Aịzaya 19 - Kịrịkẹnị Baịbụl

Tamụnọ Ḅe Ò Fomuḅara Se Ijipt Mị Pịrịḅịa

¹ Mịn anị Ijipt mị gboloma oku-ẹ. Nyanaḅọ Ḅe soḅuno mị ọgọnọ ò be sarama Ijipt ḅoaḅẹ. Ijipt apụ oru ma arịa ḅụgeregere aḅẹ ọ̀ tọrọkọ ḅụ, Ijipt apụma sọnị ini ḅarị kuḅiekụrọ nyanakẹ.

² Nyanaḅọ Ḅe nwọ ḅẹmẹ, “À mịẹḅịa Ijipt ḅie ini ama owu nwọ sọ, mịnaḅọ mịnaḅọ na tụḅụrụ ḅịa, kpekima anga apụ ḅịpịogbosọ ẹkẹ. Opuama ma, àrị jịn ama jịn ama na owu sọḅịa, anịsịkị amanyanapụma ḅie ị̀rị̀ opu sọtẹịnmẹ nwọ ḅẹ ḅe nụnụaye inia ogboku pakaḅịa.

³ À mun Ijipt apụma tọn ayema dachịẹma-ẹmun-aḅẹ, à pịkị mịẹḅịa ini tọn ayema ini gbọtụma nwọse ḅieḅaramaḅịa. Ini inia oru ma ḅẹḅịa na àrị ḅarachụa ini pịrị, ini pịkị mun ḅịrịapụ ḅara yegbelaḅịa, ini mun pịkị tọrụtoluapụ ḅụ ḅọrọ fị ḅọrọsa apụ tẹmẹ ma chịn se tetema ḅiḅịa.

⁴ Ijipt mị, àrị anị daḅọrọma se kụrọtịḅị ḅie nyanaḅọ pịrịḅịa anị ḅẹrẹtọn ini pịrịḅịa kụrọtịḅị ḅie nyana amanyanaḅọ. Ị̀rị̀, Kụrọmamgba Nyanaḅọ Ḅe, ọkọ ḅẹmẹ.”

⁵ Naịl tọrụ mị ḅie, mengi mị iderimaḅịa, anịsịkị tọrụ mị anị kelekelema samịna faḅịa.

⁶ Tọrụ mị nwọ kelekelema samịnarị sịkị okolo ma àrị fụrụḅịa. Tọrụ aka ḅụ osueinma na ịnyanya ma na àrị fịḅịa,

⁷ anịsịkị Naịl Tọrụ mị aka ḅụ ini ḍipi fịaye mamgba samịna fị, se fọrụ àrị ofuro sinḅịa.

⁸ Naịl Tọrụ mị ḅie inji ḅaa ḅụ wẹrị ḍumoarịḅọ goyegoye, nụḅọ ḅie de se pịkị owuḅịa; inia inji ḅaa arị ma na inia ịgbọ ma na ḅarị yeḅụsọ ẹkẹ.

⁹ Lọkọ ḅịtẹ ḍori-ḍori apụma inia ḅụḅalaḅalaḅịa.

¹⁰ Ḅịtẹ ḍori-ḍori apụma na pịkị ḅarafịrị nwẹngị ḍin apụma na, inia fịrịma ḅịkịḅịa se inia kuḅie siḅịa.

¹¹ Zoan opuama mị ḅie sime tịḅịnịma oḅoriapụ-ẹ! Ijipt ḅie yenemitẹịn apụma, nemi nyanakaye mị ini se nweni ma tetemarịye-ẹ! Nde ini ḅara-wẹrịma ḍuko amanyanaḅọ ḅe pịrị ọkụ na, ini ma anị ḅieju-a ḍiri nemi apụma na, amanyanapụma na ḍukoma apụ-ẹ?

¹² Ijipt amanyanaḅọ, ị́ tetema-tetema yenemi apụma nde anga ini omi? Sosi ini ineda Kụrọmamgba Nyanaḅọ Ḅe tọn koroma Ijipt mị pịrịye mị nwọ ḍuko ị́ pịrịḅịa.

¹³ Zoan tịḅịnịma na Mẹmfịs tịḅịnịma na oḅori apụ-ẹ. Ini anị mgbọkụ tịḅịda mị sẹ mị pịrịḅịaye-ẹ, ọkụma ini anị dairimasam.

¹⁴ Nyanaḅọ Ḅe ọ̀ mịẹmẹ se ini pịrịarị tetema ma ḅụḅalaḅalamaye sọmẹ. Anị mị mịẹsosịkị Ijipt mị anị mịẹye goyegoye anị mịẹirimamẹ, anị iruḅu tọrụḅaamaḅọ ọsụn se nụḅọ ayema ọgọnọ ḅịkịma ḅọrọ ọkụ simemẹ.

¹⁵ Ijipt ḅie, anị ḅọrọ alaḅọ, anịkanịka igweinḅọ, anịkanịka ḅịpịḅẹrẹlaḅọ, anịkanịka nweni nemikaḅọ sọnị ineda ḅarachụaḅịa gbọrịḅọ sọnị ofori-ẹ.

Ijipt Mị Anị Nyanaḅọ Ḅe Tẹkẹ Ḅịa

¹⁶ Ijipt apụma ini eremeni ḅalafa ọkụ nwọse ḅalafaḅịa gbọrị sịkị ḅoaḅẹ. Kụrọmamgba Nyanaḅọ Ḅe ọ̀ ḅara ịsụn se ḅụfụka se ini pịrịḅịa ọkụ ini nwọ ọrị ḅịa sịkị, ḅalafa ḅụ iniaḅụ geregereḅịa.

¹⁷ Ijipt apụma, ini Judapụma ḍikiḅalafaḅịa, Kụrọmamgba Nyanaḅọ Ḅe tọn ini pịrị na iniaḅụ pakaḅịa nwọḅẹye ma inia ḅiekoroma sịkị goyegoye ḅụ.

¹⁸ Anịsịkị mị ḅo laḅịa sịkị, Ijipt apụ sọnọ-a opuama ḅie, Hibru apụ ọkwẹịn ini nwọ kọnkọnḅịa. Anị nyọ sime apụma Kụrọmamgba Nyanaḅọ Ḅe ẹrẹ ḅụ anị ini yekarị fịfịḅịaye-ẹ. Opuama ma ḅụ gbọrị ama ini se anị chịnḅịaye, “Ịrụa Opuama.”

¹⁹ Anịsịkị mị ḅo laḅịa sịkị, Ijipt ama mị ḅie ini agbamịẹ ẹbẹ nama Nyanaḅọ Ḅe pịrịḅịa ini pịkị gbọrị osi nyana ḍụparị nwọse Ijipt eke mị ḅụ pike koromaḅịa Nyanaḅọ Ḅe ẹrẹ ḅụ.

²⁰ Àrị elekima ḅara nwọse ḍiepakụmaḅịa na Ijipt ḅie, Nyanaḅọ Ḅe ọ̀ tọrụkuḅu omi-ẹ. Anị nyọ sime apụma, nweni ini pụnda se ini Nyanaḅọ Ḅe chịn olokumẹ ḅẹḅẹ, ori ini ḍụaḅịaḅọ se ini sẹịnmaḅịa.

²¹ Nyanaḅọ Ḅe ori ọ̀ ḅụ ḍiepakụma Ijipt apụma pịrịḅịa, anịsịkị ini ò ḅereni se ọ̀ tẹkẹtẹkẹḅịa, ini pịkị agba na agbamịẹ ḍiepịrịaye na se ḅo ọ̀ pịrịpịrịḅịa. Ini osiḅụ yeḅereni ọ̀ pịrị se pịkị ini ḅereniaye ma mịẹ ọ̀ pịrịpịrịḅịa.

²² Nyanaḅọ Ḅe ò fomuḅara se Ijipt apụma pịrịḅịa, ọkụma anịeso ori ini gwọḅịa. Ini vinpịkị ọ̀ damamunḅịa, ori inia tẹkẹma naa se ini gwọḅịa.

²³ Anịsịkị mị ḅo laḅịa sịkị, Ijipt apụma na Asiria apụma na ogboku gbọrị gonogono opu ateli pakaḅịa. Mịna mama sẹma ḅie sime apụma ini ḅọrọ-a ḅọrọ-a nwẹngị ideri nwẹngị iwoḅịa, mama sẹma àrị pịkị gboloma tẹkẹtẹkẹḅịa.

²⁴ Anịsịkị mị ḅo laḅịa sịkị, Izrẹl mị anịḅo Ijipt na Asiria na gbasịsam se ma tẹrẹ-a sẹma àrị ḅo ḅẹlẹma sọ tomonikiri mị mgba pịrịḅịa.

²⁵ Kụrọmamgba Nyanaḅọ Ḅe ori ini ḅẹlẹma se nwọ ḅẹḅịa, “Ijipt, àrị ị́ ḅẹlẹmaḅịa ị̀ya tomoni; ị́rị́, Asiria, ị̀rị̀ ị́ tẹmẹmẹ; pịkị ị́rị́ Izrẹl, à sẹlẹọkịsa tomoni.”