Aịzaya 10 - Kịrịkẹnị Baịbụl

¹ Ọ́ fasam! Ó kuraka oloko chụamẹ, seni ị̀ya tomonima pụnụma gose.

² Anịḅara anị ọ́ mịẹ seni igwein apụma inia karakara mị nyanaka pịkịna iḅi ḅẹrẹkọnḅịpị nyana nyanaka ọkụ-ẹ. Anịḅara anị ọ́ mịẹ seni deapụ fịsa eremeni ma na ḍapụ na nyengiapụ na fịsa awọmẹnịma ngọma ọkịkị ọkụ-ẹ.

³ Tamụnọ Ḅe ò fomuḅara se ọ́ pịrịḅịa sịkị ó chemịẹḅe? Ḅọlọ sẹ ḅụ ḅo ómine kangalagalamaḅịaye ọ̀ nwọse ḅo ọ́mịna ọgọnọ gbana ọkụma ó chemịẹḅe? Ọ́ mangịmun tụḅọ ḅara ịnyasọḅe? Ọ́mịna ngọma ó seni nde nyọ ḅọịḅe?

⁴ Ọmụ ḅie ini ómine ḅaaḅịa, anịkanịka ikoliapụ ḅara ini nwọ seni ómine fọnọsoḅịa. Anị ọkọ paka sọnị Nyanaḅọ Ḅe oria ịganị mị kuluma ẹkẹ, ọ̀ ḅara pa pịkịna fomuḅara pịrịḅịa ẹrẹchị ịsụnḅịa.

Tamụnọ Ḅe Asiria Sẹdaḅọ Ḅe Seni Oria Fịrịnwẹngịye Mịẹmẹ

⁵ Nyanaḅọ Ḅe nwọ ḅẹmẹ, “Asiria mị, à nwọ seni tomoni-fomuḅaa-mgbele mịẹ fomuḅara seni àrị ịganị pịrị apụma pịrịḅịa.

⁶ Àrị Asiria mị fịrịmamẹ ini mun ọmụ seni tamụnọ-nemika sẹ mị paka, ị̀ mịẹ seni àrị ịganị apụma. Àrị ini fịrịmamẹ ini mun ye-ọfọịn, furu, pịkị ịlọlịye nanga ḅara nwọ seni ateli ma ḅie tomonima nanga kiri pịrị.”

⁷ Ọkụma Asiria sẹdaḅọ ḅe sọnị, ọ̀ tọn siaye omi-ẹ ò kuḅie ọ̀ tọnpẹlẹsam na tọn tọn-a sẹ ọ̀ nwọ kọsịmaḅịa.

⁸ Ọ̀ nwọ seni ḅụbomamẹ, “Ị̀ya ọmụtịḅịdaḅọ goyegoye amanyanaḅọ-ẹ!

⁹ Kalno na Kakẹmish opuamama à àrị nẹngịmamẹ. Hamat na Apad opuamama sọnị à àrị nẹngịmamẹ. À pịkịna Sameria na Damaskọs na nẹngịmamẹ.

¹⁰ Oru-tẹkẹtẹkẹ amanyanakiri ma, àrị ị̀ ḅara ịsụn fomuḅara seni àrị pịrịmẹ. Oru ma àrị ḅakatẹịn Jerusalẹm na Sameria na nyana oru ma nẹngịmẹ.

¹¹ Sameria na anịa oru mamgba na à kọsịmasam, à pịkị anị gbọrịḅara mị seni Jerusalẹm na anịnyọ ini tẹkẹtẹkẹ lụgụ ma na mịẹḅịa.”

¹² Ọkụma Nyanaḅọ Ḅe nwọ ḅẹmẹ, “Zaịyọn Tụndụ mị ọgọnọ ḅụ na Jerusalẹm ḅie na à mịẹarịye à nwọ mịẹsosịkị, Asiria sẹdaḅọ ḅe, oria ḅụboma mị na oria opuayemịẹ mamgba na gose à fomuḅara seni ọ̀ pịrịḅịa.”

¹³ Asiria sẹdaḅọ ḅe nwọ seni ḅụbomamẹ, “Ma yemamgba ị̀rị̀ ngẹrị àrị mịẹmẹ. À kụrọmẹ, à nemi nyanamẹ, à pịkịna ọbịrịmẹ. À sẹsẹ ma eke ma wọlọmasin seni ini koko ayema tan ọkịmẹ. Nambulo ḅara à nwọ seni anịnyọ anga apụma nanga kiri pịrịmẹ.

¹⁴ Tomonikiri ḅie sime sẹma, àrị feni-warị kịkẹmẹ se inia ngọma ḅụfụkamaka ḅara feni-warị ḅie anyị kolokolo ọkụ à nwọ seni àrị kolokolomẹ. Gbọrị feni pamba sọnị jike ị̀ ḅalafamakẹ; ḅịpị finji oloku ị̀ da gbọrị feni sọnị ofori-ẹ!”

¹⁵ Ọkụma Nyanaḅọ Ḅe nwọ gbelamẹ, “Apala ineda ḅẹ ḅe, na anị re ḍụḅatẹịn anị seni fịrịnwẹngịarịḅọ ḅe nẹngịmẹ? Fịkịfịkị mị yesọtẹịn anị seni yepuarịḅọ ḅe nẹngị? Iku-owusọ-mgbele ineda tomoniḅọ dekichịẹma ẹkẹ, tomoniḅọ mị ineda iku-owusọ-mgbele mị dekichịẹmaḅịaye-ẹ.”

¹⁶ Kụrọmamgba Nyanaḅọ Ḅe, ori obi seni nwọ mịọkụ yefị ḅụlọ-ḅeinmarị apụma fịrịmaḅịa. Inia oju ḅie fịnị mị kọrịkọrịḅịaye-ẹ.

¹⁷ Tamụnọ, Izrẹl enekuḅu Ḅe, fịnị sọḅịa, Izrẹl fịafịa Tamụnọ Ḅe, ọ̀ kọrịarị fịnị ḅẹlẹ sọḅịa, anị kpọkpọ gbọrị ene ḅụ, ịga na nangị na dọkịmasinḅịa fịnị.

¹⁸ Yela-opu-piri ma na yela-iḅi-ozu ma na, arịmgba gbọtụma dọkịfaḅịa, anị tomoni ḅaaḅaa obi tomoniḅọ ḅaa-ọkụ.

¹⁹ Eje ma àrị faso-ọkụma boka eje kalaye mị kọnḅịaye-ẹ, kala tọkụ sọnị ineda arịa kịẹnḅịpị nemiḅịa.

Boka Kalapụ Pịkịmaḅoḅịa

²⁰ Gbọrị-sịkị ḅoaḅẹ Izrẹlapụma ḅie fịse kọn apụma ini ḅarị ḅụseni ini ḅaafama ọ̀ tọn sẹma ḅụ sẹrẹrẹ ẹka sịkị. Ini kọkọmaḅaraḅụ inia kuḅie seni Nyanaḅọ Izrẹl fịafịa Tamụnọ Ḅe ḅụgbanaḅịa.

²¹ Izrẹlapụma ḅie boka kalapụ vinpịkị inia opu Tamụnọ Ḅe damaḅoḅịa.

²² Mịọkụ sọnị, Izrẹlapụma tọrụ aka ḅụ onwunmgbọlụ ḅaka ọkụ ini nwọ ḅakamẹ ḅe sọnị, boka kalapụ kẹngẹ mị pịkịmaḅoḅịaye-ẹ. Kankọsị sime tomonima koruaḅẹ, anị pịkịna jokoma ini la gbẹịnmẹ.

²³ Iin, bebe sẹ mị kelemakoro Kụrọmamgba Nyanaḅọ Ḅe, ọ̀ fị-na-fa-na ọkịḅo inia ọgọnọ gbanaḅịa, anị ọ̀ mịẹḅịa ọ̀ nwọḅẹ ḅara mị.

Nyanaḅọ Ḅe Ò Fomuḅara Se Asiria Pịrịḅịa

²⁴ Kụrọmamgba Nyanaḅọ Ḅe nwọ seni oria tomoni, Zaịyọn ḅie anga apụma ḅẹmẹ, “Ómine Asiria apụma ḍikiḅalafama, Ijipt apụma ọ́ pụnụma pụnụma ḅara ini nwọ seni ọ́ pụnụma aḅẹ nwọḅẹ sọnị.

²⁵ Kalasịkị kọnmẹ fomuḅara seni ọ́ pịrị mị ḅụ à kulumaḅịa, anịeso àrị ini famaḅịa.

²⁶ Ị̀rị̀, Kụrọmamgba Nyanaḅọ Ḅe, ị̀ya fomuye à nwọ seni ini fomuḅịa, anị Orẹb Ḍụparị mị ḅụ à fomuḅara seni Midiapụ ma pịrị ḅara mị. À fomuḅara seni Asiria mị pịrịḅịa anị à fomuḅara seni Ijipt mị pịrị ọkụ mị.

²⁷ Sịkị mị ḅolaḅịa sịkị Asiriapụ ma kụrọ ḅie àrị ómine pọkọḅịa, anịsịkị inia iku ayema ḅarị ọ́mịna aba ma pụnụma ẹkẹ.”

Owu Mun Apụ Ma Owupakamẹ

²⁸ Tarakapụ owunima Eaị opuama mị ini ọkịsam! Migrọn ḅie ini toluḅọrọsam! Mikmash ḅie inia fịayema ini nwọ seni koromamẹ!

²⁹ Ateli mị ini saḅaḅọrọsam, se ini ḍin mị se Giba ḅie mọnọmẹ. Rema mị ḅie sime apụma inia ḅalafamẹ, Amanyanaḅọ Sọl ḅe oria ama Gibia ḅie simeapụma ini mangịsosam.

³⁰ Galim apụ ómine oloku! Leisha apụ ó poki! Anatọt apụ ọ́ pẹkẹrẹ!

³¹ Madmẹna apụma na Gibim apụma na, inia ḍumo gose mangịaḅẹ.

³² Mịmgba tarakapụma Nọb ama mị ḅie ini omi-ẹ, se anịnyọḅụ inia ịkpụlụ ini nwọ sẹkịma sẹkịma Zaịyọn Tụndụ mị daḅẹ anị Jerusalẹm opuama mị.

³³ Kụrọmamgba Nyanaḅọ Ḅe ori ini ọkịḅoḅịa se eje ḅụ pẹlẹ-ịkpangị ḅịkị jịnye jịnye ọgọnọ koro ọkụ ini nwọ seni ḅịkị koroḅịa. Inia ḅie opuaye mịẹtẹịnḅọ ḅe ḅụ ọkịmun geletẹịnḅọ ḅe la, ini ini pẹlẹkoroma pịkịna iniaḅụ gereremaḅịa.

³⁴ Kụrọmamgba Nyanaḅọ Ḅe, apala seni piriogbo eje pẹlẹ sara ọkụ ọ̀ nwọ seni ini pẹlẹ saraḅịa, anị Lẹbanọn ḅie iḅitẹịn ejema ḅịkị ḅịkị ọkụ mị!