Aịzaya 5 - Kịrịkẹnị Baịbụl

Aịzaya Ḅe Tamụnọ Iru Mịẹ Chịnmgbọlụ Ozu Ma Gose Nime Chu Mẹ

¹ Ịkịankoro Aịzaya ḅe nwọ ḅẹmẹ: Ó poki à mị nime mị chu ọ́ pịrịarị sịkị, inikio ḅe na oria irumịẹ chịnmgbọlụ ozu mị na nime: Inikio ḅe gbọrị irumịẹ chịnmgbọlụ ozu ọ̀ nwọ nyanamẹ, gbọrị opuma fịaye pakụma chịngị ọgọnọḅụ.

² Ò kiri mị soku seni ḍụparịma tansinmẹ; iḅitẹịn irumịẹ chịnmgbọlụ ọ̀ nwọ ḍipimẹ. Gbọrị sokopi warị ọ̀ nwọ nama mẹ nyọ koruḅọ ḅe gose, tụmgbakị elelenda mengi ma pọnjị pakụmaḅoḅịa olulu ọ̀ nwọ sokumẹ. Ò korumẹ tụmgbakị elelenda ma ḅo kpọ se ḅịa ḅịaḅara, ọkụma tụmgbakị elelenda goyegoye angịmẹ.

³ Anịẹrẹchị mịọkụ inikio ḅe nwọ ḅẹmẹ, “Ómine Jerusalẹm ḅie na Juda ḅie na angapụma, ḅẹrẹkọn ị̀ya irumịẹ chịnmgbọlụ ozu mị na ị̀rị̀ na nwọ pịrị.

⁴ Mịẹ anị pịrị gbẹịnye ḅụ à mịẹ anị pịrịkaye omi? Anịọkụma nde anịgose angị tụmgbakị elelenda nwọ pakụmaḅoye, à tọrụseḍiki iḅi tụmgbakị elelenda ma chụaka ḅara ḅụ?

⁵ “Mịọkụ mịn ị̀ya irumịẹ chịnmgbọlụ ozu mị ḅụ à mịẹ mun-arịye-ẹ: anị kelemaye mamgba à nwọ sinḅịa, anị kikima onu ma à kangbinḅịa, se piri ḅie owoi-a nama àrị fị pịkịna àrị nanga kiri pịrịḅịa.

⁶ À wẹrịso seni ịga na osuein na arịa ḅie pakaḅịa. Ozu mị à ḅarị anị tẹlịma ẹkẹ à pịkị ḅarị anịa ḅie ọgụ seni fịrịnwẹngị ẹkẹ, anịnakaraka àrị anị wẹrịso se ịga na opu osuein na anịa ḅie sẹnị anị gbẹịnḅịa. À soḅuno ma kikiḅịa se ene ḅarị koro anịa ọgọnọ sara ẹkẹ.”

⁷ Izrẹl mị anị Kụrọmamgba Nyanaḅọ Ḅe oria irumịẹ chịnmgbọlụ ozu mị-ẹ; Judapụma anị ò ḍipi ozu mị-ẹ. Ọ̀ tọrụ se ini ḍikimẹ na ini mịẹgbẹịnye nwọ mị-ẹ; ọkụma anịnakaraka nini re mị ini kọn arịye-ẹ. Ò ḅimẹ ini karakaraye mị mị-ẹ, ọkụma ini si seni mịẹarị apụma karakaraye mị gose owupakụmaḅẹ.

Ịkịankoro Aịzaya Ḅe Tomoni Mịẹ Siaye Ma Ḍukosimamẹ

⁸ Yei! Ọ́ fasam! Ọ́ tọn-a warị na ozu na fẹ seni ọ́ nyanasaye ma ḅụ chụamẹ. Ḅọlọ ẹkẹ nweni angaḅịa nyọ ḅarị sime ẹkẹ, se ómine kẹngẹ mị ama mị ḅie angaḅịaye-ẹ.

⁹ Kụrọmamgba Nyanaḅọ Ḅe ḍukoye à nwọ naamẹ, “Ma opu iḅi-a warị mamgba nweni ḅarị arịa ḅie anga ẹkẹ, arịmamgba kanguluguluḅịa.

¹⁰ Opu ozu kirima ḅie ini ḍipi iru-mịẹ-tụmgbakị elelenda ma, iru sisọnọ-a ololo fịnjị kẹngẹ mị àrị pakụmaḅoḅịaye-ẹ. Ini ḅakama fịayemgbọlụ ḍipiḅịa ọkụma kalaye kẹngẹ mị ini nyanaḅịaye-ẹ.”

¹¹ Ọ́ fasam! Ó dedeḅie dedeḅie sịsẹ se sakị iruḅuḅịa, pịkịna saso ḅiri ḅụ iru ọ́mịna tọrụsọ mun ḅọlọsịkị laḅịa.

¹² Ọ́mịna alalị fị-a sịkị ma ḅụ, ọbọ na, ọnwẹnẹ ma ḅụ sime kala akwa ma na, ofurofuroaye na pịkị iru na ọ́ nwọ nyanamẹ. Ọkụma Nyanaḅọ Ḅe mịẹarịye ọ́ kaịnḅokẹ.

¹³ Anịẹrẹchị ikoliapụ dekiso ọkụ ini nwọse ó dekisoḅịa. Ọ́mịna tịḅịnịma ḅuruḅaa ḅie ini sime fịḅịa, anịsịkị papa apụma mengi-pụkọtarịḅụ ini fịḅịa.

¹⁴ Fị mị anị ḅụkarakarama ini pịrịsam. Jerusalẹm opu apụma na pịkịna nyọ fiemafiema papa apụma na anị nwọ mịnịḅịa ẹrẹchị.

¹⁵ Ọrụḅọḅọ ḅụgerereḅịa, ini pịkịna opuaye mịẹapụ mamgba mịẹiderimaḅịa.

¹⁶ Ọkụma Kụrọmamgba Nyanaḅọ Ḅe, oria opu mị ḍiepakụmaḅịa, anị karakaraye mị mịẹḅụ, ọ̀ pịkị oria fịafịa mị ḍieḅelemaḅịa, anị ḅẹrẹkọn oria tomonima pịrị mị ḅụ.

¹⁷ Opuama ma kangulugulu ḅie sime àrị sịkịḅụ, anana awọma àrị osuein fịḅịa, oḅorima pịkịna nama-fịfị-osuein ḍọkị se fịḅịa.

¹⁸ Ọ́ fasam! Ómine ineda ọ́mịna si maḅie finma pakakẹ.

¹⁹ Ọ́ nwọ ḅẹmẹ, “Ye Nyanaḅọ Ḅe ọ̀ mịẹḅịa ọ̀ nwọḅẹye mị ọ̀ sarama nwọ mịẹ se wa anị ọrị. Ye Izrẹl fịafịa Tamụnọ Ḅe ọ̀ tọnye mị mịẹpakụma; se wa ò kuḅie tọnye mị ọrị.”

²⁰ Ọ́ fasam! Ọ́ nwọse siye mị chịnmẹ iḅiye, anịsịkị ómine iḅiye mị chịnmẹ siye. Ọ́ kanakana mị pịkịḅo enekuḅu mịẹmẹ, anịsịkị enekuḅu mị ọ́ nwọ seni kanakana mịẹmẹ. Akụye mị ọ́ nwọse ḅẹlẹye mịẹmẹ, se ḅẹlẹye mị re ọ́ nwọse akụye mịẹmẹ.

²¹ Ọ́ fasam! Ó yenemi pịkị opuma ọbịrịmẹ ọ́ nwọ chịnmẹ.

²² Ọ́ fasam! Iru-ololo ḅu ẹrẹso apụ! Gwa iruḅu sịkị lasa ḅẹḅẹ, kuḅiekụrọ pịkị ḅalafa nyanakapụ!

²³ Ọḅụ fị ḅụ ó si ḅẹrẹ nyanapụ ma ḅụ ḅarasinmẹ anịsịkị ḅẹrẹnemikapụma re mị ó siḅẹrẹkọn pịrịpịrịye-ẹ.

²⁴ Anịẹrẹchị mịọkụ, osirosiroḅa na samịna osuein na fịnị ḅie dọkị ọkụ, ọ́mịna kuno ma ḅụrụḅịa se ịwọ ịnyanya ma àrị samịna se fọrụ àrị ofuro sinḅịa, anịatịḅị Kụrọmamgba Nyana fịafịa Izrẹl Tamụnọ Ḅe se wa telimaye ma ọ́ sịkịmẹ.

²⁵ Nyanaḅọ Ḅe, ori ịganị nyana oria tomonima pịrịsam, ọ̀ pịkịna ọ̀ ḅara ịsụn pakụmasam fomuḅara seni ini pịrịḅịa ẹrẹchị. Tụndụ ma jikeḅịa, anịsịkị fịsapụ ojuma ateli maḅie ḅụrụaye sara sime ọkụ simeḅịa. Anịẹḅẹsọ Nyanaḅọ Ḅe ịganị mị kuluma ẹkẹ, ọkụma ọ̀ ḅara pa ịsụn waraḅẹ fomuḅara seni ini pịrịḅịa ẹrẹchị.

²⁶ Nyanaḅọ Ḅe, ọ̀ ḅọlọju sẹ chịnḅoḅịa elekima nwọ pịrịmẹ. Ori ọfịọn ini pịrịmẹ, sẹkiri mị ḅie kuluma nyọma ḅụ ini ḅo. Ini pịkịna sịkị famaka ḅaraḅụ ḅomẹ!

²⁷ Inia ḅie ịnyọḅụfa gbọrịḅọ sọnị ofori-ẹ, ḅụọ sịnịnịḅọ sọnị ofori-ẹ. Ini sịngịkẹ ini pịkị mọnọkẹ, gbọrị ḅirikunye sọnị fimakẹ, ini chụa akpaka-ḍiki ma sọnị pẹlẹkẹ.

²⁸ Inia ḍẹịn ma oḅumẹ, pịkị inia lubu ma tẹịnḅịa ẹrẹchị ini ḅụkarakaramamẹ. Inia asụnma ḅụọ-akpaka ma ḍụparị kụrọ ọkụ kụrọmẹ, pịkịna inia owuni kporokporo-a ḅụọma ajisaka fọrụ pịkịma pịkịma ḅọrọ ọkụ simemẹ.

²⁹ Owuni ma ekerearị ọkụ anị chịrịḅa namama, nama ḅaa seni deki mun gbọrịḅọ sọnị arịa ḅara namama ọkịso ẹka nyọḅụ koroma seni ekerea ekerea ọkụ anị ini ekerearị ọkụ-ẹ.

³⁰ Anị ene mị ḅolaḅịa sịkị, opu mengi tọrụ ma ḅụ ekerea ọkụ anị ini Izrẹl mị tịḅị ogbo ekereaḅịa ọkụ-ẹ. Mịn sẹ mị ḍiki! Kanakana na kuḅie lọkọ na! Kanakana mịn enekuḅu mị mịnịsam.