Aịzaya 38 - Kịrịkẹnị Baịbụl

Amanyanaḅọ Hẹzekaya Ḅe Obi Mị Na Gwọ Na

¹ Nwọ pembe sịkịḅụ, Amanyanaḅọ Hẹzekaya ḅe ori obi se pịkị fị-ẹtọnmẹ. Ịkịankoro Aịzaya, Emọs yaḅe, mun ò ḍiki-ẹmunmẹ, se nwọse ọ̀ ḅẹmẹ, “Nyanaḅọ Ḅe nwọse ị́ ḅẹmẹ na yegoyegoye se ọrụtọn koroma anịatịḅị ị́ ḅụ iḅi-ẹkẹ. Ḅụkarakarama fị mị pịrị.”

² Hẹzekaya ḅe ọ̀ tọrụ pịkị warị agbagba da se tẹkẹmẹ:

³ “Ḅiekoroma, Nyanaḅọ, ḅịpị poki na ḅụse kiri pịrị ḅụ na à fịrịnwẹngị ị́ pịrịsam, à pịkị ḅụkụrọma ị́rị́ ị̀ ḅe na à mịẹ ḅẹye goyegoye mịẹmịẹmẹ.” Se ò sakị ḅụakụ ḅara nwọse owumẹ.

⁴ Anịsịkị Nyanaḅọ Ḅe tọn Aịzaya ḅe pịrịmẹ na

⁵ ò vinpịkị so Hẹzekaya ḅe damamun se ọ̀ ḅẹ na, “Ị̀rị̀, Nyanaḅọ, ị́ya ḅieju-ḍaḅọ Devid Tamụnọ Ḅe, ị́ya tẹkẹ mị naasam à pịkị ị́ tọrụmgbọlụ ḅụ ị́ya owumengi ma ọrịsam; àrị ị́ wẹrịsoḅịa se jie-a kụra ị́ pịkị nwọse ḍumoḅịa.

⁶ Àrị ị́rị́ na mị Jerusalẹm opuama mị na ḍụaḅịa Asiria sẹdaḅọ ḅe ḅaraḅie, à pịkị sịkịmamgba agbọ sọ mị opuama mị pịrịḅịa.”

⁷ Aịzaya ḅe nwọ ḅẹmẹ, “Nyanaḅọ Ḅe ori elekima se ị́ ḍieḅịa, se ḍiepakụma na ò ḅereniye mị ọ̀ mịẹḅịa.

⁸ Amanyanaḅọ Ehaz ḅe nama ịkpịkpa mị, Nyanaḅọ Ḅe ọ̀ mịẹḅịa anịa tẹmẹ mị oyi-a ḅụọ se anịaḅụ sikima ọḅụdaḅịa.” Se tẹmẹ mị pịkị oyi-a ḅụọ se ọḅụdamẹ.

⁹ Hẹzekaya ḅe oria obi kiriḅụ sịsẹ se so sịkị, ọ̀ mị boma nime mị chumẹ:

¹⁰ À nwọ chịnmẹ na ị̀ya asẹmẹnị sịkị ḅụ À so ḍụẹịn ama mị mun aḅẹ, À laḅịa ḍin ma laka simeogbo.

¹¹ À nwọ chịnmẹ na mị ḍumo apụ tomonikiri mị ḅie À ḅarị ngịsị Nyanaḅọ Ḅe ọrị ẹkẹ Anịkanịka ḍumo ḅọ sọ.

¹² Ị̀ ḍumo mị ini anị pẹlẹ se anị kulumamẹ, Ini kankoromasa ikowarị kịkẹmẹ, Ḅịtẹ ḍoriye ḅụ ini pẹlẹ sin ḅịtẹ kịkẹmẹ, À nwọ chịnmẹ na Tamụnọ Ḅe ọ̀ mịẹse ị̀ ḍumo mị kulumaḅịa.

¹³ Ḍin mịmgba ḅụakụ ḅụ àrị owu pakụmamẹ, Chịrịḅa ị̀ya imgbe ma anyịmarị ọkụ simemẹ. À nwọ chịnmẹ na Tamụnọ Ḅe ọ̀ mịẹse ị̀ ḍumo mị kulumaḅịa.

¹⁴ Ị̀ pụkọ mị ịnyọ fa ḅụ anị ḅarị pakakẹ, Ị̀ ḅie pịkị okuku ḅie de ọkụ demẹ. Ị̀ tọrụmgbọlụma ḅụ ịnyọ famẹ so mị ḍiki ḅụ. Nyanaḅọ, ma ḅụfụka mamgba ḅie ị̀ ḍụamẹ.

¹⁵ À che ḍukoḅe? Nyanaḅọ Ḅe mịn mị mịẹmẹ. Ị̀ kuḅie akụmẹ, à pịkị ineda mọnọkẹ.

¹⁶ Nyanaḅọ, à ḍumo ị́ pịrịmẹ, ị́rị́ kẹngẹ mị à sime pịrịye-ẹ; Ị̀ gwọ se mịẹ à ḍumo.

¹⁷ Ị̀ya ḅụakụ mị pịkị ḅo deinsọḅịa. Ḅalafamaye ma ḅie ị́ ị̀ ḍumo ḍụamẹ; Ị̀ya si mamgba ḅie ị́ ḅarasin ị̀ pịrịmẹ.

¹⁸ Ḍụẹịn ama ḅie ineda ị́ bomaḅịaḅọ ofori-ẹ; Fịapụ ineda kuḅie se ị́ya karakara mị ḅụgbana ẹkẹ.

¹⁹ Ḍumo apụ mị ị́ bomaḅịaye-ẹ, Mịọkụ àrị ị́ boma àrị ọkụ mị. Ḍapụ ḍuko inia awọmẹnịma pịrịmẹ ị́ya karakara mị la-ọkụ.

²⁰ Nyanaḅọ, ị́ ị̀ gwọsam. Wa ọbọ se nime chu ị́ bomaḅịa, Wa ḍumo la-ene la-ene ị́ya Oputẹkẹwarị ḅie wa boma nime chuḅịa.

²¹ Aịzaya ḅe ḍuko amanyanaḅọ ḅe pịrịmẹ na ò figi mịẹ patalama; anị se ọpọpọlị mị ọgọnọ gbana, se ọ̀ ḅụ iḅiḅịa.

²² Anịsịkị Amanyanaḅọ Hẹzekaya ḅe gbelamẹ, “Che elekima ḍiepakụmaḅẹ na àrị ineda Oputẹkẹwarị mị munḅịa?”