Aịzaya 46 - Kịrịkẹnị Baịbụl

¹ “Mịn anị Babilọn oru ma ḅe kuluma-ẹ! Gbọrị sịkị ḅụ ini Bẹl na Nebo na tẹkẹtẹkẹ mẹ, ọkụma mịọkụ ye pụra asụn àrị pụra se so sam, anị fịrịnwẹngị ḅụ ịnyọ fasa namama.

² Ini ḅara se kara ḍumo nyanakaye ma àrị ineda arịaḅụ ḍụakẹ; ini kụrọ ḅaraḅụ owuḅie àrị deki somẹ. Mịn anị Babilọn oru ma ḅe kuluma mị-ẹ!

³ “Ómine ị̀ poki, Jekọb furoḅie awọ, ị̀ya tomonima ḅie kọn apụ mamgba. Ini ó yi sịkị ngịsị à tọrụse ọ́mịna ḅụ wẹrịmẹ.

⁴ Ị̀rị̀ ọ́mịna Tamụnọ-ẹ à tọrụse ọ́mịna ḅụ wẹrịḅịa ọkịmun ómine olomu se iḅulu ọ́mịna tịḅị ma ḅụ pakasịkị laḅịa. Ị̀rị̀ ọ́ tẹmẹmẹ, ị̀ tọrụ pịkị ọ́mịna ḅụ so ẹkẹ; à ḅarachụa ọ́ pịrị pịkị ọ́ ḍụaḅịa.

⁵ “Ómine ị̀ se tụḅọ na otomaḅe?” Nyanaḅọ Ḅe ọkọ ḅẹmẹ. “À sime ọkụ sime jụmḅọ omi?

⁶ Tomoni inia igbiki koko akpa ma finji se goli sara pakụmamẹ; ini seleḅa ma se yetọn ayema ọgọnọ arịa iku la-ọkụ nemimẹ. Ini goli fịrịnwẹngị ḍinḅọ ọkọ se ò goli ma se oru tẹmẹmẹ; anịsịkị ini tịḅịtu anị tẹkẹmẹ.

⁷ Inia aba ḅụ ini anị pụramẹ; ini anị se gbọrị angaḅụ chịẹma koromamẹ, anị ineda nwẹngị ẹkẹ anị sime angaḅụ. Anị ineda anị tẹkẹḅọ pẹkẹrẹ ẹkẹ pịkị nụḅọ fa àrị sịkịḅụ sọ.

⁸ “Ọ́ mịn mị se ḅiekoroma ómine simịẹ apụma; à mịẹsaye ọ́ nwọse ḅiekoroma.

⁹ Ḅọlọsa sịkị ngịsị pakaḅịaye à se ó ḅiekoromamẹ; ó nemi ma Ị̀rị̀ kẹngẹ anị Tamụnọ-ẹ pịkị à sime ọkụ sime jụmḅọ ofori-ẹ.

¹⁰ Sakị sịkị ngịsị pakaḅịaye à nwọ ḍuko pakụma pakụmamẹ; ḅọlọsa sịkị ngịsị tọrọkọju pakaḅịaye à nwọ ḍuko ḍukomẹ. À ḍukomẹ na à tọnsaye ma àrị gbakị ẹkẹ, à mịẹ ḍọkịye goyegoye àrị anị mịẹḅịa.

¹¹ Ịrụapakapaka nyọ ḅụ gbọrịḅọ à nwọ chịnḅoaḅẹ; ikule giririma tu-koro-ọkụ ọ̀ nwọse koro se à tọn ayema mịẹpakụmaḅịa. À ḍukosam, anị pịkị mịẹḅịa.

¹² “Ómine ị̀ poki, ómine tịḅịḅie kụrọ-a tomoni ó koromamẹ na ọmụḅaraiḅi mị sasamẹ.

¹³ Ọmụḅaraiḅi ene mị à nwọ ọkịḅo kpekimaḅẹ— anị sasakẹ ngịsị. Ị̀ya ọmụḅaraiḅi mị dachịẹmaḅịaye ofori-ẹ. À Jerusalẹm mị ḍụaḅịa se osi ọkịḅo Izrẹl mị pịrịḅịa anịnyọ ḅụ.”