Aịzaya 29 - Kịrịkẹnị Baịbụl

Jerusalẹm Mị Ḅụ Pakaḅịaye

¹ Tamụnọ agbamịẹ ẹbẹ mị na, Jerusalẹm mị na faḅie sọsam! Devid ḅe oria ikowarị mị ini nwọ pike opuama mị faḅie sọsam! Ye jịn kụra anịkanịka mama kụra ḅo arịa alalị fịayema na ḅọrọ,

² anịsịkị Tamụnọ Ḅe ori opufa ọkịḅo “Tamụnọ Ḅe agbamịẹ ẹbẹ” ini nwọse chịn opuama mị ọgọnọ gbanaḅịa. Anịanga tomoni oloku owuḅịa, anịsịkị opuama mị mgba pulo gbitipuma gbẹịn agbamịẹ ẹbẹ kịkẹḅịa.

³ Tamụnọ Ḅe ori opuama mị kelekele se, angana angana ḅụ owu se anị pakaḅịa.

⁴ Jerusalẹm mị, anị kirichuku ḅie ḅụkụrọma ọkwẹịn àrị fịsa tẹmẹ kịkẹḅịa, ini ḅịtẹ se fịnaḅọ pụkọ fọn ḅie ọkwẹịn àrị ḅara.

⁵ Jerusalẹm, owu se ị́ pakarị jịn sẹ mamgba fọn ofuro sin ọkụ ini nwọse ini ofuro sinḅịa, se inia owuni, ḅalafama apụma, osirosiroḅa fin so ọkụ ini nwọse fin soḅịa, kuḅie se yetọnka, pịkị ḅụ nemika ḅaraḅụ.

⁶ Kụrọmamgba Nyanaḅọ Ḅe opu irisi na kiri jike na nwọse ọ́ ḍụaḅịa. Irisi fọrụ na opu kọrị fịnị na ọ̀ nwọse sẹịnḅịa;

⁷ anịsịkị owu se Tamụnọ agbamịẹ ẹbẹ opuama mị pakarị sẹma inia owuni mamgba na inia owuniayema na, ini se iniaḅụ ọbịaye goyegoye na-faḅịa-ḍawọ maịn fa ọkụ, anị tomoniḅọ ḍin ḅie ḅụ yekoroma ọkụ simemẹ.

⁸ Koḅirima se owu se Jerusalẹm mị pakaḅịa sẹ mamgba simeḅịa ọkụ, anị fịfịye ḅaarịḅọ ḍawọju ḅụ ḍawọmẹ na ò ye fịaḅẹ, ọkụma ò ḅo sịsẹ sịkị, fịye re mị ọ̀ tarịarịye-ẹ, anịkanịka mengi pụkọtarịḅọ ḍawọju ḅụ ḍawọmẹ na ò mengi ḅuaḅẹ, ọkụma ọ̀ sịsẹ sịkị, pụkọ samịnatẹịnḅọ sime ọkụ, anị anị pịkị sime owuse Zaịyọn Tụndụ mị pakaḅịa apụ mamgba pịrịḅịa ọkụ-ẹ.

Seye Chịnka Ḅeri Jineaye

⁹ Mịẹmamun se ḅo oḅoriḅọ sọ! Mịẹmamun se ḅo tọrụmgbọlụ pụnḅọ sọ! Gbọrị iru sọ ḅuka ḅaraḅụ iru ị́ tọrụ sọ! Kpọịn koro iru sọ ị́ ḅịpị laka ḅaraḅụ jiajiama-mun!

¹⁰ Nyanaḅọ Ḅe ọ̀ mịẹse ị́ sịngịmẹ, ị́ gbun mọnọ kọnḅịa ẹrẹchị. Ịkịankoro apụma anị tomonima tọrụmgbọlụma sọ gbẹịnye-ẹ, ọkụma Tamụnọ Ḅe inia tọrụmgbọlụma ọ̀ pụnmamẹ, ọ̀ pịkị ye ọrị apụma se inia tịḅị ma gbẹịnmẹ.

¹¹ Ịkịankoro apụma ịkịan ḅụ ọrịye goyegoye fiearịye ini se ọ́ ḅọịmaḅịa, ini ye se oḅolosa fangala ḍiri sime ọkụ simeḅịa. Ị́ nemikase anị se mun ḍiri go ḍinḅọ pịrịmẹ na ori anị go ị́ pịrị-ẹ ḅẹḅẹ, ọ̀ nwọḅẹḅịa ori ine ẹkẹ anịatịḅị ini ye se anị oḅolomẹ.

¹² Ị́ nemikase anị se ḍiri go ḍinkaḅọ pịrịmẹ na ori anị go ị́ pịrị-ẹ ḅẹḅẹ, ori ị́ pẹkẹrẹḅịa na à goḅịa ọkụ à nemikẹ.

¹³ Nyanaḅọ Ḅe nwọ ḅẹmẹ, “Mịnapụ ma ini ḅereni ọkịmẹ na ini ị̀ tẹkẹḅịa, ọkụma inia ọkwẹịn ma yeḅụsọkẹ, inia kuḅiemgbọlụma pịkị jịn anga ḅụ omi-ẹ. Inia ḅereni mị jịnyekẹ, tomoni chụa olokoma na, ama mịẹmịẹaye ma na sakị sikima, ma anị ini se inia kuḅie chụa se ḅịpị ḅụ gopakụmarịye ma-ẹ.

¹⁴ Anịẹrẹchị, ḅụnemika ḅụ à gbọrị ḅalafama ịkpụlụ se ini ḅakụso jịnye pịkị ini laḅịa. Yenemiapụ ma ini ḅo oḅori apụ sọḅịa, se inia nemi mị mgba papaye sọḅịa.”

Kuḅie-Se-Tọrọkọ Pakaḅịaye Ḅụgbana

¹⁵ Ini tọn ayema nwọse Nyanaḅọ Ḅe ḅọịma apụma ini fasam! Ini ḅọịma ini mịẹḅịaye ma mịẹse nwọ koroma aḅẹ wa mịẹaye ma ọrịḅịa ḅọ ofori-ẹ, anịkanịka wa mịẹaye ma nemiḅịa ḅọ ofori-ẹ.

¹⁶ Yegoyegoye ini pịkị iḅomẹ. Nde yesọtẹịnye, ḅẹlẹtẹmẹḅọ ḅe anịkanịka aḅaịn mị? Tomoniḅọ ḅe tẹmẹsaye ineda ọ̀ ḅẹḅe na “Ị́rị́ ị̀ tẹmẹkẹ?” Anịkanịka anị ineda ọ̀ ḅẹḅe “Ị́ mịẹarịye ị́ nemikẹ?”

¹⁷ Ọkwẹịn mị nwọ ḅẹmẹ na ḅọlọka sịkị ḅụ opu piri mị anị ḅo ozukiri sọḅịa, anịsịkị ozukiri mị pịkịma ḅo opu piri sọḅịa.

¹⁸ Anị ene mị ḅolaḅịa sịkị, ḅeri inikiapụ ma ini nweni go pakụmaḅịa ḍiri nwọ naaḅịa, pịkị kanakana ḅie anga tọrụmgbọlụ pụn apụma, inia tọrụmgbọlụma ini finji se ye ọrịḅịa.

¹⁹ Anịsịkị ḅolaḅịa sịkị igwein se ḅụ iderima apụma ini Nyanaḅọ Izrẹl fịafịa Tamụnọ Ḅe, pịrị ḅieḅẹlẹ mị nwọ nyanaḅịa.

²⁰ Jịn apụ pụnụma pụnụma apụma na Tamụnọ ḍikisimasima apụma na, anị inia kuluma mị-ẹ. Simịẹḅọ goyegoye ini ḅaaḅịa.

²¹ Ini nwọ jịn apụ ḍukosimarị apụma na, fomuḅara se siye mịẹapụ ma pịrị mị ḅereni-ḅerenika apụma na, pịkị iruokọn karakaraye mịẹapụ ma ọgọnọ gbana se ini ḅarị ḅẹrẹ-ḅara-iḅi nyana-nyanaka apụma na, Tamụnọ Ḅe ori ini ḅaaḅịa.

²² Anịẹrẹchị mịọkụ, Nyanaḅọ Izrẹl Tamụnọ Ḅe, ḅụfụka ḅie Ebraham ḅe ḍụaḅọ ḅe nwọ ḅẹmẹ, “Ị̀ya tomoni, ọ́ ḅarị ngịsị ḅụgerere nyana ẹkẹ, ọ́mịna tọrụ ma, ḅarị pịkị ḅụgerereḅụ pàmáḅịa ẹkẹ.

²³ À se ọ́ pịrịḅịa awọma ọ́ nwọ ọrịḅịa sịkị, anị ó nemiḅịaye-ẹ na Ị̀rị̀ anị fịafịa Izrẹl Tamụnọ Ḅe-ẹ. Ómine osi se ị̀ pịrịḅịa, pịkị ị̀ ḍikiḅalafaḅụ sịsẹchịẹ ị̀ pịrịḅịa.

²⁴ Yenemika apụma ini yekaịnḅo mị ḍawọḅịa, anịsịkị, sịkịmamgba mbụrụmbụrụ àrị apụma, yese-ini telima mị inia ḅie ḅẹlẹmaḅịa.”