Aịzaya 45 - Kịrịkẹnị Baịbụl

Nyanaḅọ Ḅe Saịrọs Ḅe Tọnmẹ

¹ Nyanaḅọ Ḅe ọ̀ Saịrọs ḅe sẹlẹ ọkịsam na ò ḅo amanyanaḅọ sọ-ẹ. Ọ̀ tọn ọ̀ pịrịsam na ọ̀ sẹsẹ inumaḅịa ọmụḅaraiḅi ḅụ; ori ọ̀ fịrịmamẹ na ò mun amanyanapụma ḅara inia kụrọ ma ọkị; Nyanaḅọ Ḅe opuamama ḅe onu ḅọkọ ma ò finji ọ̀ pịrịḅịa. Nyanaḅọ Ḅe nwọ ḍuko Saịrọs ḅe pịrịmẹ,

² “Ị̀rị̀ ḅarana ateli mị karakarama ị́ pịrịḅịa, tụndụma na chịngịma na ḅaa kiri pịrịḅụ. Onu ma ḅụ sime alapẹlẹka ḅọkọ ma à kanḅịa, à pịkị ini se arịa ḅụ mgbẹsẹ ikulele ma anyịmaḅịa.

³ Kanakana se ḅọị-a nyọma ḅie ḅụ sime ngọma à se ị́ pịrịḅịa; anịsịkị ị́ nemiḅịa na, Ị̀rị̀ anị Nyanaḅọ Ḅe-ẹ, pịkị Izrẹl Tamụnọ Ḅe anị ị́ ẹrẹ ḅụ wẹrị ị́ chịnye-ẹ.

⁴ Àrị ị́ tọnmẹ na ị́ ḅo ḅarachụa ị̀ya fịrịnwẹngịḅọ Izrẹl ḅe pịrị, anị ị̀ya tomoni à sẹlẹ ọkịsapụ ma. Àrị opu osi se ị́ pịrịsam, ị́ ị̀ nemikẹ nwọḅẹsọ.

⁵ “Ị̀rị̀ anị Nyanaḅọ Ḅe-ẹ; jịn oru ofori-ẹ ị̀ sikima ọkụma. Ị́ ḅi ịnyọ mị à se ị́ pịrịḅịa, ị́ ị̀ nemikẹ nwọḅẹsọ.

⁶ À mịn mị mịẹmẹ mịẹsosịkị sẹkiri mị ḅie gbọrị ịkọlị ḅụ ọkịmun ísí ịkọlị la nemiḅịa na Ị̀rị̀ anị Nyanaḅọ Ḅe-ẹ, jịn oru pịkị ngịsị ofori-ẹ ị̀ sikima ọkụma.

⁷ Ị̀rị̀ enekuḅu na kanakana na tẹmẹmẹ; à ḅẹlẹma na fa na se ḅomẹ. Ị̀rị̀, Nyanaḅọ Ḅe, maye mamgba mịẹmẹ.

⁸ Ene koro ọkụ à nwọse ọmụḅaraiḅi se sotọrụ ḅụ sẹịnḅịa; sẹkiri mị finji anị da ọkịḅịa se omoni sọ jụmḅọ pịrịka na karakaraye mịẹ na ḅẹlẹma na ḅịapakaḅịa. Ị̀rị̀, Nyanaḅọ Ḅe, à mịẹḅịa mịn mị kiri ọkị.”

Nyanaḅọ Ḅe Tẹmẹḅọ-ẹ Pịkị Ḅọlọsịkị Ngịsị-a Ḅẹrẹ Nemiḅọ-ẹ

⁹ Aḅaịn ḅẹlẹ ineda anị tẹmẹḅọ na ḅẹrẹ nụnụaḅe, ísí-a ḅẹlẹ mamgba sime ọkụ sime ḅẹlẹ mị? Aḅaịn mị anị ineda ḅẹlẹtẹmẹḅọ ḅe gbelaḅe na ò che mịẹ-ao? Ḅẹlẹ mị anị ineda ḅẹrẹ suaḅe, na anị tẹmẹḅọ ḅe ọ̀ fịrị nemika-ẹ?

¹⁰ Tụḅọ gbọrịḅọ ineda nụḅọ yi nyengiḅọ na ḍaḅọ na ḅẹḅịa na, “Cheye gose ọ́ mị ḅara se ị̀ mịẹ?”

¹¹ Nyanaḅọ, fịafịa Izrẹl Tamụnọ Ḅe, tọrọkọju mịẹḅịaye ma tọnḅọ ḅe nwọḅẹmẹ: “Ị́ ḅịpị nyanakẹ ị̀ya awọma ḅụ ḅẹrẹ se ị̀ gbela anịkanịka à mịẹḅịaye ḍuko ị̀ pịrị!

¹² Ị̀rị̀ anị sẹkiri mị tẹmẹḅọ ḅe-ẹ à pịkị anịa ḅie angaḅịa tomoni tẹmẹmẹ. Ị̀ya kụrọ ḅụ à so ma finjimamẹ; à ḅẹrẹtọn ịrụa na, akalụ na, pịkị lolia ma na pịrịmẹ.

¹³ Ị̀rị̀ ḅarana Saịrọs ḅe chukurumamẹ na ọ̀ sakị fịrịnwẹngị à tọn ayema mịẹḅeinma pịkị yema mịẹ karakarama gose. Ọ̀ ḅọrọḅịa ateli goyegoye à tẹlịma gbụkụkụmaḅịa. Ò kpoto ị̀ya opuama, Jerusalẹm mị namaḅịa, ọ̀ pịkị kunḅaraḅie ị̀ya tomonima pakụmaḅoḅịa. Mịn mị mịẹ gose ori ọkọ anịkanịka ori na ọḅụfị gbọrịḅọ sọ ofori-ẹ.” Kụrọmamgba Nyanaḅọ Ḅe ọkọ ḅẹmẹ.

¹⁴ Nyanaḅọ Ḅe nwọse Izrẹl mị ḅẹmẹ, “Ijipt na Itiopia na nyana ngọma sime ị́ pịrịḅịa, anịsịkị nangwọ nangwọ Siba owuapụma ini ị́ya omoniapụ sọḅịa; ini se ini ịkasị ikoli ma na ini ị́ ḍukoḅịa. Ini tịḅịtu ị́ pịrị se ḍuko pakụmaḅịa na, ‘Tamụnọ ị́rị́ na omi-ẹ—ori kẹngẹ anị Tamụnọ-ẹ.

¹⁵ Oria tomonima ḍụaḍụa, Izrẹl Tamụnọ Ḅe, anị ḅụḅọị Tamụnọ-ẹ.

¹⁶ Ini nwọ ḅarase ye kara se tẹkẹ àrị apụ mamgba inia ḅụgerereḅịa; ini pịkị ini mgba mịẹse ini tọrụtu ḅịa ḅụgerere ḅụ na ḅịpịogbosọka ḅụ na.

¹⁷ Ọkụma Nyanaḅọ Ḅe Izrẹl mị ḍụamẹ, anịa ọmụḅaraiḅi mị pịkị sime gbasoḅịa; anịa tomonima ini pịkị ngịsị ḅụgerere ḅụ tọrụ tu ẹkẹ.’”

¹⁸ Nyanaḅọ Ḅe so ma tẹmẹmẹ— ori anị Tamụnọ Ḅe-ẹ! Ori sẹkiri mị tẹmẹmẹ— ori anị mịẹmẹ, anị pịkị sime gbasomẹ. Ori anị se fasa ama ḅaraḅụ sarakoromakẹ, ọkụma tomoni angaḅịa nyọ ḅaraḅụ-ẹ. Ori anị ọkọ ḅẹye-ẹ na, “Ị̀rị̀ anị Nyanaḅọ Ḅe-ẹ, jịn oru pịkị ofori-ẹ ị̀ sikima ọkụma.

¹⁹ À ḅọịma ọkwẹịn-ọkwẹịnkẹ anịkanịka à tọn se à mịẹḅịaye ma à ḅọịḅọịkẹ. À ḅi ẹkẹ ị̀ya tomoni Izrẹlapụma fasa nyọ ḅụ ị̀ ḍọkị. Ị̀rị̀ anị Nyanaḅọ Ḅe-ẹ, à pịkị karakaraye mị ḍuko ḍukomẹ; Karakaraye mị à nwọ mịẹpakụmapakụmamẹ.”

Tomonikiri Mị Nyanaḅọ Ḅe Na Babilọn Oru Ma Na

²⁰ Nyanaḅọ Ḅe nwọ ḅẹmẹ, “Sẹsẹ ma ḅie tomoni mamgba ò ḅo koḅirima; sẹma ḅie fị kọnmapụ ma; ómine ọ́mịna ḅụ pakụma se kpekima ḅo! Anị ini ḅara se kara ḍumo nyanaka yema se igiria mangịarị apụma ineda ini ḍụaka oru ma tẹkẹ àrị apụ ma— iniapụ ma ngịsị gbọrịye sọ ini nemikẹ!

²¹ Ó ḅo ḅẹrẹkọn warị ḅie ọ́mịna ḅẹrẹ ma ḍuko pakụma; ye inia ḅụ ma ḍụaḅịa apụma jụmḅọ jụmḅọ na ḅẹrẹḅia. Tụḅọ ḅọlọsa sịkị ngịsị tọrọkọju pakaḅịaye ma ḍukopakụma? Ị̀rị̀, Nyanaḅọ Ḅe ị̀rị̀ka, oria tomonima ḍụaḍụaḅọ ḅe? Jịn oru ofori-ẹ, ị̀ sikima ọkụma.

²² “Ó vinpịkị ị̀ damaḅo se ḍụaḅọrọma nyana, bebe tomonikiri ḅie apụ mamgba! Ị̀rị̀ kẹngẹ anị Tamụnọ Ḅe-ẹ jịn oru ofori-ẹ, ị̀ sikima ọkụma.

²³ Ị̀ya ẹrẹ ḅụ à ḅereni ye mị karakaraye, anị pịkị ḍinma ẹkẹ. Àrị osi ḅaraḅụ sime ḅara mgba nwọse yeḅerenimẹ: Tomoniḅọ goyegoye ḅo ị̀ tọrọkọ kpẹrẹkịḅịa pịkị yeḅereniḅịa na nụḅọ karakaraye ḅụ ị̀ ḅereniḅịa.

²⁴ “Ini ḅẹḅịa na ị̀ ḅụ kẹngẹ anị ini ọmụḅaraiḅi na ịnyọ na nyanaḅoḅịaye-ẹ; ọkụma taraka se ị̀ wẹrịmapụ mamgba ḅụgerere inia tọrụ sọḅịa.

²⁵ Ị̀rị̀, Nyanaḅọ Ḅe, à Jekọb furoḅie awọ mamgba ḍụaḅịa, se ini pịkị ị̀ bomaḅịa.