Aịzaya 36 - Kịrịkẹnị Baịbụl

Asiria Apụ Ma Jerusalẹm Mị Ẹrẹmamẹ

¹ Hẹzekaya ḅe Juda amanyanaḅọ sọ oyi inein fịnjị karama kụra mị ḅie, Sinakerib Asiria Sẹdaḅọ ḅe owu se ini onu nama kelema Juda opuamama paka se tomonima kunsomẹ.

² Se ọ̀ tọn oria ọmụkụlọdaḅọ Rabshake ḅe pịrịmẹ na, ḅaka owuni ọ̀ nwọse Lekish ḅụ ḅọrọ Jerusalẹm mun se ò ḍuko amanyanaḅọ Hẹzekaya ḅe pịrị na, ọ̀ ḅara dekichịẹma-ẹ owu sọka ḅụ. Ọmụkụlọdaḅọ ḅe, ḅịtẹ mịẹapụ ma fịrịnwẹngịarị ateli mị ḅie, mị ọ̀ gbana chịẹye-ẹ, anịnyọ mị, anị ọgọnọju ḍapa mị ḅie mengi ḅọrọḅo ḅara pu mị ḅie sọarị nyọ mị ḅụ-ẹ.

³ Tẹrẹ-a Judapụ ḅo ori na ịrịamẹ: Ẹlaịakịm, Hilkaya ya anị amanyanaḅọ odo mị ḍikiḍiki apụma tịḅịnịḅọ ḅe na; ḅẹrẹkọn warị ḅie ḍiri gịẹịnḅọ Shẹbna ḅe na; pịkị Esaf ya Joa ḅe, anị ama ḍiri ma se ọrụtọn koroma-koromaḅọ ḅe na.

⁴ Asiria ọmụkụlọdaḅọ ḅe ḍuko ini pịrịmẹ na sẹdaḅọ ḅe ò nemi ḅimẹ, cheye amanyana Hẹzekaya ḅe mịẹ se ò kuḅie gbọtụma nwọ kụrọ-ao.

⁵ Ori ò gbelamẹ, “Ọ́ chịn ḅara ọkwẹịn ineda ọmụgbin ḍin na kụrọ mị na kiri ḍinmaḅe? Tụḅọ ọ́ nwọse ḅiekpọma, ḅo ḅarachụa ómine tịḅịḅiekụrọapụ ma pịrịse Asiria mị dapakaḅe?

⁶ Ijipt mị ḅo ḅarachụa ọ́ pịrị anị ọ́ tọrụseḍikiarịye-ẹ, ọkụma anị mị simeḅịa ọkụ anị osuein se amgbara mịẹ nwẹngị ọkụ simemẹ—anị anyịḅịa se ị́ ḅara temiḅịa. Anị Ijipt amanyanaḅọ ḅe kịkẹye-ẹ, ò se kuḅie kụrọmaḅọ goyegoye ḅụ.”

⁷ Asiria ọmụkụlọdaḅọ ḅe ọkwẹịnma mun se nwọ ḅẹmẹ, “Anịkanịka ó ḍuko ị̀ pịrịḅe na ó kuḅie se Nyanaḅọ ọ́mịna Tamụnọ Ḅe ḅụgbana aḅẹ? Anị Hẹzekaya ḅe tọn Judapụma na Jerusalẹm apụma na pịrị na gbọrị agbamịẹ ẹbẹ ḅụ kẹngẹ anị ọ́ Nyanaḅọ Ḅe fịrịma nwẹngị-nwẹngịḅịaye-ẹ nwọḅẹ sịkị ḅụ, ọ̀ kan warịma na agbamịẹ ẹbẹ ma na arị-ẹ.

⁸ Sẹdaḅọ ḅe ẹrẹḅụ àrị ómine na ḅịpịogbosọ nyanaḅịa. Asụn ḅụ sọnọ ẹndẹ à nwọse ọ́ pịrịḅịa, ó nemikase ineda àrị dọkụḅịa ḅaka tomoni nyanaḅịa ọkụma.

⁹ Asiria ḅie iderimatẹịn owuniḅọ ḅe sọ, ómine ori na gbasịkẹ, anịẹḅẹsọ ọ́ tọrụ se Ijipt apụma ḍikiaḅẹ, ini owuni-kporokporo na owuni na se ọ́ fịrịma-ẹ.

¹⁰ Ọ́ chịn ḅara, àrị owu se ọ́mịna ama mị paka se anị kan sịkị mị ḅụ Nyanaḅọ Ḅe oria ḅarachụa ị̀ ḅụ ofori? Nyanaḅọ Ḅe na-mịnaḅụ-na ị̀ ḅẹmẹ na àrị owu se anị paka se anị kanguluguluma.”

¹¹ Anị Ẹlaịakịm ḅe na Shẹbna ḅe na pịkị Joa ḅe na nwọse ọmụkụlọdaḅọ ḅe ḅẹye-ẹ, “Aram apụ ọkwẹịn pụkọ ḅụ ọkwẹịn wa pịrị, wa kaịnḅoḅịa. Hibru apụ ọkwẹịn kọnma; onu mị ọgọnọ sime apụ mamgba ini pokiaḅẹ.”

¹² Ọ̀ nwọ pẹkẹrẹmẹ, “Ọ́ chịn ḅara, ómine na amanyanaḅọ ḅe na kẹngẹ mị sẹdaḅọ ḅe ị̀ fịrịmaye-ẹ na à ma ọkwẹịn mamgba kọn pịrị-ẹ nwọḅẹye? Ọkọkẹ, ọkwẹịn mị à kọn onu mị ọgọnọ simeapụma sọnị pịrịaḅẹ, ini anị inia fịnya fị pịkị nịna na ḅuḅịa apụ ma-ẹ, ómine sọ ọ́ fị pịkị ḅuḅịa ḅara mị-ẹ.”

¹³ Anịsịkị owuni-kụlọ-daḅọ ḅe sịsẹchịẹ se Hibru pụkọ ḅụ oloku pakụmaye-ẹ, “Asiria sẹdaḅọ ḅe ḍuko ọ́ pịrịarịye ọ́ nwọ poki.

¹⁴ Ori ọ́mịna ḅeri jine aḅẹ, ó ḅerenima Hẹzekaya ḅe ómine dairima. Hẹzekaya ḅe ori ineda ọ́ ḍụa ẹkẹ.

¹⁵ Ọ́ pịkị ḅereni ọ̀ pịrịma se ori ó chukuruma, ó mun Kuḅie-se-Nyanaḅọ Ḅe ḅụgbana. Ó koromama na Nyanaḅọ Ḅe ori ọ́ ḍụaḅịa-ẹ anịkanịka ómine Asiria owunima dachịẹma se wa kụrọ ḅaraḅụ ọ́mịna opuama mị ọkị-ẹkaye ofori-ẹ.

¹⁶ Ómine Hẹzekaya ḅe pokima! Asiria sẹdaḅọ ḅe ọ̀ tọn ọ́ pịrịaḅẹ na ọ́ pakaḅo, opuama mị ḅie, se ọ́mịna ḅarama dekichịẹma. Ómine mgba ó ḅereni ọ̀ pịrịḅịa ómine ḅarana nyana irumịẹ chịnmgbọlụ ozuma chụaḅịa tụmgbakị elelenda ma na figi chịnmgbọlụma na ọ́ nwọ fịḅịa, ọ́ pịkị ómine ḅarana nyana olulu ma ḅie paka mengi ḅuḅịa—

¹⁷ ọkịmun sẹdaḅọ ḅe ómine se mun ọ́mịna sẹ mị sime ọkụ sime jịn sẹ ḅie koroma sịkị laḅịa, anịnyọ, iru-mịẹḅịa chịnmgbọlụ ozu na fịturu mịẹḅịa ịpịamgba ozu na omi-ẹ.

¹⁸ Ó ḅerenima Hẹzekaya ḅe oḅori se ọ́ chịn, se ó mun koroma na Nyanaḅọ Ḅe ori ọ́ ḍụaḅịa-ẹ. Jịn sẹ-a oru ma ḅie Asiria sẹdaḅọ ḅe ḅara ḅie arịa sẹma ḍụasa oru omi?

¹⁹ Nde anga àrị omi mịọkụ, Hamat na Apad na oru ma? Sẹfaveim oru ma nde anga àrị omi? Sameria mị ḍụaye omi?

²⁰ Nde sịkị ma sẹ mamgba ḅie gbọrị oru arịa sẹma ḍụasa mịna sẹdaḅọ ḅe ḅaraḅie? Anịọkụma cheye ọ́ mịẹse ó koroma-ao na Nyanaḅọ Ḅe ori ineda Jerusalẹm mị ḍụaḅịa-ẹ?”

²¹ Tomonima, amanyana Hẹzekaya ḅe ḍuko ini pịrịsa ḅaraḅụ, ini yawụma simemẹ; gbọrị ọkwẹịn sọ ini kọnkẹ.

²² Anị Ẹlaịakịm ḅe na, Shẹbna ḅe na pịkị Joa ḅe na opu kururu ḅụ inia ḅụchụayema kan se mun Asiria ọmụkụlọdaḅọ ḅe ḍukoye mị ḍuko amanyanaḅọ ḅe pịrịye-ẹ.