Agbamịẹ Apụ 18 - Kịrịkẹnị Baịbụl

Ama Na Ere Na Ḅụgboloma Ḅụ Tọntọn Aye Ma

¹ Nyanaḅọ Ḅe nwọse Moziz ḅe ḅẹmẹ

² ḍuko Izrẹlapụma pịrị, “Ị̀rị̀ anị Nyanaḅọ ọ́mịna Tamụnọ Ḅe-ẹ.

³ Ijipt apụma mịẹmịẹ ayema ómine àrị mịẹma, anị gbọrị sịkị ómine anga-ẹso nyọ mị, anịkanịka Kenan apụma, anị mịọkụ àrị ó se mun-arị ama mị ḅie anga apụma, ómine inia mịẹmịẹ ayema mịẹma.

⁴ Ómine ị̀ya olokoma koko se à tọnye nwọ mịẹ. Ị̀rị̀ anị Nyanaḅọ ọ́mịna Tamụnọ Ḅe-ẹ.

⁵ Àrị ọ́ ḅe mịẹ nwọ ḅẹ ayema na pịkị à chụa ọ́ pịrị olokoma na ọ́ nwọ ḍuko nwẹngị; ómine ọ́mịna ḍumo ḍụaḅịa; ómine ọkọ mịẹ ọkụma, Ị̀rị̀ anị Nyanaḅọ Ḅe-ẹ.”

⁶ Nyanaḅọ Ḅe ma olokoma se ini pịrịmẹ. Ị́ya mịnaḅọ goyegoye na ḅụgbolomama.

⁷ Ị́ ḍa ḅe ḅụgereremama anị ị́ nyengima na gboloma ḅụ. Ngịsị ị́ nyengima ḅụgererema ẹkẹ.

⁸ Ị́ ḍa ḅe ḅụgereremama anị oria ísí erema ḅie gbọrịḅọ na gboloma ḅụ.

⁹ Ị́ ḍa anịkanịka ị́ nyengima jụmḅọ na yi ḅọrọsaḅọ na ḅụgbolomama, gbọrị warị ḅie ini ị́rị́ na árị na ḍikiḍiki pakụmaḅo-o ini ómine ḍikiḍiki pakụmaḅoka sọnị.

¹⁰ Ị́ya tọkụ yi tọkụ ma na ḅụgbolomama; anị ḅụgereremaye sọ ị́ pịrịḅịa.

¹¹ Ị́rị́ na gbọrị ḍaḅọ na yi eremeniḅọ ọkụma gbọrị nyengiḅọkẹ, anịkanịka gbọrị nyengiḅọ-ẹ, ọkụma gbọrị ḍaḅọkẹ na ḅụgbolomama, árị sọnị ị́ mbụra-ẹ.

^12-13 Ị́ ḍaḅe nụmbụrarọ anịkanịka ị́ nyengima nụmbụrarọ na ḅụgbolomama.

¹⁴ Ị́ ḍaḅe numbireowu ta ma na ḅụgbolomama, árị sọnị mbụra-ẹ.

¹⁵ Ị́ya tọkụ ḅe tarọ ma na ḅụgbolomama

¹⁶ anịkanịka ị́ mbire ḅe tarọ sọnị.

¹⁷ Ḅọrọsa sịkị ị́rị́ na gboloma sa ḅọ ḅa, anịkanịka ḅarọ ma tọkụ, na ḅụgbolomama; sosi ini ị́rị́ na pakụmaḅịa, anị mịna pulo ḅieḅọ ḍọkị si ẹrẹ sọ ị́ pịrịḅịa.

¹⁸ Ị́ ta ma ḍumo simeogbo nụmbụrarọ ọkị se ị́ya erema ḅụ gbọrịḅọ mịẹma.

¹⁹ Eremeniḅọ na ḅụgbolomama á kiri ọrịarị sịkị ḅụ, anịatịḅị á fịafịakẹ.

²⁰ Jụmḅọ ta na ḅụgbolomama; anị ị́ mịẹse ị́ fịafịakaḅọ sọḅịa.

²¹ Ị́ya awọma ḅie gbọrịḅọ sọnị se dọkịma agba mịẹ Mọlẹk oru mị pịrịma anịatịḅị anị ḅụgerere ọkịḅo Tamụnọ Nyanaḅọ Ḅe ẹrẹ mị pịrịḅịa.

²² Gbọrị owuḅọ sọnị ò juo owuḅọ na ḅụgbolomama; Tamụnọ Ḅe ọ̀ taraka se anị wẹrịmamẹ.

²³ Gbọrị owuḅọ anịkanịka eremeniḅọ sọnị nama na ḅụgbolomama, anị si ḍumo mị anị ị́ seni fịafịakaḅọ nwọ mịẹmẹ.

²⁴ Ma mịẹmịẹaye ma ḅụ gbọrịye sọnị ọ́ ḅụ se chuma, ó ḅofa fịafịakapụ sọ, anịatịḅị ma anị orutẹkẹ apụma mịẹse ini fịafịaka aye ma-ẹ; ini orutẹkẹ apụma, anị ọ́mịna tọrọkọ sime ama mị ḅie anga apụma, anị Nyanaḅọ Ḅe pịkị depakụmarịapụ ma-ẹ, mịẹse ọ́ sọmunḅịa ọkụ.

²⁵ Inia mịẹmịẹaye ma ama mị se fịafịakaye nwọ mịẹmẹ, anịẹrẹchị Nyanaḅọ Ḅe ò fomuḅara se ama mị pịrịaḅẹ, pịkị mịẹse Nyanaḅọ Ḅe anịa ḅie anga apụma sịkịaḅẹ.

^26-27 Ma ḅụngụngụma aye mamgba ini nwọ mịẹmẹ se ama mị seni fịafịakaye nwọ mịẹmẹ, ọkụma ngịsị ómine àrị mịẹ ẹkẹ. Ómine mgba ọ́ Nyanaḅọ Ḅe olokoma nwọ koko pịkị ọ̀ tọnye mịẹ, anị ḅọrọ ómine Izrẹlapụ-o anịkanịka ómine na anga jịn sẹ apụma sọnị,

²⁸ anịsịkị ama mị anị ọ́ sịkị ẹkẹ, anị anịa ḅie tatarị anga orutẹkẹ sime se ó ḅo apụma sịkị ọkụ mị.

²⁹ Ó nemimẹ na ma ḅụngụngụma ayema ḅụ gbọrịye mịẹḅọ, ini ḅarị nụḅọ se Tamụnọ-a tomonima ḅie gbọrịḅọ kịẹnma ẹkẹ.

³⁰ Nyanaḅọ Ḅe pịkị nwọ ḅẹmẹ, “À se ọ́ pịrị ayema ọ́ nwọ mịẹ se tatarị ama mị ḅie anga se ó ḅo apụma mịẹmịẹaye ma ómine àrị ḍikimama, ọ́ pịkị ma ayema ḅụ gbọrịye mịẹḅụ ḅo fịafịaka apụ nwọ sọma. Ị̀rị̀ anị Nyanaḅọ, ọ́mịna Tamụnọ Ḅe-ẹ.”