Aịzaya 20 - Kịrịkẹnị Baịbụl

Papaḅụ Sin Ịkịankoroḅọ Ḅe Elekima

¹ Sagọn Asiria Sẹdaḅọ ḅe kụrọ pịrịye gose, anị Asiria ọmụ kụlọdaḅọ ḅe owu se Filistia apụ opuama, Ashdọd mị pakaye-ẹ.

² Owu mị ma ini nwọ pakaka ḅe tẹrẹ-a kụra ḅụ, Nyanaḅọ Ḅe ò ḍuko Aịzaya, Emọs yaḅe pịrịsam na ori ọ̀ ḅụọ sime ḍiki-akpaka ma na ò ḅiri-okuru-ḅiriaye ma na, nwọ sin. Ori ọ̀ ḅịpị poki se papaḅụ na papa ḅụọ na nwọse nwẹngịma ḅọrọmẹ.

³ Ini Ashdọd mị nẹngịma sịkị, Nyanaḅọ Ḅe nwọ ḅẹmẹ, “Ị̀ya fịrịnwẹngịḅọ Aịzaya ḅe tẹrẹ-a kụra ọ̀ nwọse papaḅụsin pịkị papa ḅụọ na se nwẹngịma ḅọrọsam. Mịn mị anị Ijipt na Itiopia na ḅụ pakaḅịa elekima-ẹ.

⁴ Asiria Sẹdaḅọ ḅe àrị mama sẹma ḅie ò kunsoḅịa ikoliapụma inia papaḅụ, ḅụ mị ori ini se soḅịaye-ẹ. Ayamburama apụ na olomu apụ na papa ḅụọ ini nwọse nwẹngịḅịa ini pịkị papaḅụsinḅịa, inia tumo-a pẹkẹrẹ ma ḅọịka ḅụ, se anị ḅụgerere ọkịḅo Ijipt mị pịrịḅịa.

⁵ Ini nwọ inia kuḅie se Itiopia ḅụgbana pịkị Ijipt mị se ḅịpị kpọma ḅọrọ àrị apụma inia-ḅie-tọn-aye inia ḅieḅaraḅịa, ini kọn koroma ma galagalasam.

⁶ Anịsịkị mị ḅo laḅịa sịkị, Filistia tọrụ aka ḅụ angapụma ini nwọ ḅẹḅịa, ‘Wa se ḅietọn ma Asiria sẹdaḅọ ḅe ḅara ḅie wa ḍụaḅịa nwọḅẹ apụma ḅụpakaye ḍiki! Nde wa ineda ḍumoḅịa ọkụ?’”