Agbamịẹ Apụ 13 - Kịrịkẹnị Baịbụl

Oju Kiri Ḅụ Sara Obi Oloko Ma

¹ Nyanaḅọ Ḅe ma olokoma se Moziz ḅe na Erọn ḅe na pịrịmẹ.

² Nemikase tomoniḅọ nụḅọ oju kiri ḅụ foin ye anịkanịka ịnọ chụa anịkanịka ọpọpọlị anịkanịka dọkịye, ḅo ineda ḅụkan obi sọḅịaye nụḅọ oju kiri ḅụ saramẹ ḅẹḅẹ, ini ori ọkịḅo Erọn furoḅie agbamịẹḅọ ḅe pịrị.

³ Agbamịẹḅọ ḅe ori ịnọ mị ḍikikpaịnmaḅịa, se nemikase arịa ḅie sime ichuka ma pịkịḅo ḅịaḅimẹ ḅẹḅẹ, ịnọ mị pịkị gbun anịa ọgọnọ apụra mị nẹngịmẹ ḅẹḅẹ, anị ḅụkan obi-ẹ, se agbamịẹḅọ ḅe ò ḍukopakụmaḅịa na tomoniḅọ ḅe ọ̀ fịafịakẹ.

⁴ Ọkụma nemikase ịnọ mị ḅịaḅịa mẹ, ọkụma anị gbun ọgọnọ apụra mị nẹngịkẹ ḅẹḅẹ, ichuka ma sọnị ma pịkị ḅịaḅịakẹ ḅẹḅẹ, agbamịẹḅọ ḅe ò tomoniḅọ ḅe se sikima koroma mun sọnọma ḍin nwọ laḅịa.

⁵ Agbamịẹḅọ ḅe ọ̀ pịkịna ò ḍikikpaịnmaḅịa sọnọma ḍin karama ene mị ḅụ, se nemikase ò kuḅie ḅụ ịnọ mị jịn ḅara simekẹ pịkị wasamaka ḅara ọ̀ nwọse anị ọrịmẹ ḅẹḅẹ, ọ̀ pịkịna ò sikima koromamun jịn sọnọma ḍin nwọ laḅịa.

⁶ Agbamịẹḅọ ḅe, ọ̀ pịkịna ò ḍikikpaịnmaḅịa sọnọma ḍin karama ene mị ḅụ, se nemikase ịnọ mị kankẹ ọkụma anịa tọrụ fịaḅẹ nwọ ḅẹḅẹ, ò ḍukopakụmaḅịa na ọ̀ fịafịamẹ; papa ịnọ-ẹ. Tomoniḅọ ḅe ori oria ḅụchụayema sịkịrị se ọ̀ fịafịa ḅụ simeḅịa.

⁷ Ọkụma nemikase agbamịẹḅọ ḅe ọ̀ fịafịamẹ nwọḅẹye mị ḍukopakụma so se, ịnọ mị kan wasamamẹ ḅẹḅẹ, tomoniḅọ ḅe ọ̀ vinpịkị so agbamịẹḅọ ḅe ḍọkịmamunḅịa.

⁸ Agbamịẹḅọ ḅe kpoto ò ḍikikpaịnmaḅịa, anị nemikase wasamamẹ ḅẹḅẹ, ò ḍukopakụmaḅịa na ọ̀ fịafịakẹ; na ḅụkan obi-ẹ.

⁹ Nemikase ḅụkan obi kọnḅọ omi-ẹ ḅẹḅẹ, ini ori ọkịḅo agbamịẹḅọ ḅe pịrị se,

¹⁰ ori ò ḍikikpaịnmaḅịa. Nemikase oria oju kiri mị ḅụ ḅịaḅịa ịnọ omi-ẹ se anị ichuka ma mịẹse àrị ḅịaḅịa pịkị ịma anịaḅụ ḅakamẹ ḅẹḅẹ,

¹¹ anị ḅịa-ẹka ḅụkan obi-ẹ. Agbamịẹḅọ ḅe ò ḍukopakụmaḅịa na ọ̀ fịafịakẹ, ò gose ò se sikima koromaḅịaye ofori-ẹ, anịatịḅị pikipikiye ofori-ẹ na ọ̀ kọkọma fịafịakẹ.

¹² Nemikase ḅụkan obi mị wasama tomoniḅọ ḅe tịḅị ḅụ ọkịḅo ọ̀ ḅụọ chuku lamẹ ḅẹḅẹ,

¹³ Agbamịẹḅọ ḅe ò kpoto ò ḍikikpaịnmaḅịa. Ò nemikase ḍọkịḅo ọrịmẹ na anị oria bebe oju mị mgba kelemasam nwọ ḅẹḅẹ, ò ḍukopakụmaḅịa na tomoniḅọ ḅe ọ̀ fịafịasam. Nemikase bebe oju kiri mị mgba pịkịḅo ḅịaḅịasam ḅẹḅẹ, anị ọ̀ fịafịasam.

¹⁴ Ọkụma anịsịkị mị ḅụ ịnọ tọrụ oria oju kiri ḅụ pakamẹ ḅẹḅẹ, ọ̀ fịafịakẹ.

¹⁵ Agbamịẹḅọ ḅe ò kpoto ò ḍikikpaịnmaḅịa, se ori ịnọ tọrụ ọrịmẹ ḅẹḅẹ, ò ḍukopakụmaḅịa na, ọ̀ fịafịakẹ. Ịnọ tọrụ mị ḍiepakụmamẹ na ḅụkan obi-ẹ, tomoniḅọ ḅe ọ̀ fịafịakẹ.

¹⁶ Ọkụma ịnọ mị ḅịa se pịkị ḅịaḅịasam nwọ ḅẹḅẹ, tomoniḅọ ḅe vinpịkị so agbamịẹḅọ ḅe ḍọkịma munḅịa,

¹⁷ se ò kpoto ò ḍikikpaịnmaḅịa. Nemikase ịnọ mị pịkịḅo ḅịaḅịasam nwọ ḅẹḅẹ, ọ̀ fịafịasam, agbamịẹḅọ ḅe pịkị ḍukopakụmaḅịa na ọ̀ fịafịasam.

¹⁸ Nemikase tomoniḅọ ọpọpọlị chụa se anị ḅịaso se

¹⁹ pịkịḅo anị paka ḅọrọsa kiri mị ḅụ ḅịaḅịa foinye anịkanịka pulo-pulo, anịkanịka ḅịaḅịa tọrụ chụa foinye ọrịmẹ ḅẹḅẹ, ori agbamịẹḅọ ḅe ḍọkịma munḅịa.

²⁰ Agbamịẹḅọ ḅe ò ḍikikpaịnmaḅịa, se nemikase kiri mị gbun ojukiri mị nẹngị, pịkịna anịa ḅie ichuka ma pịkịḅo ḅịaḅịamẹ ḅẹḅẹ, ò ḍukopakụmaḅịa na ọ̀ fịafịakẹ. Ḅụkan obi ọpọpọlị mị ḅie sakịsam.

²¹ Ọkụma agbamịẹḅọ ḅe ò ḍikikpaịnma se ḍọkịḅo ọrịmẹ na anịa ḅie ichuka ma, ma àrị pịkịḅo ḅịaḅịa aye sọkẹ, anị pịkị gbun oju kiri mị sọnị nẹngịkẹ, ọkụma anị kele fịafịa tọrụ chụamẹ ḅẹḅẹ, agbamịẹḅọ ḅe ori ò se sikima koroma mun sọnọma ḍin nwọ laḅịa.

²² Nemikase anị oju kiri ḅụ wasamamẹ ḅẹḅẹ, agbamịẹḅọ ḅe ò ḍukopakụmaḅịa na ọ̀ fịafịakẹ; obi ọ̀ ḅụ omi-ẹ.

²³ Ọkụma nemikase anị ḅara-ḍinmakẹ pịkị wasamakẹ ḅẹḅẹ, anị ọpọpọlị kiri mị kẹngẹ-ẹ, agbamịẹḅọ ḅe ò ḍukopakụmaḅịa na ọ̀ fịafịamẹ.

²⁴ Oju kiri dọkịḅọ ḅe ọkụma, nemikase ma ḅịaka ojumịnị mị pịkịḅo ḅịaḅịa anịkanịka pulo-pulo anịkanịka ḅịaḅịa tọrụ chụamẹ ḅẹḅẹ,

²⁵ agbamịẹḅọ ḅe ori ò ḍikikpaịnmaḅịa. Nemikase anịa ḅie ichuka ma pịkịḅo ḅịaḅịa, se pịkị gbun oju kiri mị nẹngịmẹ ḅẹḅẹ, anị ḅụkan obi dọkịye mị ḅie sakịsam, se agbamịẹḅọ ḅe ò ḍukopakụmaḅịa na ọ̀ fịafịakẹ.

²⁶ Ọkụma nemikase arịa ḅie ichuka ma àrị pịkịḅo ḅịaḅịaye sọkẹ, anị pịkị gbun oju kiri mị sọnị nẹngịkẹ, ọkụma kele sarasara tọrụ chụamẹ ḅẹḅẹ, agbamịẹḅọ ḅe ori ò se sikima koroma mun sọnọma ḍin nwọ laḅịa.

²⁷ Sọnọma ḍin karama ene mị ḅụ agbamịẹḅọ ḅe ọ̀ pịkịna ò ḍikikpaịnmaḅịa, se nemikase anị wasamamẹ ḅẹḅẹ, anị ḅụkan obi-ẹ, agbamịẹḅọ ḅe ò ḍukopakụmaḅịa na ọ̀ fịafịakẹ.

²⁸ Ọkụma nemikase anị ḅara-ḍinmakẹ pịkị wasamakẹ, se sarasara tọrụ chụamẹ ḅẹḅẹ, anị ḅụkan obikẹ. Agbamịẹḅọ ḅe ò ḍukopakụmaḅịa na ọ̀ fịafịamẹ; papa dọkịye mị anịa kiri-ẹ.

²⁹ Owuḅọ anịkanịka eremeniḅọ tịḅị ḅụ anịkanịka ḅapuko ḅụ ịnọ chụamẹ ḅẹḅẹ,

³⁰ agbamịẹḅọ ḅe ori anị ḍikikpaịnmaḅịa. Nemikase anị gbun oju kiri mị nẹngị ḅara simemẹ se anịa ḅie inime ma odo tọrụ chụa pịkị nwịnịnwịnịmẹ ḅẹḅẹ, anị ḅụkan obi-ẹ, ò ḍukopakụmaḅịa na nụḅọ fịafịakẹ.

³¹ Nemikase agbamịẹḅọ ḅe ò ḍiki sịkị mị ḅụ ịnọ mị gbun oju kiri mị nẹngị ḅara simekẹ ọkụma anịa ḅie inime ma, ma pa kụrọkẹ ḅẹḅẹ, sọnọma ḍin ọ̀ nwọse ò sikima koromaḅịa.

³² Agbamịẹḅọ ḅe ọ̀ pịkịna ịnọ mị ḍikikpaịnmaḅịa sọnọma ḍin karama ene mị ḅụ, se nemikase ma anị pa wasamakẹ pịkị odo tọrụ chụakẹ, anị pịkị gbun oju kiri mị nẹngị ḅara simekẹ ḅẹḅẹ,

³³ tomoniḅọ nụḅọ tịḅị inime ma sẹịnḅịa, ịnọ mị tọrụ okpokiriḅa mị sikima ọkụma. Anịsịkị agbamịẹḅọ ḅe ọ̀ pịkịna jịn sọnọma ḍin se ò sikima koromaḅịa.

³⁴ Sọnọma ḍin karama ene mị ḅụ agbamịẹḅọ ḅe ò kpoto ịnọ mị ḍikikpaịnmaḅịa, se ma anị pa wasamakẹ, anị pịkị gbuntẹịnka ḅara simemẹ ḅẹḅẹ, ò ḍukopakụmaḅịa na ọ̀ fịafịamẹ. Tomoniḅọ ḅe ori oria ḅụchụayema sịkịrị se fịafịa ḅụ simeḅịa.

³⁵ Ọkụma nemikase ọ̀ fịafịamẹ ḅẹ ye mị ini nwọ ḍukopakụma so se ịnọ mị wasamamẹ ḅẹḅẹ,

³⁶ agbamịẹḅọ ḅe ò kpoto ò ḍikikpaịnmaḅịa. Nemikase ịnọ mị wasamamẹ ḅẹḅẹ, ọ̀ ḅarị odo tọrụ chụa inime ḍiki ẹkẹ; pikipikiye ofori-ẹ na tomoniḅọ ḅe ọ̀ fịafịakẹ.

³⁷ Ọkụma nemikase agbamịẹḅọ ḅe ò kuḅie ḍikimẹ na ịnọ mị wasamakẹ, kụrọ inime pịkịna ḅie pakaḅoaḅẹ, ịnọ mị pịkị ḅịasam nwọ ḅẹḅẹ, agbamịẹḅọ ḅe ò ḍukopakụmaḅịa na tẹmẹḅụ ọ̀ fịafịamẹ.

³⁸ Owuḅọ anịkanịka eremeniḅọ oju kiri ḅụ ḅịaḅịaye pakamẹ ḅẹḅẹ,

³⁹ agbamịẹḅọ ḅe ori nụḅọ ḍikikpaịnmaḅịa. Nemikase nụḅọ ḅụ simeayema iḅiọkụ ḅịapakakẹ ḅẹḅẹ, anị papa oju kiri ḅụ sara pakaye-ẹ; nụḅọ fịafịamẹ.

^40-41 Nemikase tomoniḅọ tịḅị inime, tongu ḅụ firimẹ anịkanịka fụḅara ḅụ firimẹ ḅẹḅẹ, mịn mị anị iniḅọ seni fịafịaka ḅọ mịẹkẹ.

⁴² Ọkụma nemikase pulo-pulo anịkanịka ḅịaḅịaye ịnọ mị tọrụ firi nyọ mị ḅụ pakamẹ ḅẹḅẹ, anị ḅụkan obi-ẹ.

⁴³ Agbamịẹḅọ ḅe ori ò ḍikikpaịnmaḅịa, se nemikase pulo-pulo anịkanịka ḅịaḅịaye ịnọ mị tọrụ omi-ẹ ḅẹḅẹ,

⁴⁴ agbamịẹḅọ ḅe ò ḍukopakụmaḅịa na ọ̀ fịafịakẹ, ọ̀ tịḅịogbo sime ḅụkan obi mị gose.

⁴⁵ Ḅụkan obi kọnḅọ, kan ḅụchụaye mị nụḅọ chụaḅịaye-ẹ, nụḅọ tịḅị inime adalaka ḅụ simeḅịa, nụḅọ ḅịtẹ se nụḅọ tọrụchuku gbẹịn se olokuḅịa, “À fịafịakẹ, à fịafịakẹ!”

⁴⁶ Obi mị ọ̀ ḅụ simemun lasịkị lasịkị fịafịaka ḅụ ori omi-ẹ, ini pike ịnyọsara sime nyọ mị ḅụ, ò sikima mun angaḅịa, jịn apụ na gbolomaka ḅaraḅụ.

Oḅopuroḅa Gboloma Oloko Ma

⁴⁷ Oḅopuroḅa ḅịtẹ ḅụ pakamẹ ḅẹḅẹ, anị ḅọrọ wulu anịkanịka lọkọ-ḅịtẹ,

⁴⁸ anịkanịka lọkọ-ḅịtẹ ḅụchụaye anịkanịka wulu ḅụchụaye ḅụ anịkanịka nama oju apụra ḅụ anịkanịka nama oju apụra se mịẹye layelaye sọnị,

⁴⁹ anị nemikase elelenda tọrụ anịkanịka pulo-pulo tọrụ chụamẹ ḅẹḅẹ, anị oḅopuroḅa chụaḅẹ, ini anị se mun agbamịẹḅọ ḅe ḍie.

⁵⁰ Agbamịẹḅọ ḅe ori anị ḍikikpaịnma se anị se sikima koroma mun sọnọma ḍin laḅịa.

⁵¹ Sọnọma ḍin karama ene mị ḅụ ọ̀ pịkịna anị ḍikikpaịnmaḅịa, se nemikase oḅopuroḅa mị wasamamẹ ḅẹḅẹ ye mị fịafịakẹ.

⁵² Agbamịẹḅọ ḅe ori anị dọkịmaḅịa, anịatịḅị anị oḅopuroḅa chụa wasamaḅẹ, anị fịnị se dọkịmaḅịaye-ẹ.

⁵³ Ọkụma nemikase agbamịẹḅọ ḅe anị ḍiki sịkị ḅụ, ọ̀ ḍọkịḅo ọrịmẹ na oḅopuroḅa mị ye mị ḅụ anị wasamakẹ ḅẹḅẹ,

⁵⁴ ọ̀ kụrọ pịrịḅịa na ini anị sịkịrị se anị sikima koroma mun jịn sọnọma ḍin la.

⁵⁵ Anịsịkị ò kpoto anị ḍikikpaịnmaḅịa, se nemikase oḅopuroḅa mị anịa tọrụ ḍinmakẹ ḅẹḅẹ, anị wasamakẹ nwọḅẹ sọnị, anị fịafịakẹ; ye mị ọ́ dọkịma, anịaḅụ oḅopuroḅa mị ḅọrọ iḅitọrụ ḅụ anịkanịka sitọrụ ḅụ sime sọnị.

⁵⁶ Ọkụma nemikase, agbamịẹḅọ ḅe anị ḍikikpaịnma sịkị ḅụ, oḅopuroḅa mị sịkịrị sọsam nwọ ḅẹḅẹ, ori anị kanị sinḅịa ḅụchụaye mị ḅụ anịkanịka nama oju apụra mị ḅụ.

⁵⁷ Anịsịkị, nemikase oḅopuroḅa mị pịkịna pakamẹ ḅẹḅẹ, anị anị wasamaḅẹ, ye mị nyanaḅọ ḅe ori anị dọkịmaḅịa.

⁵⁸ Ò nemikase ye mị sịkịrị se anịa kiri mị somẹ ḅẹḅẹ, ò kpoto anị sịkịrịḅịa, se anị ḅo fịafịaye sọḅịa.

⁵⁹ Mịn anị oḅopuroḅa ḅụchụaye ḅụ paka mị gboloma oloko mị-ẹ, anị ḅọrọ wulu-o anịkanịka lọkọ-ḅịtẹ-o anịkanịka wulu ḅụchụaye-o anịkanịka lọkọ-ḅịtẹ ḅụchụaye-o anịkanịka nama oju apụra se mịẹye sọnị; mị ini se anị tọn koroma ọkụ-ẹ, anị ḅọrọ fịafịa-o anịkanịka fịafịaka sọnị.