Aịzaya 26 - Kịrịkẹnị Baịbụl

Tamụnọ Ḅe Ori Ọmụḅaraiḅi Seni Oria Tomoni Ma Pịrịḅịa

¹ Tomonima Juda ama ḅie mị nime chuḅịa gbọrị ene ḅoaḅẹ: Mịna opuama mị kụrọmẹ! Tamụnọ Ḅe na mịnaḅụ na owusọ anịa onu ma pịrịmẹ!

² Opuama mị onu ḅọkọ ma finji seni ye ḅereni nyana sẹma sọḅo, anị karakaraye mịẹ-a tomonima sẹ mị.

³ Ị́rị́, Nyanaḅọ Ḅe, iḅi deinma seni iniaye mịẹḅụ kụrọmachịẹ apụma na, pịkịna kuḅie seni ị́ ḅụgbana apụma na pịrị.

⁴ Kuḅie seni Nyanaḅọ Ḅe ḅụgbana gbaso; sịkịmamgba ọ̀ wa ḍikiḍikiḅịa.

⁵ Ori ini iderimasam opuaye mịẹmịẹ apụma; ini anga kụrọ ama mị ọ̀ kanmẹ, seni anịa onu ma kankọsị fọn mịẹmẹ.

⁶ Ini pụndapụ ma anịa ọgọnọ nwẹngị ḅọrọmẹ mịọkụ, seni inia ḅụọma seni anị nanga kiripịrịmẹ.

⁷ Nyanaḅọ, ị́rị́ ateli mị mịẹ seni anị mọnịmọnị iḅiapụ ma pịrịmẹ; ini nwẹngị ateli mị kpụlụkụ kpụlụkụ kẹ.

⁸ Wa ị́ tọnye mị ḍukonwẹngịmẹ pịkịna mịna kuḅie seni ị́ ḅụgbanamẹ; ị́rị́ ngẹrị anị wa ḅiye-ẹ.

⁹ Ḍin mị ḅie ị̀ kuḅie mgba ị́ ḅụ chịẹ-chịẹ-chịẹ mẹ; ị́ ḅẹrẹkọn sẹkiri mị na anịa tomonima na pịrịḅịa sịkị, inimgba ini karakaraye mị ḍawọ nemiḅịa.

¹⁰ Ị́ iḅi seni sitịḅịnyanapụma mịẹmịẹmẹ nwọḅẹ sọnị, karakaraye mịẹ mị ngịsị ma ini pa ḍawọkẹ. Mịnyọ karakaraye mịẹmịẹapụ ama mị ḅie sọnị ini pa siaye mịẹ-aḅẹ; ị́ya opu mị ini nemiḍụkụkẹ.

¹¹ Ị́rị́na-tarakapụ ma ị́ ḅụfụka seni ini pịrịḅịa ọkụ ini nemikẹ. Nyanaḅọ, ini seni ḅụgerere ḅie chu seni mịẹ ini tọrụsiọrị; mịẹ seni ini ị́ karakaramasa tọrụsiọrị mị da. Se ini ḍie ị́ya tomonima ị́ nwọ ḅẹlẹma la-ọkụ.

¹² Mịẹaye ḅarasọ ị́ nwọ seni wa pịrịḅịa, Nyanaḅọ; wa nyanaye goyegoye ị́ya fịrịma ḍiepakụmamẹ.

¹³ Nyanaḅọ mịna Tamụnọ, jịn apụ ḅẹrẹtọn wa pịrịpịrịsam, ọkụma ị́rị́ ngẹrị anị wa Nyanaye-ẹ.

¹⁴ Mịọkụ ini fịsam ini pịkịna ḅarị ḍumo ẹkẹ; inia tẹmẹ ḅarị sịsẹ ẹkẹ, anịatịḅị ị́ fomuḅara seni ini pịrị pịkị ini ḅaasinsam. Gbọrịḅọ sọnị ḅarị ini seni ḅiekoromakẹ.

¹⁵ Nyanaḅọ, ị́ mịẹ seni mịna sẹ mị sẹnịsam, anịa eke ma pịkịna finjima finjima mun aḅẹ angana anganaḅụ; mịn mị pịkịna osi ọkịḅo ị́ pịrịsam.

¹⁶ Ị́ fomuḅara seni ị́ya tomonima pịrịmẹ, Nyanaḅọ, se ini ḅụakụ ḅụ tịḅịtu ị́ tẹkẹmẹ.

¹⁷ Ị́rị́, Nyanaḅọ Ḅe, mịẹ seni wa owupakụmamẹ, yiarị eremeniḅọ ḅụakụ ḅụ owupakụma ọkụ.

¹⁸ Wa ḅụakụ na opu ḅụfụka ḅie na simemẹ, ọkụma wa yi pakụmaye ofori-ẹ. Wa ọmụḅaraiḅi nyana mịna ama mị pịrịkẹ; wa mịẹ seni mịna ḅarasọye ofori-ẹ.

¹⁹ Mịna tomoni ḅụ fịsapụma ini pịkịna ḍumoḅịa! Inia ojuma pịkịmaḅo ḍumoḅịa. Inia iḍupuma ḅie mọnọarịapụ mamgba boma sịsẹ seni ḅieḅẹlẹ nimechuḅịa. Wananị-wananị ijiriji kiri mị mịẹ ịwọ ma ọkụ, anị Nyanaḅọ Ḅe ḅọlọsịkị ngịsị fịsapụma sịsẹmaḅịa ọkụ-ẹ.

Ḅẹrẹkọn Na Pịkịmaḅo Na

²⁰ Ó mun ọ́mịna warịma ḅie sọ, ị̀ya tomoni, seni ọ́ ḅọkọ ma palị ọ́mịnaḅụ pịrị. Ọ́ kalasịkị seni ọ́mịnaḅụ ḅọị, ọkịmun Nyanaḅọ Ḅe ịganị mị ḅọrọsịkị la.

²¹ Nyanaḅọ Ḅe soḅie ori anga nyọḅụ ò ḅoaḅẹ, fomuḅara seni sẹkiri ḅie apụma pịrịḅịa inia sima gose. Ḅọịma ḅụ ini kọn nini ma, àrị ḅelepakaḅịa, kiri mị sọnị ḅarị ngịsị ini ḅaasapụ ma ḅọị ẹkẹ.