Agbamịẹ Apụ 9 - Kịrịkẹnị BaịbụlErọn Ḅe Ori Agbamịẹmẹ 1 Fịrịkiri mị ḅe ḍin ma ḅo kara so sịkị, nine-a ḍin karama ene mị ḅụ, Moziz ḅe Erọn ḅe na oria owuapụ awọma na pịkị Izrẹl mị ḅe tịḅịnị mamgba na chịnmẹ. 2 Ọ̀ nwọse Erọn ḅe ḅẹmẹ, “Gbọrị ayamburama owoi nambulo na pịkị gbọrị ajirima na nwọ ọkịḅo, ḅẹḅẹye ḅụ oforikaye, se àrị seni agbamịẹ Nyanaḅọ Ḅe pịrị, owoi nambulo ḅe se si agba nwọ mịẹ, anịsịkị ajirima ḅe se dọkịma agba nwọ mịẹ. 3 Anịsịkị nwọse Izrẹlapụma ḅẹ ini gbọrị ẹkpẹịn ọkịḅo se si agba nwọ mịẹ, gbọrị kụra lasa nambulo na pịkị gbọrị kụra lasa anana na ḅẹḅẹye ḅụ oforika aye, se àrị seni dọkịma agba nwọ mịẹ, 4 pịkị gbọrị owoi nambulo na gbọrị ajirima na nwọse gboloma agba nwọ mịẹ. Ini pulo se gwa fịaye mgbọlụ ini nwọse agbamịẹ Nyanaḅọ Ḅe pịrịḅịa. Ini mịn mị mịẹḅịa anịatịḅị Nyanaḅọ Ḅe ori ọ̀ ḅụ se ini ḍieḅịa mịmgba.” 5 Moziz ḅe tọn ini pịrịaye goyegoye ini ọkịḅo Ikowarị mị tọrọkọ koromamẹ, se bebe tomoni kpo mị mgba mun anịju koḅiria sime Nyanaḅọ Ḅe tẹkẹmẹ. 6 Moziz ḅe nwọse ini ḅẹmẹ, “Mịn Nyanaḅọ Ḅe tọn ọ́ pịrị na ọ́ mịẹ nwọḅẹye mị-ẹ, mịẹse oria boma mị pakaḅo ọ́ pịrịḅịa ọkụ.” 7 Anịsịkị ọ̀ nwọse Erọn ḅe ḅẹmẹ, “Agbamịẹ ẹbẹ mị sime nyọ mun se si agba mị na dọkịma agba mị na nwọ mịẹ, se ị́rị́ na pịkị tomonima na mịẹ sima nwọ dekisin. Mịn agba mị mịẹ se tomonima mịẹ sima dekisin, anị Nyanaḅọ Ḅe tọnsa ḅaraḅụ.” 8 Erọn ḅe ò so agbamịẹ ẹbẹ mị sime nyọ mun se ayamburama owoi nambulo ḅe ḅaamẹ, anị oria si agbamịẹ wu ḅe. 9 Oria owuapụ awọma nama ḅe oju pulo mị ọkịḅo ọ̀ pịrịmẹ, ori ọ̀ ḅaratụmgbalị se anịa ḅie chu se anị seni agbamịẹ ẹbẹ mị ḅụ ịkọlị ma ḅe ịvalị ma ọgọnọ ḅụ sara, se kọnye mị seni agbamịẹ ẹbẹ mị chuku ḅụ saramẹ. 10 Anịsịkị ḅẹlẹkị mị na, nịna akpa ma na, iḅi paranga mị na ọ̀ nwọse agbamịẹ ẹbẹ mị ọgọnọ ḅụ dọkịmamẹ, anị Nyanaḅọ Ḅe tọn Moziz ḅe pịrị ḅaraḅụ. 11 Ọkụma mịnị mị na apụra mị na ọ̀ nwọse ini pike ịnyọsara sime nyọ mị ḅụ pakamun dọkịmamẹ. 12 Se oria dọkịma agba mị mịẹḅịa nama ḅe ọ̀ nwọ ḅaamẹ. Oria owuapụ awọma nama ḅe oju pulo mị ọkịḅo ọ̀ pịrị se, ori anị seni agbamịẹ ẹbẹ mị ḅụ inein-a ịkọlị mamgba ḅụ saramẹ. 13 Ini nama tịḅị mị na pịkị ị́sị́ ini kẹnị koroma ayema na nwọ ọkịḅo ọ̀ pịrị se, ori àrị seni agbamịẹ ẹbẹ mị ọgọnọ ḅụ dọkịmamẹ. 14 Anịsịkị ọ̀ ḅụlọ ḅie ayema na ọḅụju ḅụọma na sịkịrị se, àrị seni ị́sị́ kirikọn dọkịma agbamịẹ ayema ọgọnọ gbana se àrị dọkịmamẹ agbamịẹ ẹbẹ mị ọgọnọ ḅụ. 15 Anịeso, ò tomonima inia agbamịẹ ayema ọkịḅomẹ. Se tomonima mịẹ-a sima agbamịẹḅịa oḅori ḅe ọ̀ nwọ ọkị, ọ̀ ḅaa se ò seni agba mị mịẹmẹ, anị ori oria sima agba mị mịẹ ọkụ mị. 16 Ọ̀ pịkị ò se dọkịma agbamịẹḅịa nama ḅe ọkịḅo se agba mị mịẹmẹ anị olokoma sime ḅaraḅụ. 17 Ọ̀ fịaye mgbọlụ agba mịẹye mị ọkịḅo se ḅarakuḅu ḅein ḅịa fịlawa nwọ ọkị seni anị dọkịmamẹ agbamịẹ ẹbẹ mị ọgọnọ ḅụ. (Mịn mị anị ini se enene ḅe dọkịma agba mị ḅụ chụaye-ẹ.) 18 Ori owoi nambulo ḅe na ajirima ḅe na ḅaa se gboloma agbamịẹ tomonima pịrịmẹ. Oria owuapụ awọma nama ḅe oju pulo mị ọkịḅo ọ̀ pịrị se, ori anị seni agbamịẹ ẹbẹ mị ḅụ inein-a ịkọlị mamgba ḅụ saramẹ. 19 Erọn ḅe ori owoi nambulo ḅe na ajirima ḅe na, ḅụ ḅẹlẹkị ma na, opu tumo mị na, tumo ḅọkọ mị gbẹịn ye mị na, nịna akpa ma na, paranga mị gbẹịn ye mị na ọkị 20 se namama ekpe ma ọgọnọ gbana se arịmgba deki se agbamịẹ ẹbẹ mị sime nyọ mun mẹ. Ọ̀ ḅẹlẹkị ma dọkịmamẹ agbamịẹ ẹbẹ mị ọgọnọ ḅụ 21 ọkụma ekpe ma na amaḅaranga da ọḅụju ḅụọma na se agbamịẹapụma pịrịmẹ anị sosikima sime Nyanaḅọ Ḅe pịrị ḍiepịrịye mị-ẹ, Moziz ḅe tọnsa ḅaraḅụ. 22 Erọn ḅe agba mamgba mịẹso sịkị, ori ọ̀ ḅarama dekichịẹma tomonima da se ḅẹlẹma seni ini pịrị se nwẹngị koroḅomẹ. 23 Moziz ḅe na Erọn ḅe na ini so Nyanaḅọ Ḅe pakaḅoḅo Ikowarị mị ḅie sọmunmẹ, ini pakaḅo sịkị ini ḅẹlẹma seni tomonima pịrịmẹ, se Nyanaḅọ Ḅe oria boma mị ḅụpakụma tomoni mamgba damẹ. 24 Nyanaḅọ Ḅe bẹkẹma ḅaraḅụ fịnị se agbamịẹ ẹbẹ mị ọgọnọ dọkịma agba mị na ḅẹlẹkị ma na nwọ dọkịma sinmẹ. Tomonima mịn mị ọrị sịkị ini oloku se inia fụḅara ma se kiri lamamẹ. |
The Bible Society of Nigeria
Bible Society of Nigeria