Aịzaya 35 - Kịrịkẹnị Baịbụl

Fịafịa Mị Ḅe Ateli Mị

¹ Onwun ele na samịna kirima na àrị ḅieḅẹlẹḅịa, ngwengwe ma piri ele mị ḅie ḅịapakaḅịa.

² Onwun ele mị nime chuḅịa se ḅieḅẹlẹ ḅụ olokuḅịa; Lẹbanọn Tụndụ ma iḅiọkụ anị nwọse iḅiḅịa anị pịkị Kamẹl ozuma na Sharọn ozuma na fịaye pakụma ọkụ pakụmaḅịa. Ọrụḅọḅọ Nyanaḅọ Ḅe iḅi mị na, oria opu na oria kụrọ na ọrịḅịa.

³ Ịnyọ se ịnyọ fasa ḅarama pịrị pịkị ịnyọ fa se geregere àrị ḅụọ ịkpụkụ na.

⁴ Ḍuko kuḅie lọkọsaḅọ goyegoye pịrị, “Kuḅie kụrọ nyana se ḅalafa nyanama! Tamụnọ Ḅe ò ḅo ọ́ ḍụa-ẹḅoaḅẹ, ò ḅo ḅụfụka se ómine-na-tarakapụma pịrị-ẹḅoaḅẹ.”

⁵ Tọrụmgbọlụ pụn apụma ini ineda nyọ ọrịḅịa, iniki apụma pịkị yenaaḅịa.

⁶ Ikeliapụ ma ini fuku sẹkịḅịa, ḅịpị iniki kọn apụma pịkị ḅieḅẹlẹ ḅụ olokuḅịa. Onwun ele ma ḅie mengi ideriḅịa pịkị ideri mengi ịkpa ma ḅie pakaḅoḅịa;

⁷ kọrịarị onwun ma àrị ḍapa sọḅịa, samịna kpoinkpoin kirima ḅie ideri mengi ḅeinḅịa. Anịnyọ anị piri obirima tatarị anga-anga nyọ mị-ẹ, osuein teinteinma pakaḅịa, kala piri pịkị kpokpo ḅụ mengi aka sẹnịḅịa.

⁸ Anịnyọ gbọrị opu ateli simeḅịa, anịa ẹrẹ “Fịafịa Ateli.” Gbọrị si mịẹḅọ sọ ngịsị anị ateli ḅie ḅọrọ ẹkẹ; gbọrị oḅoriḅọ sọ ineda anị ateli ḅie nwẹngịarịapụ dairima ẹkẹ.

⁹ Gbọrị chịrịḅa sọ anịanga sime ẹkẹ; gbọrị ḅalafama nama sọ anị opu ateli ḅie ḅọrọ ẹkẹ. Nyanaḅọ Ḅe ḍụaḅọrọmasa apụma anị ateli mị ḅie ḅọrọ mun ama mị laḅịa.

¹⁰ Nyanaḅọ Ḅe ọ̀ ḍụaḅọrọmasa apụma ini ḅieḅẹlẹ nime chu pịkịma soḅịa, ini Jerusalẹm ḅie sọḅịa nime chu ḅieḅẹlẹ na oloku ḅụ na. Inia ḅieḅẹlẹ mị sime gbasoḅịa, ngịrị na ḅụakụ na ḅarị ngịsị iniaḅụ kụrọ nyanaka gbasoḅịa.