Aịzaya 47 - Kịrịkẹnị Baịbụl

Pẹlẹ Babilọn Pịrị Ḅẹrẹ Mị

¹ Nyanaḅọ Ḅe nwọ ḅẹmẹ, “Babilọn, ị́ya emine ọgọnọ koroḅo, kiri ọgọnọ fọn ma ḅie kpọnjị sime. Gbọrị-sịkị ḅụ ma owuḅọ nemika eremeni tọkụ sime ọkụ ị́ nwọ simemẹ, ọmụ ḅie ma ini inumaka opuama, ọkụma ị́ lọkọmẹ, ịnyọ pịkị ị́ ḅụ ofori-ẹ, ị́ ḅarị ọkọ sime ẹkẹ! Mịọkụ ị́ omoniḅọ sọsam!

² Ye gbẹịn ḍụparị mị ọkị! Fịayemgbọlụ ma gbẹịn dẹkịdẹkịma àrị ḅo fọn sọ! Ị́ya tịḅị fịna ḅịtẹ mị sin! Ị́ ḅụ iḅi ḅụchụayema sin! Ị́ya ḅụchụaye mị kporima se ideri mengi mị saḅa!

³ Tomoni ị́ papaḅụsin ọkụ ọrịḅịa; ị́ iderimaḅo la-ọkụ ini nwọ ọrị se ị́ ḅụgerereḅịa. À sowuḅiḅịa, ị̀ dachịẹmaḅịaḅọ pịkị ofori-ẹ.”

⁴ Fịafịa Izrẹl Tamụnọ Ḅe wa fimamẹ— oria ẹrẹ anị Kụrọmamgba Nyanaḅọ.

⁵ Nyanaḅọ Ḅe nwọse Babilọn mị ḅẹmẹ, “Yawụma kanakana ḅie sime; ini ḅarị sẹsẹ ma ḅe eremeni amanyanaḅọ se ị́ chịn ẹkẹ!

⁶ Àrị ịganị nyana ị̀ya tomonima pịrịmẹ; ini ḅarị ị̀ya tomonika ḅara à nwọse ini na angamẹ: Àrị ini se ị́ ḅara dẹrịmẹ, ị́ ḍikitịḅịfoin nyana ini pịrịkẹ olomu apụma sọnị ị́ kụrọḅara se ini na angamẹ.

⁷ Ị́ nwọ chịnmẹ na ị́ eremeni amanyanaḅọ sọ gbasoḅịa, anịẹrẹchị ị́ ḅarị ị́ kuḅie ḅụ yekoromakẹ anịkanịka nde kuluma mị sime ị̀ pịrịḅịa ọkụ nwọḅẹ koroma sọ ị́ kọnkẹ.

⁸ “Mịn mị poki, ị́rị́ tọrụḅẹlẹ ḅẹlẹmaḅọ, ị́rị́ ngịsị ḅara ineda ị́ ḅụ sọẹkẹ nwọ koromarịḅọ ḅe. Ị́ ḅereni ọkịmẹ na Tamụnọ Ḅe opu sọ la-ọkụ anị ị́ la-ọkụ-ẹ— na ị́ sime ọkụ sime jụmḅọ ofori-ẹ. Ị́ chịnmẹ na ngịsị deḅọ fịsa eremeniḅọ ị́ nwọ sọ ẹkẹ anịkanịka ị́ya awọ fịsa koroma kọn ẹkẹ.

⁹ Ọkụma kala sịkị ḅụ, anị gbọrị ene ḅụ, maye mamgba mịẹḅịa. Ị́ ḍirikọrị la-ọkụ la-ọkụ sọnị, ị́ de ḅe na ị́ya awọma na ini ị́ koroma soḅịa.

¹⁰ “Ị́ya sima ḅie ị́ ḅụ ọkịmẹ na ị́ jikeḅịaye ofori-ẹ; ị́ koromamẹ na ị́ ọrịarịḅọ ofori-ẹ. Ị́ya nemi na koroma na ị́ dairimamẹ, ị́ pịkị nwọse ị́ ḅụ ḅẹmẹ, ‘ị̀rị̀ Tamụnọ-ẹ— à sime ọkụ sime jụmḅọ ofori-ẹ.’

¹¹ Kụrọ siye ḅo ị́ laḅịa, ị́ kọrịaḍiri ma ḅụ gbọrịye sọ ineda anị dachịẹma ẹkẹ. Ḅụnemika ḅaraḅụ fị na ama kan galagala na jịn siaye na ị́ ḅụ gbanachịẹḅịa— anị ngịsị ị́ koromaka siaye!

¹² Ị́ya ḍiri ma na agbama na ị́ se àrị ḅirimaye mamgba na karakara ma; ị́ya kalasịkị ngịsị ị́ àrị se fịrịnwẹngịmẹ. Sosi àrị ineda ḅarachụa ị́ pịrịḅịa; sosi ị́ ineda àrị se ị́rị́na-tarakapụ ma ḅalafamaḅịa.

¹³ Ị́ nyanarị tetema mamgba gboloma ịnyọ ị́ ḅụ ofori-ẹ. Ye ị́ nyana lolia ḍikiḍiki apụma àrị fiearịye ma ḍuko ị́ pịrịpịrị apụma ḅo ḅarachụa ị́ pịrị— anị lolia ma ḍawọ ḍin apụma, ini eke eke ḅụ so ma sime ọkụ nemi apụma se ḅo ḅịpị ḅụ akalụ akalụ ḅụ ị́ ḅụ pakaḅịaye mị ḍuko ị́ pịrị.

¹⁴ “Samịnasa ịpịamgba ịnyanya sime ọkụ anị ini simeḅịa ọkụ-ẹ, fịnị pịkị ini dọkịma sinḅịa! Ini ineda iniaḅụma ḍụa ẹkẹ— fịnị ḅẹlẹ mị opuma iniaḅụ ọfịrịḅịa, ini temi iniaḅụ ọfịrịmaḅịa fịnịkẹ.

¹⁵ Ma anị ini se ị́ mịẹḅịa iḅi ye-ẹ— anị lolia ḍawọ ḍin se ị́ mun ị́ya ḍumo ene mamgba ḅụ yese gbelagbelapụ ma. Ini ị́ se gbinkoroma se so ini daḅịa nyọ daḅịa, inia ḅie gbọrịḅọ sọ sime ị́ ḍụa ẹkẹ.”