Aịzaya 21 - Kịrịkẹnị Baịbụl

Babilọn Mị Ḅịkịsam Ḅe Ịkịan

¹ Mịn mị anị Babilọn mị na gboloma oku-ẹ. Ajisaka-fọrụ fie piri ele mị ḅie saḅa ḅọrọ ọkụ, anị ama kanguluguluma mị gbọrị ama ḅie ḅalafamaye se ḅoḅịa ọkụ-ẹ.

² Mịẹḅịaye simeḅịa siye ḅe ịkịan à nwọ ọrịmẹ, anị ịbafị na yeguluguluma na, ḅe ịkịan. Ilam owuni, ómine owu paka! Midia owuni, ómine opuamama ḍẹkịkelema! Babilọn mị mịẹse tomonima tọrụsiọrịaye ma, Tamụnọ Ḅe ọ̀ mịẹse àrị kunoḅịa.

³ Tẹmẹ ḅie ḅụ, àrị ọrịye na, à naaye na, mịẹse ḅalafa na ḅụakụ na ị̀ ḅie ḅeinmẹ, tọkụ yiḅịa ẹrẹchị jikearị eremeniḅọ ḅụakụ ọkụ simemẹ.

⁴ Ị̀ tịḅịḅie galagala ḅe ḅalafa ḅụ ị̀ ḅụ pịkị geregereaḅẹ. À ḅimẹ saso be sọ, ọkụma anị se ḅo ị̀ pịrị jịnye ofori-ẹ ḅalafa sakịsikima.

⁵ Tẹmẹ ḅie ḅụ, ini alalị fịaye karakarama koromamẹ; igoniapụma simeḅịa ẹrẹchị, ini iku kiri-gbẹịnye anya koroma ini pịrịmẹ ini simeḅịa ẹrẹchị. Ini fịaḅẹ, ini pịkị ḅuaḅẹ. Bẹkẹma ḅaraḅụ, kụrọpịrị oloku pụkọ fie pakasam: “Owunitịḅịnị ómine ọ́mịna agbọ ma karakarama wẹrị!”

⁶ Se Nyanaḅọ Ḅe nwọse ị̀ ḅẹmẹ, “Mun nyọ koruḅịa owuniḅọ se anịju koroma se ḍuko ọ̀ pịrị na ori ọrịye ọ̀ nwọ ḍukopakụma.

⁷ Nemikase asụn ọgọnọ mama apụ ḅụ sụngụma ḅoarị owuapụ na, pịkị yepụra asụn ọgọnọ ḅoarịapụ na pịkị ike-nambulo ọgọnọ ḅoarịapụ na, ọ̀ nwọ ọrịmẹ ḅẹḅẹ ori iḅiọkụma kweinma ini ḍiki.”

⁸ Nyọ koru owuniḅọ ḅe, oloku se nwọ ḅẹmẹ, “Ị̀ nyanaḅọ, ḍin-na-enekaka na ḅụ, à chịẹ nyọ korukoru nyọ mị ḅụ à chịẹ nyọ mị korumẹ.”

⁹ Bẹkẹma ḅaraḅụ ini ḅomẹ! Asụn ọgọnọ owuni mama apụ mama apụ ḅụ sụngụmamẹ. Nyọ koru owuniḅọ ḅe ọ̀ ḅẹrẹ mị ḍukopakụmamẹ, “Babilọn mị ḅịkịsam! Ini tẹkẹtẹkẹ oru mamgba kiri ọgọnọ àrị kọsị, galagala sara waraḅẹ.”

¹⁰ Ị̀ya tomoni Izrẹlapụ, fịturu mịẹ ịpịamgba nanga ọkụ ini nwọse ọ́ nanga-nangamẹ, ọkụma Kụrọmamgba Nyana Izrẹl Tamụnọ Ḅe ḅụ à naa iḅi oku mị à nwọ ḍuko ọ́ pịrịsam.

Idọm Mị Kpakịma Oku

¹¹ Mịn mị Idọm mị kpakịma oku-ẹ. Idọm ḅieḅụ gbọrịḅọ ị̀ chịnmẹ, “Nyọ koru owuniḅọ, nde sịkị ḍin mị anị ḅo ḅọrọḅe? Anị ḅo kulumaḅịa sịkị nwọ ḍuko ị̀ pịrị.”

¹² Àrị ọ̀ pẹkẹrẹmẹ na, “Dede mị ḅoaḅẹ, ọkụma ḍin pịkị ḅoḅịa. Ị́ nemikase pịkịna gbelaḅịa ḅẹḅẹ, pịkịmaḅo se gbela.”

Arebia Mị Kpakịma Oku

¹³ Mịn mị Arebia mị gboloma oku-ẹ. Ómine Didan apụ, ómine kpokpo ḅụ tụḅokọnkọn sẹ mun ọ́mịna ikowarịma se Arebia sẹ ḅie gbọrịye sọnị ofori papa kpekiri ọgọnọ pike se ịnyọsara-sara-apụ,

¹⁴ ó mengi se ómine damaḅo mengi pụkọtarị àrị apụma pịrị. Ómine Tima ama apụ, ó fịye se ḅo ịnyasọ apụma pịrị.

¹⁵ Tomoni ḅụkarakarama ini ḅaaḅịa okola-agiji ma na, ḅụkarakarama ini tẹịnḅịa lubu ma na ḅụ, pịkị ọmụ se ḅoḅo jịn ḅalafama siaye mamgba ḅụ mangị soaḅẹ.

¹⁶ Anịsịkị Nyanaḅọ Ḅe nwọse ị̀ ḅẹmẹ, “Anị ḅo gbọrị kụra laḅịa sịkị Kida sẹma arịa opu faḅịa.

¹⁷ Kida ḅie lubu-tẹịntẹịn apụma anị Kida ḅie kuḅie kụrọtẹịn apụ ma-ẹ, ọkụma boka kalapụ kẹngẹ anị iniaḅụ kọnḅịaye-ẹ. Ị̀rị̀ Izrẹl Nyana Tamụnọ Ḅe ọkọ ọkwẹịnmẹ.”