Aịzaya 41 - Kịrịkẹnị Baịbụl

Tamụnọ Ḅe Ḅereni Kụrọma Izrẹl Mị Pịrịye

¹ Tamụnọ Ḅe nwọ ḅẹmẹ, “Ọ́ yawụma sime se ị̀ poki, ómine ḅọlọju amama! Ómine ọ́mịna ḅụ karakarama se ọ́mịna ḅẹrẹ ma se ḅẹrẹkọn warị mun; ómine ọkwẹịnḅịa sịkị nyanaḅịa. Ó ye wa kpokponima se karakaraye mịẹḅọ mị nemi.

² “Sịkịmamgba ọmụḅaraiḅiarịḅọ ḅe tụḅọ ịrụapakapaka nyọ ḅụ ori ọkịḅo, pịkị ọ̀ mịẹse ò munyọ munyọ ḅụ ọmụ ḅara iḅiḅọ ọ̀ nwọsọ? Tụḅọ kụrọ se ọ̀ pịrị ò se amanyanapụ na sẹma na inuma? Oria okola-agiji mị fọn gbogbo kọsịma ọkụ nwọse ini gbogbo kọsịmamẹ. Oria ḍẹịn mị ini galagalama ḅara fọrụ osirosiroḅa galagalama ọkụ simemẹ.

³ Ori ini ḍukoma mun mẹ ịnyọ ọ̀ ḅụ fakaḅaraḅụ, ọ̀ mangịarị ḅara mị ọ̀ ḅụọma kiri laka ọkụ simemẹ!

⁴ Tụḅọ mịẹse mịn mị kiri ọkị? Olomusịkị ḅụ mịẹaye na pakaye na tụḅọ nemi? Ị̀rị̀, Nyanaḅọ Ḅe, sakị mị ngịsị àrị omi-ẹ, kuluma mị ḅụ, Ị̀rị̀, Nyanaḅọ Ḅe, à pịkị simeḅịa.

⁵ “Sasaju amama ḅie angapụma à mịẹye ini nwọ ọrịsam; inia ḅụgbiripumẹ se ḅalafa ḅụ inia ḅụgeregeremẹ. Anịẹrẹchị ini mgba ini koḅirima se ḅomẹ.

⁶ Ḅara fịrịnwẹngịapụma ini ḅarachụa jụmḅọ jụmḅọ pịrị pịkị jụmḅọ jụmḅọ kuḅie kụrọmamẹ.

⁷ Akanịḅọ ḅe nwọse goli mịẹḅọ ḅe ḅẹmẹ, ‘Ị́ mịẹsam!’ Ḅara se chịn mị kara se anịḅo mọnịmọnịḅọ ḅe churu se ọ̀ kara chịn mị ḅakụ gbolomaḅọ ḅe kuḅie kụrọmamẹ. Ini nwọ ḅẹmẹ, ‘Wa sanị oḅolomaye ma iḅimẹ’— anịsịkị iniḅo ini ḅara se kara tẹkẹarịye mị simeḅịa nyọ ḅụ churu se anị ḅakụ oḅolomamẹ.

⁸ “Ọkụma ị́rị́, Izrẹl ị̀ya fịrịnwẹngịḅọ, ómine mị à sẹlẹ ọkịsapụma-ẹ, inikio Ebraham ḅe furoḅie apụ.

⁹ Sẹkiri mị ḅe kuluma ịkọlị ma ḅụ àrị ómine ọkị pakụmaḅomẹ; anịa ḅie ḅọlọtẹịn ịkọlị ma ḅụ àrị ómine chịn se nwọse ọ́ ḅẹmẹ, ‘Ómine anị ị̀ya fịrịnwẹngịapụ-ẹ.’ Àrị ọ́ sịkịkẹ, ọkụma àrị ọ́ sẹlẹ ọkịmẹ.

¹⁰ Ọ́ ḅalafa nyanama—àrị ómine na omi-ẹ! Ị̀rị̀ ọ́mịna Tamụnọ-ẹ—ọ́ ḅalafa nyana gbọrịye sọ pịrịma! Àrị ọ́ mịẹkụrọmaḅịa, à pịkị ḅarachụa ọ́ pịrịḅịa; À tịḅịkikima nyọ sọ ọ́ pịrịḅịa, à pịkị ọ́ ḍụapakụmaḅịa.

¹¹ “Ómine ḍikiḅụnwọnwọ apụma ọmụḅarasi ḅe ḅụgerere ini nwọ nemiḅịa. Ómine na ọmụgbin-arịapụ ma ini fịḅịa

¹² sẹkiri ḅie ini pịkị fasinḅịa.

¹³ Ị̀rị̀ Nyanaḅọ ọ́mịna Tamụnọ Ḅe-ẹ; àrị ọ́ mịẹkụrọma se ḍuko ọ́ pịrịaḅẹ na, ‘Ọ́ ḅalafama; à ḅarachụa ọ́ pịrịḅịa.’ ”

¹⁴ Nyanaḅọ Ḅe nwọ ḅẹmẹ, “Boka pịkị ịnyọ ḅụ ofori, Izrẹl, ḅalafama; à ḅarachụa ọ́ pịrịḅịa. Ị̀rị̀, Izrẹl fịafịa Tamụnọ Ḅe, ị̀rị̀ mị ọ́ ḍụaḍụaḅọ ḅe-ẹ.

¹⁵ Àrị ọ́ mịẹḅịa ómine oḅu pịkị ịwọ ịpịamgba gbẹịnye sime ọkụ simeḅịa. Ọ́ tụndụ gbẹịn kọsịmaḅịa; chịngịma àrị dẹkịdẹkị fọn sọḅịa.

¹⁶ Ómine àrịse fọrụ ḅie gbinḅịa; fọrụ mị pịkị àrị deki soḅịa, se irisi mị pịkị àrị galagalamaḅịa. Anịsịkị ọ́mịna ḅieḅẹlẹḅịa anịatịḅị Ị̀rị̀ ọ́mịna Tamụnọ-ẹ; ómine ị̀ bomaḅịa, fịafịa Izrẹl Tamụnọ Ḅe.

¹⁷ “Mengi ị̀ya tomonima ḅụḅalaḅalama sịkị, mengi gose inia pụkọ samịna sịkị, anịsịkị mị Ị̀rị̀, Nyanaḅọ Ḅe inia tẹkẹ naaḅịa; Ị̀rị̀, Izrẹl Tamụnọ Ḅe ngịsị àrị iniaḅụ ḅarasin ẹkẹ.

¹⁸ À mịẹḅịa samịna chịngịma ḅie mengi ideriḅịa pịkị pẹsịkiri ma ḅie mengi seri ḅọrọḅịa. À mịẹḅịa onwun ele mị pịkị ḅo mengi ḍapa sọḅịa se samịna kpakịkị kiri mị pịkị ḅo mengi ideri àrị nyọ sọḅịa.

¹⁹ À mịẹḅịa onwun ele ḅie awụ chịn sẹnịḅịa, akasia chịn na matẹls chịn na pịkị oliv ejema na. Piri samịna kirima ḅụ pakaḅịa, paịn chịn na junipa chịn na pịkị saịprẹs chịnma na.

²⁰ Tomoni mịn mị ọrị se nemiḅịa na Ị̀rị̀, Nyanaḅọ Ḅe anị mịẹmẹ. Iniḅo kaịnḅo ḅịa na Ị̀rị̀ fịafịa Izrẹl Tamụnọ Ḅe mịẹse anị ḅo nwọ pakamẹ.”

Nyanaḅọ Ḅe Iruo-a Tamụnọ Ma Na Ḅẹrẹpikiamẹ

²¹ Nyanaḅọ, Izrẹl amanyanaḅọ ḅe, mị ò ḍukoye-ẹ: “Ómine ọ́mịna ḅẹrẹ ma se ḅo ómine sẹsẹ ma ḅe-a oru ma. Ḅẹrẹ nụnụa gose ọ́ nyana kụrọtẹịn ayema ọ́ nwọse ḅo!

²² Ọ́ mịanga ḅo se tọrọkọju pakaḅịaye mị ọ́ nwọ ḍuko, mịẹso sịkị wa nemiḅịa ọkụ anịḅo mịẹḅịa sịkị. Paka ḅọrọsaye ma ọ́ nwọ ḍuko ḅelema ḅẹrẹkọn warị mị pịrị, àrị fiearịye ọ́ pịkị nwọ ḍuko wa pịrị.

²³ Tọrọkọju ḅoarị enema nyana mịẹḅịaye ḍuko wa pịrị— anịsịkị re mị wa nemiḅịaye-ẹ na ómine sọ tamụnọ-ẹ! Tụkụma iḅiye anịkanịka ḅalafama, ḅụgbiripuma ḅara ḅụ pakaḅịaye ọ́ nwọ mịẹ; wa ó ḍikiḅalafa pịkị ómine osiḅịaye ọ́ nwọse mịna ḅie ḅeinma wa ọrị!

²⁴ Ómine na ọ́ mịẹarịye mamgba na papaye-ẹ; ómine tẹkẹarịapụ ma ḅụngụngụmapụ-ẹ!

²⁵ “Ịrụapakapaka nyọ ḅụ anga gbọrịḅọ à nwọ sẹlẹ ọkịsam; àrị ori ọkịḅoḅịa, se ọgọnọju ḅụ ọ̀ wẹrị owu se ọ́ pakaḅịa. Aḅaịn nanga ọkụ ọ̀ nwọse tịḅịnịma nangaḅịa, pịkị ḅẹlẹ tẹmẹḅọ atụma pọnjị ọkụ nwọse ini pọnjị ḅịa.

²⁶ Ọ́mịna ḅie tụḅọ gbọrịḅọ ḍukosa na nwọ simeye na, nwọ simeye na pakaḅịa-ẹ, anị wa se nemiḅịaye-ẹ na ọ́ karakaramẹ? Ọ́mịna ḅie gbọrịḅọ sọ anịa ḅẹrẹ ḍukokẹ; ó ḍukoye naa gbọrịḅọ sọ pịkị ofori-ẹ!

²⁷ Ị̀rị̀, Nyanaḅọ Ḅe tatarị ḅẹrẹ mị ḍuko Zaịyọn mị pịrịmẹ; àrị oku nwẹngịḅọ se Jerusalẹm fịrịmamẹ se ḍukomẹ na, ‘Ị́ya tomonima ini ḅoaḅẹ! Ini ama ḅoaḅẹ!’

²⁸ Àrị oruma ogboku ḍiki sịkị, arịa ḅie ḍukoye nyana gbọrịḅọ sọ ofori-ẹ; ineda à gbela ḅẹrẹ mị pẹkẹrẹḅịa gbọrịḅọ sọ ofori-ẹ.

²⁹ Ma oru mamgba yeḅụ oforikaye-ẹ; àrị ineda mịẹḅịaye ngịsị ofori-ẹ— ma ini ḅara se kara se tẹkẹ àrị yema ịnyọ arịaḅụ ofori-ẹ àrị pịkị kụrọ nyanakẹ.”