Aịzaya 30 - Kịrịkẹnị Baịbụl

Ijipt Mị Na Yeḅụoforika Ḅịpịogbosọ Ḍiri Gịẹịn Mị

¹ Nyanaḅọ Ḅe nwọ ḅẹmẹ: “Ḅẹrẹtọn Juda mị pịrị àrị apụma ini fasam, anịatịḅị ini kụrọma ị̀ dapakasam. À tọnkaye ini nwọ ḍukonwẹngịmẹ, ini pịkị jịn apụ na ḅịpịogbosọ ḍiri gịẹịnmẹ, à tọnka ḅaraḅụ ini si se jịn si ọgọnọ gbanamẹ.

² Ini mun Ijipt mị ḅara ḅarachụa ḅimẹ, ị̀ya tetema gbelakaḅụ. Ini ḅimẹ Ijipt mị ini ḅọị, anịọkụma Ijipt amanyanaḅọ ḅe ḅụ mị ini kuḅie-se-gbanaye-ẹ.

³ Ọkụma amanyanaḅọ ḅe, ḅarachụa ini pịrịḅịa kụrọ ọ̀ nyana ẹkẹ, pịkị Ijipt chukuḅie ini ḅọị mị opu sifụḅara ḅụ mị anị kulumaḅịaye-ẹ.

⁴ Inia sẹkẹnị kiri opuapụ ma mun Ijipt opuamama ḅụ Zoan na Henẹs na lasam nwọḅẹ sọnị,

⁵ Judapụma ini kuḅie-se anị kuḅie-ḅụgbana na gbẹịnka sẹ mị ḅụgbanaye gose inia kuḅie manama tọnḅịa, anị sẹ mị, anị ini ḅarachụa ḅi sịkị ḅụ ini gbakị sẹ mị anị-ẹ.”

⁶ Mịn Tamụnọ Ḅe oria oku-ẹ chukuju onwun ele mị ḅie sime namama na kpakịmaye ḅụ: “Sẹkẹnị kiri opuapụ ma ḅalafama sẹ ḅie ini nwẹngị ḅọrọmẹ anị chịrịḅa na nweni ḅaaḅaa oruwu ma na pịkị fin-fin dragọn ma anga nyọ mị-ẹ. Ini yela ḍiepịrịaye na ngọ na nwọse inia yepụra asụnma na ike-nambuloma na ọgọnọ gbana mun ineda ḅarachụa ini pịrị ẹka sẹ pịrị-ẹmun-aḅẹ.

⁷ Ijipt mị nyana ini pịrịḅịa ḅarachụa mị tịḅị nyanakẹ. Anịẹrẹchị à jịn ẹrẹ se Ijipt mị chịnsam, ‘Rehab anịkanịka ye ḅụ oforika Dragọn.’”

Ḅịpịpokika Tomoni Ma

⁸ Tamụnọ Ḅe nwọse ị̀ ḅẹmẹ, tomonima sime ọkụ à nwọse ḍiri ḅie gịẹịn, mịẹsosịkị, mịn ini sime si-ọkụ nwọḅẹye mị sime gbasoḅịa ọkụ.

⁹ Sịkịmamgba ini Tamụnọ Ḅe dapakaḅẹ, sịkịmamgba ini iruokọn aḅẹ, sịkịmamgba Nyanaḅọ Ḅe se ini telimarịye ma ini poki ḍụkụkẹ.

¹⁰ Ini nwọse ye ọrị apụma ḅẹmẹ, ó ye ọrị wa pịrịma. Ini pịkị nwọse ịkịankoroapụma ḅẹmẹ, ó ye ḍukoma. Ini nwọ ḅẹmẹ, “Karakaraye na gbolomaye ó ḍuko wa pịrịma. Wa naa gbẹịnye ọ́ nwọ ḍuko wa pịrị. Ye wa mịna karakarakaye ma se wẹrị.

¹¹ Mịna tọrọkọ ọ́ ḅụ sikima, ọ́ ḅarị ateli kiki wa pịrịma. Ọ́mịna fịafịa Izrẹl Tamụnọ Ḅe na kpakịmaye wa ḅarị naa ḅikẹ.”

¹² Ọkụma mịn fịafịa Izrẹl Tamụnọ Ḅe ḍukoye-ẹ: “Ómine à ḍuko ọ́ pịrịye mị sịkịmẹ, se kụrọḅara se yemịẹ na, nweni telima ḅụ na sẹrẹrẹmẹ.

¹³ Ḅẹrẹ ọ́mịna ḅara si mẹ. Gịẹịn pu koro kiri lasa gololo warị agbagba sime ọkụ ọ́ nwọ simemẹ; bẹkẹma ḅaraḅụ ọ́ ḅịkị koroḅịa.

¹⁴ Ọ́ kọsịḅịa, aḅaịn ḅẹlẹ kọsị ọkụ, ọ́ kọsị so ọkụma se ọfịrị anyị-tandaḅịa kalapẹkẹrẹ anịkanịka se mengi kokoye ḅie mengi ngọlịḅịa kalapẹkẹrẹ sọnị kọn ẹkẹ.”

¹⁵ Kụrọmamgba Nyana opuḅọ Ḅe, fịafịa Izrẹl Tamụnọ Ḅe nwọse tomonima ḅẹmẹ, “Ọ́ pịkịmaḅo se deinma kuḅie-se-ị̀ ḅụgbana. Anịsịkị re mị ọ́ kụrọ, pịkị tịḅịkikima nyọ nyanaḅịaye-ẹ.” Ọkụma anị mị ọ́ mịẹ ḍụkụkẹ.

¹⁶ Anịnakaraka ọ́ tọnmẹ ómine ọ́mịna sarasarama mangị ḍin asụnma ḅụkụlọ se be ómine-na-tarakapụma ḅụ mangịso ḅịa. Ọ́ pịkị ḅụ karakaramamẹ mangịso. Ọ́ nwọ chịnmẹ na ọ́mịna asụnma àrị opuma mangị ḍinmẹ, ọkụma ómine ḍukoarịapụ ma mangịtẹịnḅịa!

¹⁷ Ọ́mịna ḅie kịnị-a mẹndẹ oyiasi fịnjị mangịsoḅịa, taraka owunima ḅie gbọrịḅọ ọ́ nwọ ọrị kirikiri, sọnọ-a owuni ineda mịẹse ómine mgba ọ́ mangịsoḅịa. Ọ́mịna owunima ḅụ kọnḅịa gbọrịḅọ sọ sime ẹkẹ, chịngị ọgọnọ kpọngọlọma pike ịkpata chịn mị sikima.

¹⁸ Anịẹḅẹ sọnị, Nyanaḅọ Ḅe ómine ḍikitịḅịfoinḅịa ẹrẹchị ò koru aḅẹ. Ọ̀ ḅụkarakaramamẹ ómine ḍikitịḅịfoin, anịatịḅị sịkịmamgba ọ̀ karakaraye mịẹmịẹmẹ. Kuḅie-se-Nyanaḅọ Ḅe ḅụgbana apụma nde inia ḅieḅẹlẹ simeḅịa ọkụ.

Tamụnọ Ḅe Ori Oria Tomoni Ma Ḅẹlẹmaḅịa

¹⁹ Ómine Jerusalẹm ḅie anga apụma, ọ́ ḅarị ngịsị owu ẹkẹ. Nyanaḅọ Ḅe ò ḍikitịḅịfoin nyanamẹ, ḅarachụa gose ómine owu ọ̀ pịrị ọkụma, ori ọ́ pẹkẹrẹḅịa.

²⁰ Nyanaḅọ Ḅe ori ị́ mịẹḅịa ye sitẹịn sịkịḅụ ọ́ karịḅọrọḅịa, ọkụma ori-na-mịnaḅụ na anịnyọ ò simeḅịa yese ó telimaḅịa ẹrẹchị, anịsịkị ọ́ ḅarị pịkị ngịsị ọ̀ ḍọkị ẹkẹ.

²¹ Ó nemikase ateli mị ḅụ iri-ama-ḅara-da anịkanịka ereḅara-damẹ ḅẹḅẹ ọ́mịna ọḅụju ómine ọ̀ pụkọ naaḅịa, se nwọḅẹ aḅẹ, “Mịn ateli mị-ẹ. Anị ḍuko.”

²² Ọ́ tẹkẹ àrị ḍumo nyanaka ayema, ini seleḅa se ḅirimaye ma, anịkanịka ini goli se ḅirima ḍumo nyanaka ayema, ómine àrị deki se ḅụrụye gbin wokuma ọkụ àrị wokuma se oloku nwọḅẹḅịa, “Ị̀ tọrụkuḅu ọ́ ḅụ sikima!”

²³ Ọ́mịna fịayema ọ́ nwọ ḍipi sịkị goyegoye, Nyanaḅọ Ḅe ori ene fịrịmaḅịa mịẹsosịkị àrị sẹnị, se ọ́ pịkị iḅiaye sokuḅịa, ọ́mịna namama pịkị ḅakama fịḅịa osuein nyanaḅịa.

²⁴ Ó se ọ́mịna ozu ḅie fịrịnwẹngịarị nambuloma na yepụra asụnma na, arịa fịayema ḅụ iḅitẹịn ayema mị àrị fịḅịaye-ẹ.

²⁵ Ómine na tarakapụma inia owuniaye koko warịma ọ́ nwọ ọkị pịkị ini ḅaaḅịa ene ḅụ, mengi tụndụma ọgọnọ na pịkị chịngịma ọgọnọ goyegoye ḅụ na ideriḅịa.

²⁶ Akalụ mị ịrụa mị ḅịa ọkụ ḅịaḅịa, anịsịkị ịrụa mị sọnọma sịkị anị nwọse ḅịatẹịn anị ḅịaḅịa ḅara mị nẹngịḅịa, anị sọnọma enekaka gbọrị ene ḅụ ḅịa ọkụ. Ma mamgba mịẹḅịa sịkị, anị Nyanaḅọ Ḅe ḅịtẹ se, ò se oria tomonima pịrị ịnọ tọrụ ma fịna se àrị gwọḅịa sịkị mị-ẹ.

Tamụnọ Ḅe Ò Fomuḅara Se Asiria Mị Pịrịḅịa

²⁷ Nyanaḅọ Ḅe oria kụrọ na boma na sasaju ḅụ ini ineda anị ọrịḅịa. Fịnị na onwoin na oria ịganị mị ḍiepakụmamẹ. Ori ọkwẹịn ọkụma oria ọkwẹịn ma fịnị kọrị ọkụ kọrịmẹ.

²⁸ Ọ̀ tọrọkọ ḅụ, ọ̀ fịrịmapakụma fọrụ mị anị yegoyegoye dekisin opu mengi kịkẹmẹ. Anị sẹma ọfịn mun fịḅie chuḅịa, pịkị mịẹḅịa ini tọn sitịḅịnyana ayema kulumaḅịa.

²⁹ Ómine Tamụnọ-a tomoni, ó ḅieḅẹlẹ, osi nyana alalị fị ḍin ḅie nime chu ọkụ ọ́ nwọ chu. Ofurofuro ayema fiearị sịkị ḅieḅẹlẹ ḅụ nwẹngị Nyanaḅọ Ḅe Oputẹkẹwarị mị mun-arị apụma ḅieḅẹlẹḅẹlẹ ọkụ ọ́ nwọse ḅieḅẹlẹḅịa, anị Izrẹl mị ḍụaḍụaḅọ ḅe.

³⁰ Nyanaḅọ Ḅe ọ̀ mịẹḅịa ọrụḅọḅọ oria amanyanaḅọ pụkọ mị naaḅịa, pịkị oria ịganị mị ḅe kụrọ mị nemiḅịa. Fịnịḅẹlẹ na, opu enemgbọlụ na irisi na, ajisaka irisi na ene na simeḅịa.

³¹ Asiria apụma ini Nyanaḅọ Ḅe pụkọ naaḅịa sịkị inia ḅalafaḅịa, ini pịkị oria fomuḅara mị ḅe kụrọ mị nemiḅịa.

³² Nyanaḅọ Ḅe nwọ mbikia-mbikiama fomuḅara se ini pịrịarị sịkị, oria tomonima, nime chu na, akwa na ọbọ na farị ḅụ ini omi-ẹ. Tamụnọ Ḅe na-mịnaḅụ-na owu mị se Asiria apụma pakaḅịa.

³³ Ḅọlọsịkị ngịsị Asiria sẹdaḅọ ḅe dọkịmaḅịa opu fịnị ini nwọ karakarama koromamẹ. Anị gbunmẹ, anị pịkị dabaramẹ, fịnị-a pẹkẹrẹ pịkị anịa ḅie kpelu waraḅẹ. Nyanaḅọ Ḅe fịnị pakụmaḅịa ọwụ nwọse anịaḅụ saraḅịa se fịnị pakaḅịa.