Aịzaya 18 - Kịrịkẹnị Baịbụl

Tamụnọ Ḅe Ọ̀ Ḅụfụka Se Itiopia Mị Pịrịḅịa

¹ Itiopia tọrụ ma ḅọrọ mun la gbọrị ama ḅie ini naamẹ fọrụ fieaḅẹ.

² Anị ama mị ḅie ḅụ, ini osuein se mịẹ arụ ḅie anị sẹ tọrụḍinma opuapụ ḅụkụlọ ḅo Naịl tọrụ mị laye-ẹ. Ó vinpịkịso warị mun, ḅụọ sara okunwẹngịapụ! Ómine oku se mun ọ́mịna ama, mengi ma pupu sikima amama pịrị, ómine ịnyọ nyana pịkị kụrọ sẹ, nangwọ nangwọ, ojuma mọnị mọnị apụma, ómine anị bebe tomonikiri mị mgba ḍikiḅalafarị apụma.

³ Poki, ómine sẹkiri ḅie angaḅọ goyegoye! Tụndụ ma ọgọnọ ini dekichịẹma ḅịa ịkpata ḅe elekima ọ́ nwọ ḍiki! Ini ofuroḅịa oḍu mị ọ́ nwọ poki!

⁴ Nyanaḅọ Ḅe nwọse ị̀ ḅẹmẹ, “Fịaye soku sịkị ḅụ, ijiriji mị mẹmẹma ḍin ḅie ḅụ anịaḅụ kpokponima ọkụ pịkịna ịrụa mị deindeinma enekakaḅụ ḅịaḅịa ọkụ mị anị à soḅie mẹmẹma tu nyọma ḍikiḅịa ọkụ-ẹ.

⁵ Ma ini tụmgbakị elelenda ma kolokoloka simeogbo, anịa chịnma tịḅị sime ngwengwe ma sara se tụmgbakị elelenda ma ḅịa àrị sịkị ḅụ tarakaḅọ ḅe, ori Itiopia apụma ḅalafamaḅịa, ori ini ḅaaḅịa ḅara kingi se irumịẹ chịnmgbọlụ ịkpangị pẹlẹ ọkụ simemẹ.

⁶ Inia owunima ḅie fị apụma ojuma ini se sarakoroma fenima na piri namama na pịrịḅịa. Ịrụa kpoin sịkị ḅụ fenima àrị arịa ḅụ ye kọn fịḅịa anịsịkị fọngụ sịkị ḅụ namama fịapụma ojuma ḅụ ye kọn fịḅịa.”

⁷ Kụrọmamgba Nyanaḅọ Ḅe, mengi ma pupu sikima amama ḅie, ò ḍiepịrịaye agba da ọkịḅịa sịkị ḅoaḅẹ. Mịn ịnyọ nyana pịkị kụrọ sẹ mị, mịna apụma nangwọ nangwọ, ojuma pịkị mọnị mọnị apụma, ini anị bebe tomonikiri mị mgba ḍikiḅalafarị apụma. Zaịyọn Tụndụ mị iniḅo laḅịa, anị Kụrọmamgba Nyanaḅọ Ḅe ini nwọ tẹkẹtẹkẹ nyọ mị.