3 Jọn 1 - Kịrịkẹnị Baịbụl

¹ Chọchị mị ḅie Sẹnịḅọ ḅe mịn ḍiri mị— Se ị̀ ḅụ yela Gaịọs ḅe sẹịnmamẹ, anị à kọkọma ḅẹlẹma ḅọ ḅe.

² Ị̀ ḅụ yela ikiaḅọ, à tẹkẹmẹ na yegoyegoye ị́rị́ na ḅịrị, ye tẹmẹ ḅụ ị́ nwọ kụrọ ọkụ mị—ị́ pịkị oju ḅụ sọ ọkọ kụrọ.

³ Àrị opuma ḅieḅẹlẹmẹ, kuḅie se ḅụgbana gbẹịnḅọ ị́ nwọ sọ kọkọmaye mị pịrịmẹ nwọ ḅẹye à nwọ naa sịkị—anị Kraịst Ḅe ḅie ḅụ mịnapụma ḍuko ị̀ pịrị ḅara ḅụ.

⁴ Ị̀ ḅieḅẹlẹma mịn mị nẹngịye ofori-ẹ, ḅo naa na ị̀ya awọma kọkọmaye mị ḅie omi-ẹ nwọ ḅẹye mị.

Ini Gaịọs Ḅe Tokonimẹ

⁵ Ị̀ ḅụ yela ikiaḅọ, kuḅie se ḅụgbana gbẹịn ḅara ị́ nwọse fịrịnwẹngị se ị́ juo Kraịst Ḅe ḅereniapụma pịrịmẹ ini igoni ḅo sịkị sọnị.

⁶ Ini ị́ya ḅẹlẹma mị ḅe ḅẹrẹ ḍuko mịanga sime chọchị mị pịrịsam. Pasisi, ḅarachụa ini pịrị, se ini ị́ fịrịnwẹngị pịrịarị Tamụnọ Ḅe ḅụḅẹlẹḅịa ḅara se nwẹngị kọn mamun.

⁷ Anịatịḅị ini Kraịst Ḅe fịrị gose nwẹngịarị sịkị, Kraịst Ḅe ḅerenika apụma ḅara ḅụ ini ḅarachụa ọkị ḍụkụkẹ.

⁸ Mịn mị gose, mine Kraịst Ḅe ḍukonwẹngịarị apụma wa mịẹka mịẹka ḅara ḅụ ḅarachụa ini pịrịḅịa, mịẹse kọkọmaye mị gose ini nwẹngịarị fịrị mị ḅụ, wa ḍiekiri nyanaḅịa ọkụ.

Dịotrẹfis Ḅe Na Dẹmẹtrọs Ḅe Na

⁹ À kpụlụma ḍiri gịẹịn chọchị mị sẹịnmamẹ; ọkụma Dịotrẹfis inia tịḅịnịḅọ sọ ḍọkịḅọ ḅe, à ḍukoye mị ọ̀ ḅụ lakẹ.

¹⁰ Anịgose, à ḅo sịkị, ò ye àrịye mamgba nwọse ọ́mịna tọrụkuḅu koromaḅịa: ọ̀ kọn iruoma na, pịkị mịna ḅụ ò ḍuko ḅalafamaye ma na. Ọkụma maye mamgba ọ̀ ḅụ yesọkẹ; Kraịst Ḅe ḅereni mịnapụma ḅo sọnị ori ini ọkị ḍọkịkẹ, anịsịkị ḅụkụrọma ini ọkị ḍọkịapụ ma sọnị, ori ini kikimẹ, ọ̀ pịkịna chọchị mị ḅie ini depakụma ḍọkịmẹ.

¹¹ Ị̀ ḅụ yela ikiaḅọ, si ye nwọ ḍama, ọkụma iḅiye mị nwọ ḍa. Iḅiye mịẹḅọ goyegoye sime Tamụnọ Ḅe pịrịmẹ; si ye mịẹḅọ goyegoye ma iniḅọ Tamụnọ Ḅe ọrịkẹ.

¹² Tomoniḅọ goyegoye Dẹmẹtrọs ḅe ḅụ iḅiye ḍukomẹ, kọkọmaye mị sọnị pịkị ọ̀ ḅụ iḅiye nwọ ḍukomẹ. Mine sọnị onyechịẹ se oria iḅiye mịẹ mị pịrịmẹ, ọ́ pịkị nemimẹ na wa ḍukoye mị kọkọmaye-ẹ.

Kuluma Kereniḅịpị

¹³ À tọn aye nwọ ḍuko ọ́ pịrịḅịa, ọkụma à ḅikẹ à ḍiri ḅie gịẹịn.

¹⁴ À tọnmẹ na ḅọlọka sịkị ḅụ àrị ómine na ịrịaḅịa, anịsịkị anị wa tọrụ se ịrịa se ọkwẹịnḅịaye-ẹ.

¹⁵ Dein ómine na sime. Mịanga sime ikiapụ ma kereniḅịpị se ọ́ sẹịnmamẹ. Mịna ikiapụ ma ḅie ọ́ ḅọḅọ kereni wa pịrị.