Agbamịẹ Apụ 15 - Kịrịkẹnị Baịbụl

Ojuḅie Firipakaḅo Fịafịakaye Ma

¹ Nyanaḅọ Ḅe ma olokoma se Moziz ḅe na Erọn ḅe na pịrịmẹ

² Izrẹlapụma gose. Owuḅọ ḅụ ḅie ye firipakamẹ ḅẹḅẹ, nwọ firipakaḅoye mị fịafịakẹ,

³ anị pa ọ̀ ḅụ ḅie firipakaḅo aḅẹ anịkanịka anị dachịẹsam nwọḅẹ sọnị.

⁴ Tomoniḅọ ḅe kpọnjị sime, anịkanịka ḅọlọlọ mọnọye ọgọnọ goyegoye ḅarị fịafịa ẹkẹ.

⁵ Ḅụ se oria mọnọye mị lama ḅọ

⁶ anịkanịka ò sime ḅọrọsaye ọgọnọ ḅụ kpọnjị simeḅọ goyegoye, nụḅọ mịna ḅụchụayema sịkịrịḅịa, pịkị mengi ḅiriḅịa se fịafịaka ḅụ sime mun saso laḅịa.

⁷ Ḅara se ḅụ ḅie ye firipakaḅo ḅọ ḅe lamaḅọ goyegoye nụḅọ mịna ḅụchụayema sịkịrịḅịa, pịkị mengi ḅiriḅịa, se fịafịaka ḅụ sime mun saso laḅịa.

⁸ Ḅụ ḅie ye firipakaḅo ḅọ ḅe fụla sara se anị fịafịaḅọ lamẹ ḅẹḅẹ, ori ḅọ ḅe oria ḅụchụayema ọ̀ nwọ sịkịrịḅịa, pịkị mengi ḅiriḅịa, se fịafịaka ḅụ sime mun saso laḅịa.

⁹ Ḅụ ḅie ye firipakaḅo ḅọ ḅe ḅụkụlọ, anịkanịka ọgọnọ ḅụ simeye goyegoye ḅarị fịafịa ẹkẹ.

¹⁰ Ḅụ ḅie ye firipakaḅo ḅọ ḅe se simesaye, ḅara se nwọ lamaḅọ goyegoye nụḅọ fịafịaka ḅụ sime mun saso laḅịa, nụḅọ pịkị mịna ḅụchụayema sịkịrịḅịa, pịkị mengi ḅiriḅịa.

¹¹ Nemikase ḅụ ḅie ye firipakaḅo ḅọ ḅe ma ọ̀ ḅarama sịkịrịka simeogbo, ḅara se lamaḅọ goyegoye nụḅọ mịna ḅụchụayema sịkịrịḅịa, pịkị mengi ḅiriḅịa, se fịafịaka ḅụ sime mun saso laḅịa.

¹² Tomoniḅọ ḅe ḅara se lama okoma ḅẹlẹ goyegoye ini ḅaaḅịa; pịkị ini chịn se kara se fịaye chụa fịfị aye ḅụ ọ̀ ḅara se lamaye goyegoye ini sịkịrịḅịa.

¹³ Tomoniḅọ ḅe ḅụ ḅie firipakaḅo obi mị gwọsa ḅẹḅẹ, sọnọma ḍin ọ̀ nwọse koru, oria ḅụchụayema sịkịrị, pịkị ideri mengi nwọ ḅiri, anịsịkị mị ọ̀ fịafịaḅịaye-ẹ.

¹⁴ Nine-a ḍin karama ene mị ḅụ, ọ̀ mama okuku anịkanịka mama elesika ọkị se Nyanaḅọ Ḅe pakaḅoḅo Ikowarị mị ḅọkọ munḅịa, se ori àrị seni agbamịẹḅọ ḅe pịrịḅịa.

¹⁵ Agbamịẹḅọ ḅe gbọrị wu se si agba mịẹḅịa, pịkị ísí wu ḅe se dọkịma agba nwọ mịẹḅịa. Mịn ḅara anị ò se ḅụmịẹfịafịama mịẹmịẹye mị mịẹ tomoniḅọ ḅe pịrịḅịa ọkụ-ẹ.

¹⁶ Konju koromaye ḅụ sarapakaḅo ḅọ goyegoye, oria oju mgba ọ̀ sịkịrịḅịa se ọ̀ fịafịaka ḅụ sime mun saso laḅịa.

¹⁷ Konju koromaye mị saramun layelaye; anị ḅọrọ ḅịtẹ anịkanịka nama oju apụra sọnị ini sịkịrịḅịa, anịsịkị anị fịafịaka ḅụ sime mun saso laḅịa, ini anị sịkịrị sosa ḅẹḅẹ.

¹⁸ Ama na ere na gboloma sosa ḅẹḅẹ ini mengi ḅiriḅịa, se fịafịaka ḅụ sime mun saso laḅịa.

¹⁹ Eremeniḅọ kiri ọrịmẹ ḅẹḅẹ, á fịafịaka ḅụ sime mun sọnọma ḍin nwọ laḅịa. Ḅara se á lamaḅọ goyegoye fịafịaka ḅụ sime mun saso laḅịa.

²⁰ Á simeye ọgọnọ anịkanịka ḅọlọlọye ọgọnọ goyegoye ḅarị fịafịa ẹkẹ, kiri ọrịḅụ á sime mun lasịkị goyegoye.

^21-23 Ḅara se arịa mọnọye anịkanịka á se simeye lamaḅọ goyegoye, nụḅọ chụa ḅụchụayema sịkịrịḅịa, pịkị mengi ḅiriḅịa, se fịafịaka ḅụ sime mun saso laḅịa.

²⁴ Árị na gboloma se árịa kiri ọrịye mị laḅọ goyegoye, ori ọ̀ ḅụ pụlamasam, árịa fịafịaka mị ḅụ, ọ̀ fịafịaka ḅụ sime mun sọnọma ḍin nwọ laḅịa, ọ̀ ḅọlọlọ mọnọye goyegoye ḅarị fịafịa ẹkẹ.

²⁵ Nemikase eremeniḅọ ma á ḅụ ḅie pulo sara mun tọn-a ḍin lamẹ, se arịa kiri ọrị sịkị ḅụ anị sara lala sịkị mị nẹngịmẹ, anịkanịka kiri ọrị sịkị mị sikima se, pulo á ḅụ saramẹ ḅẹḅẹ, fịafịaka ḅụ árị omi-ẹ, á ḅụ ḅie ye nwọ sararị sịkị goyegoye; anị á kiri ọrị sịkị ḅụ sime se fịafịaka ọkụ mị.

²⁶ Anịsịkị mị ḅụ á se ḅọlọlọ mọnọye, anịkanịka á se simeye goyegoye ḅarị fịafịa ẹkẹ.

²⁷ Ḅara se àrị lamaḅọ goyegoye nụḅọ ḅarị fịafịa ẹkẹ, nụḅọ chụa ḅụchụayema sịkịrịḅịa, pịkị mengi ḅiriḅịa, se fịafịaka ḅụ sime mun saso laḅịa.

²⁸ Pulo mị á ḅụ dachịẹsa ḅẹḅẹ, sọnọma ḍin á nwọse koruḅịa, anịsịkị re mị á fịafịaḅịaye-ẹ.

²⁹ Nine-a ḍin karama ene mị ḅụ árị mama okuku, anịkanịka mama elesika nwọse agbamịẹḅọ ḅe damamunḅịa, Nyanaḅọ Ḅe pakaḅoḅo Ikowarị mị ḅọkọ ḅụ.

³⁰ Agbamịẹḅọ ḅe arịa ḅụ gbọrị wu se si agbamịẹḅịa, pịkị ísí wu ḅe se dọkịma agba nwọ mịẹḅịa. Mịn ḅara anị ò se ḅụmịẹfịafịama mịẹmịẹye mị mịẹ á pịrịḅịa ọkụ-ẹ.

³¹ Nyanaḅọ Ḅe nwọse Moziz ḅe ḅẹmẹ na ori Izrẹlapụma ḅeri jine inia ḅụ fịafịaka mị gbolomaye ḅụ, mịẹse ini ọ̀ tọrụkuḅu sime Ikowarị mị pụlama ẹka ḅara, anị ini pike ịnyọsara sime nyọ mị ogboku simeye mị. Mịẹse ini fị ẹka ḅara, inia ḅụ mịẹ fịafịamaka mị gose.

³² Ma anị ḅụ ḅie ye firipakaḅoarị owuḅọ na, konju koromaye ḅụ sara àrị owuḅọ gboloma oloko ma-ẹ,

³³ pịkị kiri ọrịarị eremeniḅọ na, ḅụ fịafịaka eremeniḅọ na gboloma owuḅọ na gbolomaye ma-ẹ.