Aịzaya 24 - Kịrịkẹnị Baịbụl

Nyanaḅọ Ḅe Ò Fomuḅara Seni Sẹkiri Mị Pịrịḅịa

¹ Nyanaḅọ Ḅe ọ̀ sẹkiri mị kan se anị wẹrịso se anị yawụ se nweni anịa ḅie angaka ḅaraḅụ anị gbọngọlọma simeḅịa. Ọ̀ sẹkiri mị guluguluma seni tomonima galagalamaḅịa.

² Tomoniḅọ goyegoye anị gbọrị si fụḅara mị nụḅọ laḅịa, agbamịẹapụ na tomoni ma na, omoniapụ na omoniapụ nyanapụ na, igbiki seni ḅọlọ pịrịpịrịapụ na igbiki ḅọlọḅọlọapụ na, yedẹrịdẹrịapụ na fẹfẹapụ na, pịkịna alapụ na igwein apụ na.

³ Sẹkiri mị kangalagala pịkịna siḅịa. Nyanaḅọ Ḅe ọkọ ḅẹmẹ anị pịkịna mịẹḅịa.

⁴ Kiri mị samịnaḅịa, ịnyọ pịkị anịaḅụ faḅịa, tomonikiri mị mgba ḅụ ịnyọ faḅịa; kiri mị na so mị na ḅụrụmẹ.

⁵ Tomonima ini sẹkiri mị pụlamasam, anị Tamụnọ Ḅe olokoma kan pịkịna ori-ini-na-fị sime gbasoḅịa ọḅọkụ mị kanye gose.

⁶ Anịẹrẹchị Tamụnọ Ḅe ò worinime seni sẹkiri mị ọgọnọ gbanasam. Anịa ḅie angapụma ini mịẹaye ma ini nwọ gbẹịn aḅẹ. Boka kalapụ kẹngẹ anị ḍumoḅịaye-ẹ.

⁷ Iru-mịẹ-tụmgbakị-elelenda ozuma fịaḅẹ, iru pịkịna kụrọaḅẹ, gbọrị-sịkịḅụ ḅieḅẹlẹḅọ goyegoye mịọkụ ngịrịaḅẹ.

⁸ Inia ọbọ ma na akwa ma na, ini farị se inia ḅieḅẹlẹma-ḅẹlẹma nime ma na sọnị kulumasam.

⁹ Iruḅu sịkịḅụ ḅieḅẹlẹ-a nime chu ḅarị ofori-ẹ; anịa tọrụḅẹlẹ nyana gbọrịḅọ sọnị ḅarị ofori-ẹ.

¹⁰ Opuama mị ḅie yegoyegoye ḅarị ọrụtọnkẹ, ḍumo gose tomonima ini ḅọkọ-ịkasị iniaḅụ pịrịmẹ inia warịma ḅie.

¹¹ Tomoni ateli ma ḅie olokumẹ anịatịḅị iru ḅarị ofori-ẹ. Ḅieḅẹlẹ fa gbamasosam; ama mị ḅie ini olokochụa anị famasam.

¹² Opuama mị anị kangulugulu ḅụ omi-ẹ, anịa onu-opu-a-ḅọkọ ma ini kangbinsam.

¹³ Mịn mị anị sẹ goyegoye ḅụ pakaḅịaye-ẹ, bebe tomonikiri mị kelema. Anị fịaye soku sịkị ḅe kuluma kịkẹḅịa, anị ini oliv chịnmgbọlụ mamgba kaịnso pịkịna iru-mịẹ-tụmgbakị-elelenda ozuma ḅie kulumaye ma gbalasoḅịa sịkị.

¹⁴ Fị̀kapụma ini ḅieḅẹlẹ ḅụ nime chuḅịa. Ịrụasọsọ nyọ daọrụ ḅụ sime apụma Nyanaḅọ Ḅe opusọ la-ọkụ ini nwọ ḍukoḅịa.

¹⁵ Anịsịkị ịrụapakapaka nyọ daọrụ ḅụ sime apụma ini ò bomaḅịa. Tọrụ aka ḅụ angapụma ini Nyanaḅọ, Izrẹl Tamụnọ Ḅe bomaḅịa.

¹⁶ Tomonikiri mị ḅie ḅọlọtẹịn anyọ ma ḅụ sime a sẹma se Izrẹl karakara sẹ mị bomaḅịa nime wa nwọ naaḅịa. Ọkụma à seni kuḅiekụrọmaye ofori-ẹ! À papa fịfaḅẹ! Ịbafịapụ pa ịbafịaḅẹ! Ini kọn àrị iruo ma pa sitẹịnma mun aḅẹ.

¹⁷ Tomoniḅọ goyegoye ị̀ poki! Ḅalafamaye na, olulu na, ḍẹịn na ị́ koruaḅẹ.

¹⁸ Ḅalafamaye mị ḅụ mangịso ḍọkịḅọ sokoro olulu ḅie sọḅịa, pịkịna olulu mị ḅie mangịso ḍọkịḅọ goyegoye ḍẹịn nụḅọ kunḅịa. Sotọrụḅụ ene siḅara koroḅịa, seni sẹkiri chukusẹkẹ ayema jikeḅịa.

¹⁹ Kiri mị gẹịnpu seni gbọtụma pu finjiḅịa.

²⁰ Kiri mị na mịnaḅụ na anị iruḅuḅọ jiajia ọkụ jiajiaḅịa, pịkịna opu-irisi ḅie kalawarị wema-nwọda-nwọda ḅara anị anị simeḅịa ọkụ-ẹ. Tomonikiri mị mịẹ si anị pụnụmasam. Anị kankoroḅịa seni ḅarị pịkịna ngịsị sịsẹ ẹkẹ.

²¹ Nyanaḅọ Ḅe ò fomuḅara seni ọgọnọju kụrọ apụma na sẹkiri ḅẹrẹtọn-arị-apụ ma na pịrịḅịa gbọrị sịkị ḅoaḅẹ.

²² Tamụnọ Ḅe olulu ḅie sime ikoliapụ sime ọkụ sime ḅara ọ̀ nwọ seni amanyanapụ koḅiri gbolomaḅịa. Ori ini seni ikoliwarị ḅie ịkasị koromaḅịa ọkịmun inia fomuḅara ḅo ini lasịkị laḅịa.

²³ Akalụ mị kanakanaḅịa, ịrụa mị sọnị ḅarị pịkịna ḅịa ẹkẹ, anịatịḅị Kụrọmamgba Nyanaḅọ Ḅe ori amanyanaḅọ sọḅịa. Zaịyọn Tụndụ mị ọgọnọ sime Jerusalẹm ḅie ọ̀ ḅẹrẹtọnḅịa seni tomonima ḅie tịḅịnịma oria boma mị ọrịḅịa.