Aịzaya 27 - Kịrịkẹnị Baịbụl

¹ Anị ene mị ḅụ Nyanaḅọ Ḅe oria kụrọ-ḅalafama-okola-agiji mị ọ̀ nwọ seni sọnọma tịḅị nyana namaḅẹ ḅaaḅịa pịkịna tọrụ mị ḅie sime ḅalafama dragọn ḅe na ḅaaḅịa.

² Anị ene ḅụ Nyanaḅọ Ḅe oria iḅi irumịẹ chịnmgbọlụ ozu mị ḅụ ọ̀ nwọ ḅẹḅịa,

³ “Àrị anị ḍikiḍikimẹ, pịkịna sịkịmamgba mengi seni anịaḅụ sarasaramẹ. Àrị anị ḍikiḍikimẹ ḍin-na-enekaka-na-ḅụ mịẹse gbọrịḅọ sọnị anịaḅụ yesima ẹka ọkụ.

⁴ À ḅarị ịganị irumịẹ chịnmgbọlụ ozu mị pịrịkẹ. Nemikase ịga na nangị na àrị na owusọ ḍọkịmẹ ḅẹḅẹ, anịsịkị à gbọtụma àrị dọkịma famaḅịa.

⁵ Ọkụma ị̀ya tomonima na tarakapụma ḅimẹ na àrị agbọ sọ ini pịrị-ẹ nwọ ḅẹḅẹ, ye iniḅo ị̀rị̀ na deinma mịẹ. Iin ye iniḅo ị̀rị̀ na deinma mịẹ.”

⁶ Ḅoḅịa enema ḅie, Izrẹlapụ, Jekọb furo ḅie pakaḅo apụma, eje kuno chụa ọkụ ini nwọ chụaḅịa, ini pịkịna ngwengwe chụa seni fịaye chụaḅịa. Ini pakụmaḅoḅịa chịnmgbọlụma sẹkiri mị mgba kelemaḅịa.

⁷ Izrẹlapụma, inina-tarakapụma siḅara seni fomuḅara daọkụ ini ọkọ seni fomuḅara dasa Nyanaḅọ Ḅe ḅaraḅie? Ini ḅaa apụma fị ọkụ ini ọkọ se fị sa?

⁸ Nyanaḅọ Ḅe oria tomonima seni kụrọḅaraḅụ jịn sẹ sẹịn fomuḅara anị ò seni ini pịrịpịrịye-ẹ. Ịrụa mị pakaḅoḅo nyọ si-fọrụ, mị ò seni ini vukuma sinsinye-ẹ.

⁹ Ọkụma Izrẹl mị mịẹasi ma ḅụ ini ḅarasin ini pịrịḅịa, anị oruḅẹrẹ nemiapụ ma seni agbamịẹmịẹ ḍụparị ẹbẹ ma ini nwọ gbẹịn dẹkịdẹkịma toru ḅara wẹrị sịkị, pịkị insẹnsị dọkịma ẹbẹ na pịkịna Ashera, eremeni-oru-lụgụ mị na so sịkị re anị mịn mị mịẹḅịaye-ẹ.

¹⁰ Ini mịẹkụrọma opuama mị guluguluḅie anị omi-ẹ. Ini koromaso seni gbọrịye sọnị ḅie ofori piri ele kịkẹmẹ. Anịḅo nama yefịfị ele sọsam, àrị ịnyọsara pịkịna osuein fịfịḅịa nyọ.

¹¹ Eje ịkpangị ma samịna se sokoro-sarasam, seni eremeni àrị kpokponima semun fịnị mịẹmẹ. Anịatịḅị tomonima ini kaịnḅosaye ma ofori-ẹ. Ini Tẹmẹ Tamụnọ Ḅe ori ini ḍikitịḅịfoin anịkanịka ḍikiḅụgerere nyana ini pịrị ẹkẹ.

¹² Anị ene mị ḅụ, Yufretis ḅụ ọkịmun Ijipt eke mị la, Nyanaḅọ Ḅe, ori oria tomonima kolokoloḅịa gbọrịḅọ gbọrịḅọ, anị tomoniḅọ ịpịamgba ḅie osirosiroḅa sẹlẹ sikima ọkụ.

¹³ Anị ene mị ḅolaḅịa sịkị, ini epelepe ofuroḅịa anị seni ini ọmụ ḅie ini kunso Asiria na Ijipt na mun Izrẹlapụma chịn-pịkịmaḅoḅịaye-ẹ. Ini ḅo Jerusalẹm ḅie Nyanaḅọ Ḅe tẹkẹtẹkẹḅịa oria osi nyana chịngị mị ọgọnọ.