Aịzaya 13 - Kịrịkẹnị Baịbụl

Tamụnọ Ḅe Ò Fomuḅara Seni Babilọn Mị Pịrịḅịa

¹ Mịn anị Babilọn na gboloma oku-ẹ, Emọs ya Aịzaya ḅe Tamụnọ Ḅe ḅara daḅo oku.

² Gbọrị chịn sọ nyanaka gbọrị chịngị ọgọnọ, owuni ịkpata mị dekichịẹma! Oloku owunima pịrị se ị́ ḅara dekichịẹma elekima ḅaraḅụ ini da, na ini owu se opuaye mịẹmịẹ opuama mị onu ma paka.

³ Nyanaḅọ Ḅe, oria opuayemịẹ-pịkị-kuḅie-kụrọma owunima ọ̀ nwọ chịnpakụmasam, na ini fịafịa ọmụgbin se fomuḅara se ori ịganị nyana pịrị apụma pịrị.

⁴ Tụndụ ma ọgọnọ ịḅanị tịḅịḅie ma poki, opu tomoni ogbo ịḅanị tịḅịḅie sẹsẹ na, amanyanakiri ma na, koḅirimaḅẹ. Nyanaḅọ ọmụogbo mị tịḅịnịḅọ ḅe ori oria owunima karakarama ọmụ pịrịaḅẹ.

⁵ Ḅọlọju sẹma ḅie ini ḅoaḅẹ, sẹkiri ḅụ kuluma nyọma ḅie. Nyanaḅọ Ḅe oria ịganịḅụ, ò ḅo tomonikiri mgba fama-ẹ ḅoaḅẹ.

⁶ Ḅụ akụḅụ ómine oloku owu! Nyanaḅọ Ḅe oria ene mị kpekisam, anị Kụrọmamgba Nyanaḅọ Ḅe nyọ mị famaḅịa ene mị.

⁷ Tomoniḅọ ḅara goyegoye lọkọ-saraḅịa, kụrọkuḅie nyanaḅọ goyegoye nụḅọ kuḅiekụrọ mị nụḅọ gbakịḅịa.

⁸ Nwenimgba ḅalafaḅịa, iniaḅụ pịkị opuma ọyịḅịa, yiarị eremeniḅọ ḅụ ọyị ọkụ. Ḅalafaḅụ ini jụmḅọ jụmḅọ tọrụḍikiḅịa, ḅụgerere pịkị inia tọrụ sọḅịa.

⁹ Nyanaḅọ Ḅe ene mị ḅoaḅẹ—anị oria ḅalafama ịganị na opu-owoi-kuḅie na ḅe si ene mị. Sẹkiri mị ini seni onwun ele mịẹḅịa, pịkị siyemịẹḅọ goyegoye fịḅịa.

¹⁰ Lolia mamgba na pịkị ẹrẹ nyana lolia ma sọnị ḅịa ḅụ àrị dachịẹḅịa. Ịrụa mị pakaḅịa sịkị anị kanakanaḅịa, akalụ mị sọnị ḅịapaka ẹkẹ.

¹¹ Nyanaḅọ Ḅe nwọ ḅẹmẹ, kuḅie tọnka ḅalafama siaye à nwọ ọkịḅo sẹkiri mị ọgọnọ gbanaḅịa, à pịkịna fomuḅara se sitịḅịnyana apụma pịrịḅịa inia sima gose. Àrị opuaye mịẹḅọ goyegoye iderimaḅịa, à pịkịna fomuḅara seni ḅụdekichịẹmaḅọ goyegoye na, siaye seni jịn apụ mịẹmịẹ apụma na pịrịḅịa.

¹² Fịḅụ kọnḅịa apụma ini kụrọtẹịn goli kụrọ ọkụ nẹngịḅịa.

¹³ À mịẹḅịa so ma ḅụgeregereḅịa, anịsịkị sẹkiri mị jikeḅịa anị sime nyọḅụ, anị Ị̀rị̀ Kụrọmamgba Nyanaḅọ Ḅe, ị̀ya ịganị mị ḍiepakụmaḅịa ene ḅụ.

¹⁴ “Babilọn ḅie anga igoniapụma ini mangịso inia sẹma munḅịa, tụḅụra piride-apụ ọrị se galagala ọkụ, ananaḍikiḍikiḅọ nyanaka anana ogbo sime ọkụ.

¹⁵ Ini kunḅọ goyegoye ini temi ḅaaḅịa.

¹⁶ Mịẹḅịa ọkụ ofori ḅaraḅụ ini lelema ini ḍikiarịogbo ini inia awọmẹnịma fomufomuḅaḅịa, inia warịma ini ọfọịnḅịa, ini pịkịna kụrọḅara seni inia eremeni ma na gbolomaḅịa.”

¹⁷ Nyanaḅọ Ḅe nwọ ḅẹmẹ, “À Midiapụ ma chukurumaḅẹ ini owu seni Babilọn mị paka. Seleḅa sọnị ini abalakẹ, goli sọnị inia pụkọsolimakẹ.

¹⁸ Inia lubu ma na, ḍẹịn ma na ini nwọse asẹmẹnị ma ḅaaḅịa. Ini ndoarị awọmẹnị ḍikiḅụgerere ẹkẹ, ini pịkịna ḍikitịḅịfoin nyana awọmẹnị awọ pịrị ẹkẹ.

¹⁹ Amanyanakiri mamgba Babilọn mị iḅitẹịnmẹ; anịa tomonima anị seni opuaye mịẹmịẹmẹ. Ọkụma Ị̀rị̀, Nyanaḅọ Ḅe, à Babilọn mị sumagbinḅịa, à Sọdọm na Gomọra na mịẹḅara mị!

²⁰ Gbọrịḅọ sọnị ḅarị pịkịna mun anịnyọ ḅụ anga ẹkẹ. Nwẹngịma ḅọrọarị gbọrị Arab ḅọ sọnị ḅarị nụḅọ ikowarị pike ẹkẹ anịnyọḅụ, gbọrị anana ḍikiḍikiḅọ sọnị ḅarị pịkịna osuein seni nụḅọ anana pịrịfị ẹkẹ anịnyọḅụ.

²¹ Anịḅo onwun ele ḅie anganga namama anga nyọ sọḅịa, ikpikikpiki ma pịkịna anịnyọ arịa warị namaḅịa. Ọjụ-feni ma anịnyọ àrị angaḅịa, pịkịna piri oḅorima anịnyọ nwẹngịma nwẹngịma ḅọrọḅịa kansarasa nyọ mị ḅie.

²² Sokopi warịma na, amanyanapụ warịma na, ḅarachụa piri obiri ma na piriḅie-owoi-a nama ma na oloku tịḅịḅie ma ọkị ịḅanịma munḅịa. Babilọn mị anịa sịkị ḅo lasam! Anịa enema faḅọrọaḅẹ.”