Aịzaya 40 - Kịrịkẹnị Baịbụl

Kuḅie Kụrọma Ọkwẹịn

¹ “Ị̀ya tomonima kuḅie kụrọma,” mịna Tamụnọ Ḅe ọkọ ḅẹmẹ. “Inia kuḅie kụrọma!

² Jerusalẹm apụma kuḅie kụrọma. Ḍuko ini pịrị ini tọrụsiọrị ḅọlọ sịkị lasam mịọkụ inia sima ḅụ ini ḅarasin ini pịrịsam. Ini mịẹ-a si mamgba gose à ḅakama ḅụfụka se ini pịrịsam.”

³ Gbọrị pụkọ oloku pakụmamẹ, “Eleogbo ateli karakarama Nyanaḅọ Ḅe pịrị! Eleogbo yema tan sin mịna Tamụnọ Ḅe pịrị!

⁴ Pẹsịkiri goyegoye sara ḅeinma; tụndụ goyegoye ḅaa kiri pịrị. Chịngị ma àrị sẹrẹrẹ kiri sọḅịa, anịsịkị kpụlụkụ kpụlụkụ sẹ mị ini anị mịẹ mọnịmọnịmaḅịa.

⁵ Anịsịkị Nyanaḅọ Ḅe oria boma mị anị ḅele pakaḅịa, se tomoni mamgba anị ọrịḅịa. Nyanaḅọ Ḅe na-mịnaḅụ-na ḅereni mịn mị pịrịsam.”

⁶ Gbọrị pụkọ oloku pakụmaḅẹ, “Oku mị ḍuko finjima!” À gbelamẹ, “Che oku à nwọ ḍuko finjimaḅe?” “Ḍuko finjima na tomoni mamgba osuein sime ọkụ ini nwọ simemẹ; piriḅie ngwengwe ḍin laka ọkụ anị ini ḍin laka ọkụ-ẹ.

⁷ Osuein ma àrị samịnaḅịa, ngwengwe ma ịnyọ arịaḅụ faḅịa Nyanaḅọ Ḅe fọrụ fịrịma àrị ofuroḅịa sịkị. Tomoni ḅarị ye-inematẹịn osuein nẹngị ẹkẹ.

⁸ Iin, osueinma àrị samịnaḅịa, ngwengwe ma ịnyọ arịaḅụ faḅịa, ọkụma mịna Tamụnọ Ḅe oria ọkwẹịn mị simegbasoḅịa.”

⁹ Jerusalẹm, gololo tụndụ mị tanjị se iḅi ḅẹrẹ mị ḍuko finjima! Gele pụkọ se oloku pakụma, Zaịyọn; iḅi ḅẹrẹ mị ḍuko! Ọkwẹịn pakụma se ḅalafama. Ḍuko Juda amama pịrị na inia Tamụnọ Ḅe ò ḅoaḅẹ!

¹⁰ Kụrọmamgba Nyanaḅọ Ḅe ò ḅo kụrọ se ḅẹrẹtọn-ẹḅoaḅẹ, ọ̀ ḍụaḅọrọmasapụ ma na ori na ḅoaḅẹ.

¹¹ Ori oria anana ogboma ḍikiḍikiḅịa anana ḍikiḍikiḅọ ḅara; ayamburama ananama ori àrị koḅiri gbolomaḅịa se ọ̀ ḅara ḅie ḅụ àrị deki ọ̀ ḅụ ḅie chuḅịa; anịsịkị arịa nyengima ò deindeinma tọrọkọ ịsụn àrị na nwẹngịḅịa.

Izrẹl Tamụnọ Ḅe Se Ori Otomaḅịaye Ofori-ẹ

¹² Tụḅọ ineda ḅarakuḅu ḅụ abaji mị tọnḅe anịkanịka ḅara se so mị la-ọkụ tọnḅe? Tụḅọ ineda sẹkiri ḅie sime onwun ma se gbọrị ọmọngọ ḅie chụa se ọlọḅe anịkanịka tụndụma na chịngịma na ḅe iku mị la-ọkụ tọn nemiḅe?

¹³ Tụḅọ ineda Nyanaḅọ Ḅe mịẹḅịaye ḍuko ọ̀ pịrịḅe? Tụḅọ ineda yese ò telima anịkanịka ò tetemaḅe?

¹⁴ Tamụnọ Ḅe ọ̀ tụḅọ na ḅẹrẹḅia se ọ̀ mịẹḅịaye mị nemi pịkị yekaịnḅo ḅịa ọkụ na, tụḅọ ọ̀ nwọ gbela ọ̀ mịẹḅịaye ḅụ, tụḅọ iḅi ḅẹrẹkọn ọkụ na yekaịnḅo na se ò telima?

¹⁵ Sẹ ma Nyanaḅọ Ḅe ḅụ àrị sọye ofori-ẹ, kpọịnkoro mengi sime ọkụ àrị nwọ simemẹ; sasaju sime chọ ma àrị fọn fokofoko ọkụ fokofokomẹ.

¹⁶ Lẹbanọn piriḅie sime nama mamgba ḅe kịẹnḅịpị bokẹ se agbamịẹ mịna Tamụnọ Ḅe pịrị ḅụ, pịkị ejema sọ se fịnị tọnọ agbamịẹ ḅụ ngịsị àrị bokẹ.

¹⁷ Sẹ mamgba ngịsị gbọrịye ḅụ sọ àrị ofori-ẹ ọ̀ ḅụ.

¹⁸ Se Tamụnọ Ḅe na otomaḅịaḅọ tụḅọ? Nde ị́ ine ò sime ọkụ ḍukoḅịa ọkụ?

¹⁹ Akanị ḅara se kara tẹkẹarịye sime ọkụ ori ọkọ simekẹ, anị ḅara fịrịnwẹngịapụ goli se ḅirima se seleḅa se chuku ḅụ sara kelamaye ma.

²⁰ Ineda seleḅa na goli na nyanakaḅọ ḅe ḅụrụẹka chịn nwọ ḍọkịḅoḅịa. Ose iḅi akanịḅọ pịrịḅịa se iḅitẹịn ḅịa lụgụ karachịẹma ọ̀ pịrịḅịaḅọ.

²¹ Ó nemika? Ma ini ḍuko ọ́ pịrịka ḅọlọ sa sịkị ngịsị? Tomonikiri mị sakị ọkụ ma ọ́ pa naaka?

²² Oria emine mị ọgọnọ simeḅọ ḅe mị anị mịẹye-ẹ anị so mị ọgọnọju ḅụ na anị finjima lanyọ mamgba na; anịa chukuḅie sime apụma na ḍọkọḍọkọ sọnọ awọ sime ọkụ anị ini sime ọkụ-ẹ. Ḅọkọ-tọrụ-gbẹịn-ḅịtẹ finjima ọkụ anị ò so mị finjima ọkụ-ẹ, tomoni angaḅịa ikowarị sime ọkụ.

²³ Ḅẹrẹtọn apụma ḅụ opuapụ ma ori ini sin iderimamẹ se ini ḅo yeḅụoforikapụ sọmẹ.

²⁴ Ịwọma pakarị chịn awọ sime ọkụ anị ini sime ọkụ-ẹ, anị sẹnị paka kirikiri ini bura sin ayema. Nyanaḅọ Ḅe fọrụ fịrịma sịkị, àrị samịnamẹ se fọrụ pumburo ofuro sin ọkụ se àrị ofuro sinmẹ.

²⁵ Fịafịa Tamụnọ Ḅe ị́ ò se tụḅọ otomaḅe? Ò sime ọkụ sime jụmḅọ omi?

²⁶ Tọrụ dekichịẹma so mị ḍiki! Tụḅọ ị́ ọrịarị lolia ma tẹmẹ? Owuni ḅụ tọrọkọda owu mun-arịḅọ ḅe sime ọkụ, arịa kịẹnḅịpị la-ọkụ ò nemimẹ se arịa ẹrẹ ma se arịa ḅie gbọrịye gbọrịye chịnmẹ! Oria kụrọ mị ḍụḅa so ọkụma— arịa ḅie irima gbọrịye ngịsị ofori-ẹ!

²⁷ Izrẹl, anịsịkị cheye gose ị́ ḅẹrẹ sua-ao na Nyanaḅọ Ḅe ị́ya ḅụfụka ma la-ọkụ ò nemikẹ pịkị jịn apụ ị́ tọrụsiọrịma àrị ọkụ mị sọnị?

²⁸ Ị́ nemika? Ma ị́ naaka? Nyanaḅọ Ḅe anị simegbaso Tamụnọ Ḅe-ẹ; ori tomonikiri mị mgba tẹmẹmẹ. Ọ̀ ḅụ ịnyọ fafakẹ, ọ̀ ḅụ pịkị lọkọlọkọkẹ. Oria koroma kaịnḅoarị gbọrịḅọ sọnị ofori-ẹ.

²⁹ Ịnyọ fa se oju lọkọ apụma ori ini mịẹkụrọmakụrọmamẹ.

³⁰ Awọmẹnị awọma sọnị iniaḅụ lọkọḅịa pịkị ịnyọ faḅịa; asẹmẹnị ma ḅụ ịnyọ ineda faḅịa.

³¹ Ọkụma ḅarachụa gose kuḅie se Nyanaḅọ Ḅe ḅụgbana apụma ịwọ ịnyọ inia ḅie sọḅịa. Ini igo pamba chụa se fin ọkụ fin ḅịa; ini mangị ḅịa ịnyọ iniaḅụ faẹkẹ; ini nwẹngịḅịa iniaḅụ pịkị lọkọ ẹkẹ.