Agbamịẹ Apụ 5 - Kịrịkẹnị Baịbụl

Simịẹ Agba Ḅiarịaye Ma

¹ Ma mịẹaye ma simịẹ agba àrị nwọ ḅimẹ. Nemikase ini tomoniḅọ chịn ḅẹrẹkọn warị mun mẹ, se ori ọrịye mị anịkanịka ọ̀ naaye mị nwọ ḍuko ḍụkụkẹ ḅẹḅẹ, ori anịa ḅụfụka nwọ daḅịa.

² Nemikase tomoniḅọ nemika ḅaraḅụ ḅara se fịafịakaye lamamẹ ḅẹḅẹ, anị ḅọrọ fịsa nama-o, fịsaye goyegoye, ọ̀ ḅarị fịafịakẹ ọ̀ pịkị oloko korosam ọ̀ mịẹye mị ọ̀ nwọ kaịnḅo gbọrị kirikiri.

³ Nemikase gbọrịḅọ nemika ḅaraḅụ ḅara se tomoniḅọ ḅụ pakaḅo fịafịakaye lamamẹ ḅẹḅẹ, ye mị sime ọkụ sime ọkụ, ori oloko korosam ọ̀ nwọ ọ̀ mịẹye mị kaịnḅo gbọrị kirikiri.

⁴ Nemikase gbọrịḅọ ye abalaka ḅaraḅụ yeḅerenimẹ ḅẹḅẹ, ye mị sime ọkụ sime ọkụ, ori oloko korosam ọ̀ nwọ ọ̀ mịẹye mị kaịnḅo gbọrị kirikiri.

⁵ Tomoniḅọ si mịẹmẹ ḅẹḅẹ, ọ̀ mịẹ si mị ọ̀ nwọ ḍukopakụmaḅịa,

⁶ ọ̀ mịẹ si mị ḅe fomuḅara gose gbọrị anana anịkanịka gbọrị oḅori ọ̀ nwọse ḅo ḍiepịrịye agbamịẹ Nyanaḅọ Ḅe pịrịḅịa. Agbamịẹḅọ ḅe tomoniḅọ ḅe mịẹ si mị gose agba mị mịẹḅịa.

⁷ Ọkụma tomoniḅọ ḅe ineda gbọrị anana anịkanịka gbọrị oḅori nyana ḅo ẹkẹ ḅẹḅẹ, ọ̀ mịẹ si mị gbẹịn Nyanaḅọ Ḅe pịrị gose mama okuku anịkanịka mama elesika ọ̀ nwọse ḅoḅịa, gbọrị wu anị simịẹ agbamịẹye-ẹ, anịsịkị ísí wu ḅe anị ḍọkịma agbamịẹye-ẹ.

⁸ Ori àrị ọkịḅo agbamịẹḅọ ḅe pịrịḅịa, se ọ̀ tatarị seni simịẹ agbamịẹḅịa feni ḅe nwọ ọkịḅoḅịa. Ori ọ̀ kọngọ anyịmaḅịa tịḅị mị kanịsinka ḅaraḅụ

⁹ se oria oju pulo mị seni kele agbamịẹ ẹbẹ mị anga sịkị sanaḅịa. Kirikọn oria oju pulo mị mgba ọ̀ nwọse agbamịẹ ẹbẹ mị chuku sarafamaḅịa. Mịn anị se si dekisin agba-ẹ.

¹⁰ Anịsịkị ori maịn karama feni ḅe seni ḍọkịma agba mị mịẹḅịa, oloko mị sime ḅaraḅụ. Mịn ḅara mị anị agbamịẹḅọ ḅe se agba mị mịẹḅịa ọkụ-ẹ tomoniḅọ ḅe mịẹ si mị gose, se ini pịkị si ḅụ ḅarasin ọ̀ pịrịḅịa.

¹¹ Ọkụma nemikase ori ineda mama okuku anịkanịka mama elesika nyana ẹkẹ ḅẹḅẹ, fịlawa mama loko laḅịaye ọ̀ nwọse ḅo simịẹ agbamịẹḅịa. Gbọrị oliv pulo anịkanịka insẹnsị sọnị ò se anịa ḅie chụa ẹkẹ, anịatịḅị simịẹ agbamịẹye-ẹ, chịnmgbọlụ fịaye agba kẹ.

¹² Ori anị ọkịḅo agbamịẹḅọ ḅe pịrị, se ori anịaḅụ ḅarakuḅu ḅeinḅịaye nwọ ọkịḅịa, se ḍiepakụma na anịmgba ò se osiḅụ wẹrị Nyanaḅọ Ḅe pịrịsam, se ori anị seni agbamịẹ ẹbẹ mị ọgọnọ dọkịmaḅịa fịaye agba ḅaraḅụ. Mịn anị se si dekisin agba-ẹ.

¹³ Mịn ḅara anị agbamịẹḅọ ḅe se agba mị mịẹḅịa ọkụ-ẹ tomoniḅọ ḅe mịẹ si mị gose, se ini pịkị si ḅụ ḅarasin ọ̀ pịrịḅịa. Kirikọn fịlawa mị sime agbamịẹḅọ ḅe pịrịmẹ, anị fịaye mgbọlụ agba mịẹ ọkụ mị.

Yepẹkẹrẹ Agbamịẹaye

¹⁴ Nyanaḅọ Ḅe ma olokoma chụa Moziz ḅe pịrịmẹ.

¹⁵ Nemikase gbọrịḅọ nemika ḅaraḅụ si mịẹmẹ ḅẹḅẹ, anị osiḅụ sime Nyanaḅọ Ḅe pịrị ayema nwọ seni ọ̀ pịrịka ḅaraḅụ, ḅẹḅẹye ḅụ ofori gbọrị ajirima anịkanịka gbọrị ẹkpẹịn ọ̀ nwọse ḅo yepẹkẹrẹ agba mịẹ seni Nyanaḅọ Ḅe pịrịḅịa. Àrị enema ḅie ini seni fịrịnwẹngị igbiki mị la-ọkụ anị ini ḍiki se ọ̀ la ḅịpị mị na kịẹnmaḅịaye-ẹ.

¹⁶ Ọ̀ gbẹịnka ayema ọ̀ nwọ gbẹịnḅịa pịkị anịa sọnọ-a kiri ḅụ gbọrị kiri se chụa gbẹịn agbamịẹḅọ ḅe pịrịḅịa, se agbamịẹḅọ ḅe nama ḅe se tomoniḅọ ḅe mịẹ simịẹ agba nwọ mịẹḅịa, se ini si ḅụ ḅarasin ọ̀ pịrịḅịa.

¹⁷ Gbọrịḅọ nemika ḅaraḅụ Nyanaḅọ Ḅe olokoma ḅụ gbọrịye nwọ kanmẹ ḅẹḅẹ, ori oloko koromẹ, ọ̀ pịkị oloko mị gbẹịnḅịa gbarịmaka ḅaraḅụ.

¹⁸ Ḅẹḅẹye ḅụ ofori gbọrị ajirima anịkanịka ẹkpẹịn ọ̀ nwọse ḅo agbamịẹḅọ ḅe pịrịḅịa ò se yepẹkẹrẹ agbamịẹḅịa. Àrị enema ḅie ini seni fịrịnwẹngị igbiki mị la-ọkụ anị ini ḍiki se ọ̀ la ḅịpị mị na kịẹnmaḅịaye-ẹ. Agbamịẹḅọ ḅe tomoniḅọ ḅe nemika ḅaraḅụ mịẹ si mị ḅe agba nwọ mịẹḅịa, ini pịkị si ḅụ ḅarasin ọ̀ pịrịḅịa.

¹⁹ Mịn anị Nyanaḅọ Ḅe ḅụ ọ̀ mịẹ si mị ḅe yepẹkẹrẹ agba mị-ẹ.