Aịzaya 15 - Kịrịkẹnị Baịbụl

Tamụnọ Ḅe Moab Mị Famaḅịa

¹ Mịn mị Moab mị gboloma oku-ẹ. Ar na Kị na opuamama gbọrị ḍin ḅie ḅụ ini àrị kansam, anịsịkị Moab ama mị gbọtụma yawụma gbẹịn simemẹ.

² Dibọn apụ, ọ́ chịngị mị kpọlị mun oru warị mị ḅie owu. Moab apụ ómine oloku owu, Nebo na Mẹdiba na opuamama gose; opu kururu ḅụ inia tịḅị-inime ma na ọgụrẹ ma na ini sẹịnsinsam.

³ Tomonima ateli ma ḅie ini okuru ḅiriaye ḅirimẹ; opuamama ogboku na warịma ọgọnọ na tomoni ngịrị se owumẹ.

⁴ Hẹshbọn apụma na Ẹliele apụma na, ini owupakụmamẹ, se inia owutịḅịḅie mị sasaju sime Jehaz apụma ineda anị naaḅịa. Owuni ma na mịnaḅụ na iniaḅụ geregeremẹ, inia kuḅiekụrọ mị fasam.

⁵ Ị̀ kuḅie Moab mị gose owumẹ! Tomonima ini mangịso Zoa ama mị na Ẹglat Shẹlishiya mị na munsam. Dapụ Luhit ama ateli mị kpọlịmẹ, ini mun-arị sịkị ini owuaḅẹ; dapụ mangịso Horoneim mun mẹ se kururu oloku kọn aḅẹ.

⁶ Nimrim kala-ideri-mengi mị samịnasam, anịa aka ḅụ sime osueinma fịsam, ịnyanya chụa gbọrịye sọnị ḅarị kọnkẹ.

⁷ Tomonima, ini Wilo Pẹsịkiri mị saḅaḅọrọ se pa ḅụkụrọma ini nyanaye mamgba seni mangịso aḅẹ.

⁸ Moab eke mamgba ḅụ tomoni owu-atịḅị-ḅie naamẹ. Ẹgleim ama na Biarilim na amama ḅie sọnị ini naamẹ.

⁹ Dibọn mengi-tọrụ mị, tomoni pulo anịa ḅie ḅeinmẹ, anịsịkị sitẹịnye Tamụnọ Ḅe pịkị nwọse anịanga simeapụma ọbịaḅẹ. Iin Moab ḅie kọnḅọ goyegoye ḅụ pulo ideriḅịa.