Aịzaya 12 - Kịrịkẹnị Baịbụl

Mịẹḅaka Ḅẹ Nime

¹ Gbọrị ene ḅoaḅẹ tomoni nime chuḅịa, “Àrị ị́ tokonimẹ Nyanaḅọ! Ị́ ịganị nyana ị̀ pịrịmẹ, ọkụma mịọkụ ị́ ị̀ kuḅie kụrọmamẹ, ị́ pịkị ḅarị ịganịkẹ.

² Tamụnọ Ḅe anị ị̀ ḍụaḅọ-ẹ; à kuḅie se ọ̀ ḅụgbanaḅịa, se à ḅarị ḅalafa ẹkẹ. Nyanaḅọ Ḅe ọ̀ kụrọ na ịnyọ na se ị̀ pịrịmẹ; ori anị ị̀ ḍụaḅọ-ẹ.

³ Ịwọ dein mengi ḅieḅẹlẹ se pụkọ samịnaḅọ pịrị ọkụ, anị Tamụnọ-a tomonima ḅieḅẹlẹ ọkụ-ẹ ori ini ḍụaḅọrọma sịkị.”

⁴ Gbọrị ene ḅoaḅẹ tomoni nime chuḅịa, “Mịẹḅaka se Nyanaḅọ Ḅe ḅẹ! Ọ̀ chịn ọ̀ ḅarachụa ị́ pịrị! Ḍuko sẹ mamgba pịrị ọ̀ mịẹsaye mị! Oria opu mị la-ọkụ ḍuko ini pịrị!

⁵ Nime chu Nyanaḅọ Ḅe boma ọ̀ mịẹsa opuaye ma gose. Ye bebe sẹkiri mị mgba ḅẹrẹ mị naa.

⁶ Ye Zaịyọn ḅie angaḅọ goyegoye oloku ḅieḅẹlẹ nime chu! Izrẹl fịafịa Tamụnọ Ḅe ọ̀ ḍụḅamẹ, ọ̀ pịkị oria tomonima ogboku angamẹ.”