2 Samụẹl 9 - Kịrịkẹnị Baịbụl

Devid Ḅe Na Mẹfịboshẹt Ḅe Na

¹ Gbọrị ene ḅụ Devid ḅe gbelamẹ, “Sọl furo mị ḅie kọn gbọrịḅọ kpaịnma omi? Nemikase kọnḅọ omi-ẹ ḅẹḅẹ àrị iḅi se anịḅọ mị mịẹḅịa Jonatan ḅe gose.”

² Sọl ḅe furo mị ḅie gbọrị fịrịnwẹngịḅọ simemẹ ori ẹrẹ anị Ziba, se ini ọ̀ chịn se Devid ḅe damamunmẹ. Amanyanaḅọ ḅe nwọse ò gbelamẹ, “Ziba ḅe ị́rị́?” Ọ̀ nwọ pẹkẹrẹmẹ, “Ị̀rị̀ anị ị́ya fịrịnwẹngịḅọ-ẹ, ị̀ nyanaḅọ.”

³ Amanyanaḅọ ḅe nwọse ò gbelamẹ, “Sọl ḅe ò furo ḅie kọnḅọ ofori anị à tẹmẹ laḅara se ọkịḅịaḅọ, pịkị iḅi se mịẹḅịa ḅọ, à yeḅereni Tamụnọ Ḅe pịrịsa ḅaraḅụ à mịẹḅịa?” Ziba ḅe nwọ pẹkẹrẹmẹ, “Jonatan ḅe oria gbọrị owutọkụ pa kọn waraḅẹ. Ori ikelimẹ.”

⁴ Amanyanaḅọ ḅe nwọ gbelamẹ, “Ndeju ori omi?” “Meka Amịẹl yaḅe warị ḅie ori omi-ẹ Lodiba mị ḅie,” Ziba ḅe nwọ pẹkẹrẹmẹ.

⁵ Anị Amanyanaḅọ Devid ḅe ọ̀ fịrịma ọkịye-ẹ.

⁶ Mẹfịboshẹt, Jonatan yaḅe, oria opu ḍaḅọ anị Sọl ḅe-ẹ, ò ḅo lasịkị ori ọ̀ tịḅịtumẹ Devid ḅe tọrọkọ osi se ọ̀ pịrị ḅụ. Devid ḅe ọ̀ chịnmẹ, “Mẹfịboshẹt,” ori nwọse ọ̀ pẹkẹrẹmẹ, “Ị̀rị̀ anị ị́ya fịrịnwẹngịḅọ-ẹ, ị̀ nyanaḅọ.”

⁷ Devid ḅe nwọse ọ̀ ḅẹmẹ, “Ḅalafama.” “Àrị iḅi se ị́ mịẹḅịa ị́ ḍa Jonatan ḅe gose. Sime ị́ya opuḍaḅọ Sọl ḅe pịrị kiri la ọkụ goyegoye à se ị́ pịrịḅịa, ị́ pịkịna sịkịmamgba ị̀ya dẹbụl ọgọnọḅụ ị̀rị̀ na yefịḅịa.”

⁸ Mẹfịboshẹt ḅe pịkịna ọ̀ tịḅịtumẹ se nwọ ḅẹmẹ, “Ị̀rị̀ àrị iḅitẹịn fịsa obiri nẹngịkẹ, ị̀ nyanaḅọ! Nde ị́ gose nwọ sime iḅi se ị̀ mịẹḅịaye?”

⁹ Anịsịkị amanyanaḅọ ḅe Ziba, Sọl fịrịnwẹngịḅọ ḅe chịn se nwọse ọ̀ ḅẹmẹ, “Sime Sọl ị́ nyanaḅọ ḅe na ò furo na pịrịye goyegoye à seni Mẹfịboshẹt ḅe pịrịḅịa anị Sọl yaḅe tọkụ ḅe.

¹⁰ Ị́rị́ na, ị́ya owuapụ awọma na, pịkị ị́ya fịrịnwẹngịapụma na oria kirima ḅụ ozu ḍipiḅịa, se ó sokuḅoḅịa fịayema ọkịḅo ọ̀ pịrịḅịa mịẹse ị́ nyanaḅọ ḅe oria tọkụ ḅe fịye nyanaḅịa ọkụ. Ọkụma Mẹfịboshẹt ḅe ị̀ya dẹbụl ọgọnọ anị ò yefịfịḅịaye-ẹ sịkịmamgba.” (Ziba ḅe jie owuapụ awọ na pịkị si-a fịrịnwẹngịapụ na ọ̀ nwọ nyanamẹ.)

¹¹ Ziba ḅe nwọ pẹkẹrẹmẹ, “Ị́rị́ Amanyanaḅọ ḅe tọnye goyegoye à mịẹḅịa.” Anịẹrẹchị Mẹfịboshẹt ḅe amanyanaḅọ ḅe dẹbụl mị ọgọnọ anị ò yefịfịye-ẹ, anị amanyanaḅọ ḅe oria owuapụ awọma fịfị ọkụ mị.

¹² Mẹfịboshẹt ḅe ma boka gbọrị owutọkụ ọ̀ nwọ nyanamẹ, ori ẹrẹ anị Maịka. Bebe Ziba furo mị ḅie apụ mamgba ḅo fịrịnwẹngịapụ sọ Mẹfịboshẹt ḅe pịrịmẹ.

¹³ Anịẹrẹchị mama ḅụọ mamgba fị Mẹfịboshẹt ḅe Jerusalẹm mị ḅie ori angamẹ se amanyanaḅọ ḅe dẹbụl mị ọgọnọ ḅụ yefịfịmẹ sịkịmamgba.