Aịzaya 43 - Kịrịkẹnị Baịbụl

Tamụnọ Ḅe Ḅerenimẹ Na Ori Oria Tomoni Ma Ḍụaḅịa

¹ Izrẹl, Nyanaḅọ ị́ tẹmẹḅọ ḅe nwọ ḅẹmẹ, “Ḅalafama—àrị ị́ ḍụaḅịa. Àrị ẹrẹ se ị́ chịnsam—ị́ sime ị̀ pịrịmẹ.

² Gbun mengi ḅie ị́ ḅọrọḅịa sịkị, àrị ị́rị́ na simeḅịa; ị́ya ḅụfụka ma àrị ị́ nẹngịma ẹkẹ. Ị́ fịnị ḅie ḅọrọmẹ ḅẹḅẹ, fịnị ị́ dọkịma ẹkẹ; kụrọtẹịn telima ma se ị́ mịẹḅịaye ofori-ẹ.

³ Anịatịḅị ị̀rị̀ anị ị́ Nyana Tamụnọ Ḅe-ẹ, ị́ ḍụaḍụa fịafịa Izrẹl Tamụnọ Ḅe. Àrị Ijipt mị wẹrịsoḅịa mịẹsosịkị ị́ omoni sọ ḅụ pọkọḅịa; À Sudan na Siba na se anị ḍinma ị́ pịrịḅịa.

⁴ Ị́ ḍumo ḍụa gose sẹma à àrị wẹrịsoḅịa, anịatịḅị ị́ ị̀ ḅụ yelamẹ àrị ị́ ḅẹlẹma pịkị kụn nyana ị́ pịrịmẹ.

⁵ Ḅalafama—àrị ị́rị́ na omi-ẹ! “Sasaju ịrụapakapaka nyọ ḅụ mun ḅọlọtẹịn ịrụasọsọ nyọ mị la àrị ị́ya tomonima ọkị ama ḅoḅịa.

⁶ À ḍuko ọgọnọju mị pịrịḅịa ini ini wẹrịso ini so chukuju mị ḅarị pịkị ini ọlọ ọḅụdama. Ye ị̀ya tomonima ḅọlọju amama ḅie ḅụ pịkịmaḅo, sẹkiri ḅie pẹkẹrẹ pẹkẹrẹ ma ḅụ.

⁷ Ini ma ị̀ya tomoni-ẹ, àrị ini tẹmẹmẹ boma ọkịḅo ị̀ pịrịḅịa ẹrẹchị.”

Izrẹl Anị Nyanaḅọ Ḅe Onyechịẹḅọ-ẹ

⁸ Tamụnọ Ḅe nwọ ḅẹmẹ, “Ị̀ya tomonima fịrịma ḅẹrẹkọn warị sẹịn. Ini tọrụmgbọlụ nyanamẹ, ọkụma inia tọrụmgbọlụma pụnmẹ; ini ḅeri nyanamẹ, ọkụma àrị inikimẹ!

⁹ Sẹ ma koḅiri ḅẹrẹkọn nyọ mị ḅo. Inia oru ma ḅie nde oru ineda tọrọkọju pakaḅịaye ḍukoḅe? Àrịa ḅie nde oru mịọkụ pakarịye ḍukoḅe? Ye oru ma onyechịẹ apụma sọḅo se ḍukopakụma na ini karakaramẹ, se inia karakara ọkwẹịn mị ḍukopakụma.

¹⁰ “Izrẹlapụ, ómine ị̀ya onyechịẹ apụ-ẹ; àrị ọ́ sẹlẹ ọkịmẹ ómine ị̀ya fịrịnwẹngịapụ sọḅịa ẹrẹchị, mịẹsosịkị ómine ị̀ nemi pịkị ị̀ ḅụ ḅereni nyanaḅịa ọkụ pịkị kaịnḅo na Ị̀rị̀ ngẹrị anị Tamụnọ-ẹ. Ị̀rị̀ sikima jịn oru ofori-ẹ; ngịsị ma pakaḅokẹ pịkị ngịsị paka ẹkẹ.

¹¹ “Ị̀rị̀ ngẹrị ngẹrị anị Nyanaḅọ Ḅe-ẹ, ngẹrị ineda ọ́ ḍụaḅịa ḅọ ḅe-ẹ.

¹² Mịẹḅịaye à nwọ ḍukomẹ, se à ḅo ḅarachụa ọ́ pịrịmẹ. Jịn sẹ oru ma jịn ene ḅụ ọkọ simeye mịẹkẹ; ómine ị̀ya onyechịẹ apụ-ẹ.

¹³ Ị̀rị̀ Tamụnọ-ẹ à pịkị Tamụnọ sọ gbasoḅịa. Ị̀ya kụrọ ḅie pọkọsoḅịaḅọ ofori-ẹ; ị̀rị̀ mịẹsaye ineda anị ḍinmaḅịaḅọ ofori-ẹ.”

Babilọn Ḅie Ọ́ Mangịso

¹⁴ Izrẹl fịafịa Tamụnọ, Nyanaḅọ ọ́ ḍụaḍụaḅọ ḅe, nwọ ḅẹmẹ, “ómine ḍụa gose, àrị owuni se Babilọn sẹịnḅịa; opuama mị ḅe onu ḅọkọ ma à kanḅịa, se anịa tomonima ḅe ḅieḅẹlẹ oloku ma pịkịḅo owutịḅị ḅie oloku mịẹḅịa.

¹⁵ Ị̀rị̀ Nyanaḅọ, ọ́mịna fịafịa Tamụnọ Ḅe-ẹ. Izrẹl, ị̀rị̀ ị́ tẹmẹmẹ, ị̀rị̀ pịkị ị́ya amanyanaḅọ-ẹ.”

¹⁶ Ḅọrọsa kụra ma ḅie Nyanaḅọ Ḅe tọrụ mị ọgọnọ ori ateli mịẹmẹ, seri, owoi, fịnyọ mengi mị ḅie ori ateli mịẹ ḅọrọmẹ.

¹⁷ Ọ̀ kụrọ owuni ọkịpakụmaḅo se ini da mun faḅie chumẹ, kporokporo owuni arụ ma na asụnma na. Ini ḅịkị se ḅarị ngịsị sịsẹkẹ, tọnjie fịnị ḅẹlẹ ofuro binma ọkụ ini binmẹ!

¹⁸ Ọkụma Nyanaḅọ Ḅe nwọ ḅẹmẹ, “Pakaḅọrọsaye ma ḅụ ọ́ ḅụ se gbolomama ọ́ pịkị ḅụ se olomu sịkị-a mịẹmịẹaye ḅụ chuma.

¹⁹ À mịẹḅịa ịwọye mị ọ́ nwọ ḍiki. Ye mị mịẹ-aḅẹ—ómine ineda anị ọrịḅịa mịọkụ! Onwun ele mị ḅie àrị ateli mịẹ tolumaḅịa à pịkị ideri mengi pakụma ọ́ pịrịḅịa piri ele mị ḅie.

²⁰ Piri namama sọ ị̀ osiḅịa; piri obirima na ọjụ-feni ma na àrị ị̀ bomaḅịa onwun ele mị ḅie na piri ele ḅie na mengi ideriḅịa mịẹsosịkị à sẹlẹ ọkịsapụ ma mengi nyanaḅịa ọkụ.

²¹ Ini anị à mịẹ ị̀ ḅụ pịrị apụ-ẹ ini ị̀ bomaḅịa!”

Izrẹl Mị Mịẹ si

²² Nyanaḅọ Ḅe nwọ ḅẹmẹ, “Izrẹl, ọkụma ị̀ ḅụ ḅụ ịnyọ ị́ tansam; ị́ ị̀ tẹkẹkẹ.

²³ Ị́ dọkịma anana agbama ị́ se ḅo ị̀ pịrịkẹ; ị́ya agbama ị́ se ị̀ osikẹ. Agba mịẹ ḍiepịrịaye gose àrị ị́ ḅụfụkamakẹ anịkanịka ị́ ḅara insẹnsị ḅi ị́ ḅụfụkamakẹ.

²⁴ Ị́ insẹnsị fẹ ị̀ pịrịkẹ anịkanịka nama ḅẹlẹkị se ị̀ ḅieḅẹlẹmakẹ. Anịnakaraka ị́ya sima re ị́ nwọse ị̀ ḅụḅalaḅalamamẹ; ị́ mịẹirimaye ma ị̀ ḅụ ịnyọ famamẹ.

²⁵ Anịẹḅẹsọ, Ị̀rị̀ anị ị́ya sima ḅụ ḅarasin ị́ pịrịarị Tamụnọ Ḅe-ẹ, à mịn mị mịẹmẹ Ị̀rị̀-ẹ nwọḅẹye gose. À si kịẹn ị́ pịrị ẹkẹ.

²⁶ “Ye wa ḅẹrẹkọn warị mun; se ị́ se pụnụmaye mị ḍuko! Ị́ya ḅẹrẹ mị ḍuko se ḍiepakụma na ḅẹrẹ ị́ ḅara si kẹ!

²⁷ Ị́ya olomu-aḍapụma ini si mịẹmẹ; ị́ya tịḅịnịma ini ị̀ ḅụ si mịẹmẹ,

²⁸ ḅẹrẹtọn ọ́ pịrịarị apụma osi se ị̀ya Oputẹkẹwarị mị pịrịkẹ. Anịẹrẹchị à fa ọkịḅo Izrẹl mị pịrịmẹ; àrị ị̀ya tomonima se wọlọ ḅie chumẹ.”