapụ tomonikiri na mịnaḅụ-na ó tomoni fịrịma sẹịnmẹ.

¹⁰ Ómine ọ́mịna ḅụ ịnyọfama se jịn-a oru ḍọkịma ḅọrọmẹ anịẹḅẹsọ ịnyọ ọ́ tankẹ. Ọ́ chịnmẹ na ọ́mịna ḅụngụngụma oru ma anị ịnyọ se ọ́ pịrịarịye-ẹ, anịẹrẹchị ịnyọ ọ́mịnaḅụ fa ẹkẹ.

¹¹ Nyanaḅọ Ḅe nwọ ḅẹmẹ, “Nde-a oru ọ́mịna ḅalafama se ómine iruo kọn ị̀ pịrị, pịkị gbọtụma ị̀ sịkị? À ḅọlọ sịkị se yawụma simeye gose, osi se ị̀ pịrịḅụ ọ́ dachịẹ?

¹² Ọ́ mịẹarịye ma iḅiaye-ẹ ọ́ nwọ chịnmẹ, ọkụma ọ́mịna sime ḅara mị, à se sẹ ḍieḅịa, anịsịkị ọ́mịna oru ma àrị ineda ḅarachụa ọ́ pịrị ẹkẹ.

¹³ Ḅarachụa gose ómine owuḅịa sịkị, ye ọ́mịna oru ma ọ́ ḍụaḅọrọma! Fọrụ gbọrị ḅịpị kẹngẹ àrị vukuma sinḅịa! Ọkụma kuḅie se ị̀ ḅụgbana apụma, ama mị ḅie ini angaḅịa ini pịkị ị̀ya Oputẹkẹwarị mị ḅie ị̀ tẹkẹḅịa.”

Tamụnọ Ḅe Ḅarachụa Na Gwọ Na Ḅerenimẹ

¹⁴ Nyanaḅọ Ḅe nwọ ḅẹmẹ, “Ye ị̀ya tomonima pịkịma ị̀ damaḅo. Kikichụaye goyegoye ini sin inia ateli ma ḅụ! Ini ateli mị mịẹ anị karakara!

¹⁵ “Ị̀rị̀ anị gele pịkị fịafịa Tamụnọ ḍumo gbasoḅọ ḅe-ẹ. Gele pịkị fịafịa nyọḅụ àrị angamẹ, ọkụma à pịkị ḅụ iderimapụ na si ḅụ vinpịkị apụ na ḅie angamẹ, mịẹsosịkị ini ị̀ ḅụ nyana kuḅie kụrọ mị na ḅereni mị na àrị ineda nwọ mịẹ ini pịrịḅịa ọkụ.

¹⁶ À ḍumo se ị̀ya tomonima pịrịmẹ, à ḅarị pịkị ini mịẹsiaye ḍuko anịkanịka ịganị nyana ini pịrị gbaso ẹkẹ.

¹⁷ Inia sima na, inia opu ala ḍọkị mịẹmịẹaye ma na gose àrị ịganị nyana ini pịrịmẹ, anịẹrẹchị à fomuḅara se ini pịrị pịkị ini sara koromamẹ. Ọkụma inia tịḅịḅie kụrọmẹ pịkị inia ḅụḅẹlẹ ateli anị ini mun-arịye-ẹ.

¹⁸ “Inia ye mịẹḅara àrị ọrịsam, ọkụma àrị ini gwọḅịa. À tọrọkọ da pịkị ḅarachụa ini pịrịḅịa, à pịkị ḍụẹịn ḍin se kururu arịapụ ma kuḅie kụrọmaḅịa.

¹⁹ À dein ḅereni nweni mgba pịrịmẹ, kpeki nyọ ḅụ na ḅọlọ nyọ ḅụ na! Ị̀ya tomonima àrị ini gwọḅịa.

²⁰ Siye mịẹapụ ma, ịnyọ saraka se tọrụ mengi pekele pekele koro se si-a ịlọlị na ḅụrụaye na deki ḅoarị ambura sime ọkụ ini nwọ simemẹ.

²¹ Siye mịẹapụ ma ini ḍụaḅọrọma nyanakẹ,” Nyanaḅọ Ḅe ọkọ ḅẹmẹ.