Aịzaya 53 - Kịrịkẹnị Baịbụl

¹ Tomonima nwọ pẹkẹrẹmẹ, “Tụḅọ ḅereniḅe mịọkụ wa ḍukoye mị? Tụḅọ mị ye mị ḅie ineda Nyanaḅọ Ḅe ḅarama ọrịḅe?

² Anị Nyanaḅọ Ḅe tọn ọkụ-ẹ na oria fịrịnwẹngịḅọ ḅe samịna kpoinkpoin kiri ḅie ịwọ ịnyanya kuno chụa sẹnị ọkụ sẹnịḅịa. Opu ẹrẹ na iḅi na ọ̀ ḅụ ofori-ẹ wa se ò nemiḅịaye ḅaraḅụ. Tomoni-a tọrụ pịkị ọ̀ ḅụgbanaḅịa gbọrị iḅiye sọnị ọ̀ ḅụ ofori-ẹ, wa jine ò kpekimaḅịa gbọrịye sọ ofori-ẹ.

³ Wa ò ḍikisima pịkị ọ̀ sịkịmẹ; ọ̀ tọrụsiọrị na ḅụakụ na inemamẹ. Tọrụ se ori ọrị ḍọkịḅọ ofori-ẹ— wa ọ̀ sịkịmẹ ò yeḅụ ofori-ẹ nwọḅẹ ḅara.

⁴ “Ọkụma wa la gbẹịn ḅụfụka ma ọ̀ nwọ ọkị se àrị inemamẹ, wa la gbẹịn ḅụakụ na. Anịsịkị mgba wa pa koromaḅẹ na oria tọrụsiọrị mị Tamụnọ ḅara ḅo fomuḅara-ẹ.

⁵ Ọkụma mịna sima gose ye ọ̀ lamẹ, wa mịẹ siaye ma gose ini ò fomumẹ. Ọ̀ da fomuye mị ḅe tọrụsiọrị ḅụ wa gwọsapụ sọmẹ, ọ̀ da ịkpụlụ ma gose gbọrịye sọ mịna ojuma lakẹ.

⁶ Mine mgba fasa anana ọkụ simemẹ, mịna ḅie ḅọḅọ mịna ateli damẹ. Ọkụma Nyanaḅọ Ḅe mịẹse fomuḅara mị ori ọgọnọ gbanamẹ, anị mine re lagbẹịn fomuḅara mị.

⁷ “Ini kụrọma ye se ọ̀ lamamẹ, ọkụma ọ̀ ḅụiderima anị inemamẹ; gbọrị ọkwẹịn mgbọlụ sọ ọ̀ kọnkẹ. Ini ḅaaḅịa anana tọkụ sime ọkụ, pịkị ini ichuka kịrịsinḅịa anana sime ọkụ, ọkụma ò ḅifiekẹ.

⁸ Ini ò kun se ḅẹrẹpẹlẹ ọ̀ pịrịmẹ pịkị ọ̀ da mun fị ḅie chumẹ, paka ọ̀ pịrịḅịaye abala gbọrịḅọ sọ ofori-ẹ. Mịna tomonima mịẹasima gose ini ọ̀ ḅaamẹ.

⁹ Ini ò se siapụma na gbọrị iḍupu anga ḅụ koromamẹ, ini ò se alapụma na gboloma ḍipimẹ, ma ọ̀ gbọrị si sọ mịẹkẹ nwọḅẹ sọnị anịkanịka ori iruo kọnmẹ nwọḅẹye sọ ofori-ẹ.”

¹⁰ Nyanaḅọ Ḅe nwọ ḅẹmẹ, “Anị à tọn ọkụ-ẹ na ọ̀ tọrụsiọrị-ẹ; oria fị mị siḅụ-ḅarasin agba-ẹ. Anịẹrẹchị ori ò furoḅie pakaḅo apụma ọrịḅịa; ọ̀ ḅọlọ-a ḍin nwọ angaḅịa, pịkị ọ̀ ḅụ ḅụ à tọnye mị kiri ọkịḅịa.

¹¹ Tọrụsiọrị ḍumo mị ḅọrọso sịkị, ọ̀ pịkị ḅieḅẹlẹ nyanaḅịa; ò nemiḅịa na ọ̀ papa tọrụsiọrị ọrịkẹ. Ị̀ya iḅi fịrịnwẹngịḅọ, mịnaḅụ ḅereni ị̀ pịrịḅọ ḅe, oria mịẹye ị̀ ḅụ ḅẹlẹḅọ ḅe, tọn apụ da na gbẹịn ḅụfụka ọ̀ nwọ daḅịa à pịkị ò gose siḅụ-ḅarasin ini pịrịḅịa.

¹² Anịẹrẹchị osi nyana nyọ à nwọse ọ̀ pịrịḅịa, anị opu apụ na pịkị kụrọ ḅịpị ḅẹrẹlapụ na sime nyọ-ẹ. Ḅie lokoloko ḅụ ori ò ḍumo mị fama se siapụma tọrụsiọrị ma ḍiamẹ. Tọn-a simịẹapụ kiri ọ̀ nwọ ọkịmẹ, se ọ̀ tẹkẹmẹ mịẹsosịkị ini si ḅụ ḅarasin ini pịrịḅịa ọkụ.”