Aịzaya 17 - Kịrịkẹnị Baịbụl

Tamụnọ Ḅe Ò Fomuḅara Se Siria Na Izrẹl Na Pịrịḅịa

¹ Nyanaḅọ Ḅe nwọ ḅẹmẹ, “Damaskọs mị anị ḅarị ngịsị opuama sọ ẹkẹ; opu sara re mị anị sọḅịaye-ẹ.

² Siria opuamama, nweni ḅarị arịa ḅie anga ẹkẹ, se àrị gbọngọlọma sime gbasoḅịa. Àrị ḅo nambulo na anana na fịfị osuein na ịnyanya na piri nwọ sọḅịa, pịkị àrị desinḅịa kpọkpọ gbọrịḅọ sọ ofori-ẹ.

³ Izrẹl mị anị ḍụaḅịaḅọ ofori-ẹ, Damaskọs mị anị ngẹrị anịatịḅị nyanamẹ ḅẹye mị ḅarị mịẹ ẹkẹ. Siria apụma ḅie fị kọnma apụma ḅụgerere inia tọrụ sọḅịa, anị ḅụgerere Izrẹlapụma ḅụ sọ ḅara mị. Ị̀rị̀, Kụrọmamgba Nyanaḅọ Ḅe, ọkọ ḅẹmẹ.”

⁴ Nyanaḅọ Ḅe nwọ ḅẹmẹ, “Gbọrị ene ḅoaḅẹ; Izrẹlapụma inia opu mị faḅịa ene, anịsịkị igwein ini nwọse inia pẹrẹ mị ḍinmaḅịa.

⁵ Izrẹl mị anịḅo ini ozu ḍipi se fịayema soku sinsa ozu kiri kịkẹḅịa, anịḅo Rifeim Pẹsịkiri mị ḅie ini pẹlẹ sin fịaye ozuma yawụ ọkụ yawụḅịa.

⁶ Kala apụ anị fịka ḅara ḅụ kọnḅịaye-ẹ, Izrẹl mị anị oliv eje kịkẹḅịa, anị ini anịa tịḅị ọgọnọ oliv mamgba kaịnso se maịn anịkanịka tẹrẹ-a mgbọlụ kẹngẹ anịa tịḅị ḅụ nwọ wẹrịso anịkanịka chukuju ịkpangị ma ḅụ kalaye kọnma oliv eje sime ọkụ anị Izrẹl mị anị simeḅịa ọkụ-ẹ. Ị̀rị̀ Izrẹl Tamụnọ Ḅe ọkọ ḅẹmẹ.”

⁷ Anị ene mị ḅo laḅịa sịkị, tomoni tọrụ pịkị ini Tẹmẹ Izrẹl fịafịa Tamụnọ Ḅe daḅịa.

⁸ Ini ḅarị kuḅie se ini inia ḅarama se mịẹ agbamịẹ-ẹbẹ ma ḅụgbana ẹkẹ, ini pịkị ḅarị kuḅie se ini ḅarana tẹmẹ oru-a tọrụ ma na anịkanịka Ashera eremeni oru mị na pịkị ini nama se insẹnsị dọkịma ẹbẹ ma ḅụgbana ẹkẹ.

⁹ Anị ene mị ḅo laḅịa sịkị, ini onu nama kelema opu-kụrọ amama ḅie sime apụma ini àrị koroma mangị soḅịa se àrị ḅo sara sọḅịa, anị Izrẹlapụma gose inia opuamama se gbin koroma mangịso Hivaị apụma na Amọraị apụma na inia opuamama se sara koroma se so ọkụ mị.

¹⁰ Izrẹl, ị́ ḍụaḅọrọma pịkị opu ḍụparị nweni ḅọị ọkụ nwọse ị́ ḅọị Tamụnọ Ḅe ị́ ò se ḅieḅaramasam. Anịnakaraka ị́rị́ ị́ mun osi-nyana-ozu ḍipimẹ anị ị́ se jịn sẹ oru tẹkẹtẹkẹḅịa ẹrẹchị.

¹¹ Ị́ àrị ḍipi gbọrị dede mị ḅie àrị ḅọrọ pakaḅo ịnyanya chụa sọnị, arịa ḅie ị́ soku fịḅịaye ofori-ẹ. Ḅụfụka na ngịsị ini ineda gwọ ẹka obi na ḅe ḅụakụ na kẹngẹ anị simeḅịaye-ẹ.

Tarakapụ Sẹ Ma Ini Àrị Inumamẹ

¹² Kụrọ sẹma àrị kamụ sọ nyọ fiema ḅịpịogbosọka ḅụḅalaḅala ḅie omi-ẹ, opu tọrụ ekerea ọkụ anị ini ekerearị ọkụ-ẹ, opu ambura tọrụ aka ḅụ mun kan ọkụ anị inia tịḅịḅie ma fiearị ọkụ-ẹ.

¹³ Ambura dachịẹma nyanaka se ḅo ọkụ anị sẹsẹ ma àrị ḅo àrị ọkụ-ẹ, ọkụma Tamụnọ Ḅe ori ịganị àrị pịrịmẹ, se àrị ọḅụdamẹ, chịngị ḅụ fọn sin ọkụ ini nwọse àrị desinmẹ anị ajisaka fọrụ osuein pumburo vukumasin ọkụ simemẹ.

¹⁴ Saso ḅiri ḅụ ini nyọ fiema se ḅalafamaye mịẹmẹ, ọkụma dede laḅịa sịkị ini sosam. Mịna ama mị gulugulumaḅọ goyegoye anị anịsime nụḅọ pịrịḅịa ọkụ-ẹ.