2 Samụẹl 5 - Kịrịkẹnị Baịbụl

Devid Ḅe Ḅo Amanyanaḅọ Sọ Izrẹl Mị Na Juda Mị Na Pịrịmẹ

¹ Anịsịkị bebe Izrẹl sẹ mị mgba Devid ḅe damamunmẹ Hibrọn mị ḅie, se nwọse ọ̀ ḅẹmẹ, “Mine anị ị́ oju mịnị mị na pịkị pulo mị na-ẹ.

² Ḅọrọsa sịkị ḅụ, Sọl ḅe mịna amanyanaḅọ sọ sime sịkị mị ḅụ sọnị, ị́ kụlọ da Izrẹl mị pịrịmẹ ọmụ ḅieḅụ, se Nyanaḅọ Ḅe pịkị yeḅereni ị́ pịrịmẹ na ị́ tọrọkọ ịsụn oria tomonima pịrị pịkị inia amadaḅọ sọḅịa.”

³ Anịẹrẹchị bebe Izrẹl tịḅịnị mamgba Amanyanaḅọ Devid ḅe damaḅomẹ Hibrọn mị ḅie. Ori ini na osi nyana ọḅọkụ fị gbolomamẹ, ini pịkị pulo seni ọ̀ tịḅịsaramẹ, se ò ḅo Izrẹl amanyanaḅọ sọmẹ.

⁴ Devid ḅe kụra soi ọ̀ nwọ lamẹ ò ḅo amanyanaḅọ sọ sịkị, se kụra mesi ọ̀ nwọse amadamẹ.

⁵ Sọnọma kụra na pẹkẹrẹ ọ̀ nwọse Hibrọn mị ḅie sime ḅẹrẹtọn Juda mị pịrịmẹ, ọ̀ pịkị kụra soi tẹrẹ-a kụra fịnjị se Jerusalẹm mị ḅie sime ḅẹrẹtọn bebe Izrẹl mị na Juda mị mgba na pịrịmẹ.

⁶ Anịḅo gbọrị sịkị lamẹ Amanyanaḅọ Devid ḅe na oria owunima na mun owu se Jerusalẹm mị pakamẹ. Anịju ḅụ anga Jebus apụma nwọ chịnmẹ na Devid ḅe ori ineda opuama mị ḅie sọmun-ẹkẹ, anịẹrẹchị ini nwọse ọ̀ ḅẹmẹ, “Mịanga ị́ ineda sọḅo-ẹkẹ; tọrụmgbọlụ pụn apụma na ikeliapụma na kẹngẹ sọnị ineda ị́ dachịẹmaḅịa.”

⁷ (Ọkụma Devid ḅe inia Zaịyọn owuni-kụrọ-warị mị ọkịmẹ, se ini ḅo nwọse anị chịnmẹ “Devid Opuama.”)

⁸ Anị ene ḅụ Devid ḅe nwọse oria owunima ḅẹmẹ, “Mịanga à Jebus apụma ḍikiḅieḅu ọkụ se ini ḍikiḅieḅu ḅọ omi? Ḅakama ini ḅaaḅịaḅọ? Anịọkụma ye nụḅọ kiri ḅieju ini pu-mengi mị ḅọrọarị nyọ ḅụ sọmun se owu se igwein tọrụmgbọlụ pụn ikeliapụma paka.” (Anị ini gose nwọ ḅẹye-ẹ na, “Tọrụmgbọlụ pụn apụ na ikeliapụ na ineda Nyanaḅọ Ḅe warị ḅie sọẹkẹ.”)

⁹ Owuni-kụrọ-warị mị ini nwọ ọkị-ẹ so sịkị, Devid ḅe ori anịa ḅie angamẹ se nwọse anị chịnmẹ “Devid Opuama.” Ori opuama mị nama anị kelemamẹ, chịngị mị ḅụ ịrụapakapaka nyọ daọrụ ḅụ ini onwun sara pakụma kiri mị ḅụ, mị ò sakị anị namaye-ẹ.

¹⁰ Devid ḅe ọ̀ kụrọ gbasomẹ, anịatịḅị Kụrọmamgba Nyana Tamụnọ Ḅe ori na omi-ẹ.

¹¹ Taya Amanyanaḅọ Hiram ḅe oku se Devid ḅe fịrịmamẹ tuḅo gbolomaye ḅụ; ori awụ chịn na akanịapụ na pịkị ḍụparị se warị nama apụ na se ọ̀ pịrịmẹ amanyanaḅọ warị mị namaḅịa ẹrẹchị.

¹² Anịẹrẹchị Devid ḅe ọ̀ ḅụokoromẹ na Nyanaḅọ Ḅe ori ò seni Izrẹl amanyanaḅọ mịẹsam, ọ̀ pịkị oria amanyanakiri mị mịẹ se anị lọkọlọkọ ḅụ simeaḅẹ oria tomonima gose.

¹³ Hibrọn mị ḅie ḅụ ọ̀ saḅa Jerusalẹm mị mun ḅọrọ seso, Devid ḅe ò jịn ịgwa eremeni na ya eremeni na nwọ simemẹ, ọ̀ pịkị jịn owuapụ awọ na eremeni awọ na nwọ yimẹ.

¹⁴ Jerusalẹm mị ḅie ḅụ mịna awọma ini nwọ yi ọ̀ pịrịmẹ: Shamua ḅe na, Shobab ḅe na, Netan ḅe na, Sọlọmọn ḅe na,

¹⁵ Ibha ḅe na, Ẹlishua ḅe na, Nefẹg ḅe na, Jafaịya ḅe na,

¹⁶ Ẹlishama ḅe na, Ẹlaịada ḅe na, pịkị Ẹlifẹlẹt ḅe na.

Devid Ḅe Ò Filistia Apụ Ma Nẹngịmamẹ

¹⁷ Ini ḍuko Filistia apụma pịrịmẹ na Devid ḅe ini ò seni Izrẹl amanyanaḅọ mịẹsam, anị inia ọmụogbo mị paka mun ò kun-e-munye-ẹ. Devid ḅe anị naa sịkị ò koro mun ini nama koroma gbọrị owuniwarị ḅie simemẹ.

¹⁸ Filistia apụma ḅo Rifeim Pẹsịkiri mị la se anị ḍẹkịkelemamẹ.

¹⁹ Devid ḅe nwọse Nyanaḅọ Ḅe gbelamẹ, “Filistia apụma à mun owu se ini paka? Ị́ ọmụḅaraiḅi se ị̀ pịrịḅe?” Nyanaḅọ Ḅe pẹkẹrẹmẹ, “Iin, owu se ini paka!” “Àrị ọmụḅaraiḅi se ị́ pịrịḅịa!”

²⁰ Anị Devid ḅe so Beal Pẹrazim mị mun ye-ẹ se anịju ḅụ Filistia apụma nẹngịmamẹ. Ọ̀ nwọ ḅẹmẹ, “Nyanaḅọ Ḅe opu mengi ḅara se ị̀rị̀na-tarakapụ ma kan tolusọmunsam.” Anịẹrẹchị ini nwọse anị nyọ mị chịnmẹ Beal Pẹrazim.

²¹ Filistia apụma mangịso sịkị, inia oru ma ini se sarakoromamẹ, se Devid ḅe na oria owunima na àrị deki somẹ.

²² Anịeso Filistia apụma vinpịkịso Rifeim Pẹsịkiri mị ḅie mun se pịkịna anị ḍẹkịkelemamẹ.

²³ Devid ḅe jịn gbọrị sịkị se Nyanaḅọ Ḅe ḅịpị gbelamẹ, se ọ̀ nwọse ọ̀ pẹkẹrẹmẹ, “Mịanga ḅụ wẹrị owu se ini pakama, ọkụma kanaḅọrọ se ḅụkarakarama ísí pẹkẹrẹ ḅụ wẹrị owu se ini paka obi-gwọ-olo-pakụma-ejema (anị ini balsam se chịn ejema) na kpeki nyọ ḅụ.

²⁴ Ejema ọgọnọ ḅụ ị́ nwẹngị ḅụọ naamẹ ḅẹḅẹ, anị sịkị owu se ini paka, anịatịḅị àrị ị́ tọrọkọda nwẹngị mun Filistia ọmụogbo mị nẹngịmaḅịa.”

²⁵ Devid ḅe ọ̀ Nyanaḅọ Ḅe tọnye mị mịẹmẹ, se ori ineda Filistia apụma depịkịmẹ Giba mị ḅụ ọkịmun Gaza mị lamẹ.