2 Samụẹl 3 - Kịrịkẹnị Baịbụl

¹ Sọl ḅe furo mị ḅie apụma ḅụ sime apụma na pịkị Devid ḅe ḅụ sime apụma na sọ owu mị anị mun ḅọlọ sịkị lamẹ. Devid ḅe nwọ kụrọtẹịnma mun-arị sịkị, ori na ọmụ mị gbin àrị apụma ḅụ ịnyọ famamun-aḅẹ.

Devid Owuapụ Awọ Ma

² Mịna sonio owuapụ awọma jụmḅọ jụmḅọ ḍukoma ḍukoma pakaḅo ḅaraḅụ ini ini yi Devid ḅe pịrịmẹ Hibrọn mị ḅie ḅụ: Amnọn nyengima anị Ahinoam ma-ẹ, Jezriẹlḅọ ma;

³ Kiliab nyengima anị Abigẹl ma-ẹ, fịsa Nebal ḅe tarọ Kamẹlḅọ ma-ẹ; Absalọm nyengima anị Meaka ma-ẹ, Gẹshọ Amanyanaḅọ Talmaị ḅe ḅarọma;

⁴ Adonaịja nyengima anị Hagit ma-ẹ; Shẹfataịya nyengima anị Abaịtal ma-ẹ;

⁵ Itream nyengima anị Ẹgla ma-ẹ. Mịna owuapụ awọ mamgba Hibrọn mị ḅie ḅụ ini ini yimẹ.

Abna Ḅe Ò Devid Ḅe Ḅụ Sọmẹ

⁶ Devid owunima na, nyana ḅereni Sọl furo mị pịrị owunima na pa owu mị sọmamun àrị sịkị, Sọl ḅe pẹkẹrẹ ḅụ sime apụma ḅie ḅụ Abna ḅe ọ̀ pa kụrọtẹịn aḅẹ.

⁷ Gbọrị ene Ish-Boshẹt, Sọl yaḅe ḅẹrẹ se Abna ḅe tịḅị gbanamẹ na Sọl ḅe oria ịgwa eremeniḅọ Rizpa, Aịa ḅa ma ori árị na gbolomamẹ.

⁸ Mịn mị anị opuma Abna ḅe ḅụosọmẹ. “Ị́ chịnḅara à Sọl ḅe se ịba fịḅe? Ị́ chịnḅara à kọkọma fịrịnwẹngị Juda mị pịrị-ao?” ịganị pụkọ ḅụ ò ḅelema ḍukomẹ. “Tatarị sịkị ngịsị ị́ ḍa Sọl ḅe nyana ḅereni ọ̀ pịrị ḅụ à simemẹ, oria owuapụ mịnapụma na, oria ikiapụma na; à pịkị ḅerenikẹ Devid ḅe owu ḅụ ị́ nẹngịma; anịẹḅẹsọ, ị́ ị̀ ḅụ si ḍọkịaḅẹ eremeniḅọ gbolomaye ḅụ!

^9-10 Nyanaḅọ Ḅe yeḅereni Devid ḅe pịrịmẹ na Sọl ḅe na ò furo mị ḅie na ḅaraḅie amanyanakiri mị ori ọkịḅịa, se Devid ḅe seni amanyanaḅọ mịẹ se Izrẹl mị na Juda mị na pịrịḅịa, sẹ mị ḅie gbọrị pẹkẹrẹ ḅụ sakị mun kuluma mị la. Ye mịọkụ Nyanaḅọ Ḅe ị̀ fomuḅaa, à nemikase mịẹse mịn mị ḅo kọkọmaye sọkẹ ḅẹḅẹ!”

¹¹ Ish-Boshẹt ḅe ori Abna ḅe ḍikiḅalafa ḅara gose gbọrị ọkwẹịn kẹngẹ sọnị ori ineda kọnkẹ.

¹² Abna ḅe okumun-apụ se Devid ḅe fịrịmamẹ, anị sịkị Devid ḅe Hibrọn mị ḅie ori angamẹ, na ini nwọse ọ̀ ḅe-ẹ, “Tụḅọ mịn ama mị daḅe? Ị̀rị̀ na ḅịpịogbosọ nyana, se à ḅarachụa ị́ pịrị seni bebe Izrẹl mị mgba saḅaḅo ị́ya pẹkẹrẹ ḅụ sọḅịa.”

¹³ Devid ḅe nwọse ọ̀ pẹkẹrẹmẹ, “Iḅilamamẹ!” “Àrị ị́rị́ na ḅịpịogbosọḅịa ị́ nemikase gbọrịye mịẹḅịa ọkụma: Sọl ḅe ḅarọ Maịkal ma ị́ árị ọkịḅo ị̀ pịrịḅịa ị́ ḅo ị̀rị̀ na ịrịaḅịa sịkị.”

¹⁴ Devid ḅe sọnị pịkị okumun-apụ seni Ish-Boshẹt ḅe fịrịmamẹ na ini nwọse ọ̀ ḅẹ-ẹ, “Ị̀ ta Maịkal ma pịkịmaḅo ị̀ pịrị, Àrị árịna simeḅịa ẹrẹchị Filistia owuapụ oju ḅụ kịnị-a sọnọasi à nwọ gbẹịnmẹ.”

¹⁵ Anịẹrẹchị Ish-Boshẹt ḅe dewu Paltiẹl Leish yaḅe ḅara ori árị ọkịsomẹ.

¹⁶ Paltiẹl ḅe owuma á ḍukomun Bahurim ama mị lamẹ. Ọkụma Abna ḅe ọ̀ ḅẹmẹ na, “Vinpịkị so ị́ya ama mun,” nwọḅẹ sịkị, ò somẹ.

¹⁷ Abna ḅe so Izrẹl tịḅịnịma damamun se nwọse ini ḅẹmẹ, “Ḅọlọsa sịkị ngịsị ó ḅimẹ Devid ḅe ḅo ọ́mịna amanyanaḅọ nwọ sọ.

¹⁸ Mịọkụ ẹmbẹ paka ọ́ pịrịsam. Ó se ḅiekoroma na Nyanaḅọ Ḅe nwọ ḅẹmẹ, ‘Àrị ị̀ya fịrịnwẹngịḅọ Devid ḅe seni ị̀ya tomoni Izrẹlapụma ḍụaḅọrọmaḅịa Filistiapụma na pịkị ini na tarakapụ mamgba na ḅaraḅieḅụ.’”

¹⁹ Abna ḅe ori ọkwẹịn kọn Bẹnjamin sẹ mị pịrịmẹ, anịeso ọ̀ pịkị so Hibrọn mun mẹ se Bẹnjamin apụma na Izrẹlapụma na nyana ḅịpịogbosọ nwọ ḍuko Devid ḅe pịrịmẹ.

²⁰ Abna ḅe si owuapụ ọ̀ nwọ ọkị ọ̀ ḅụ chụa se Devid ḅe damamunmẹ Hibrọn ḅie se Devid ḅe alalị fịye se ini pịrịmẹ.

²¹ Abna ḅe nwọ ḍuko Devid ḅe pịrịmẹ, “Mịọkụ à so mun bebe Izrẹl mị mgba ọkị ḅo Ị́ya Amanyanakiri mị pịrịḅịa. Ini amanyanaḅọ ḅara seni ị́ ọkịḅịa, anịsịkị ị́ ḅiye mị, pịkị ị́ ḅara laḅịa se ị́ ḅẹrẹtọn bebe sẹ mị mgba pịrịḅịa.” Devid ḅe ò ḅereni Abna ḅe pịrịmẹ na gbọrịye sọnị ọ̀ la-ẹkẹ se ọ̀ pịkịmasomẹ.

Abna Ḅe Ini Ò Nini Ḅaamẹ

²² Ọḅụkọ Joab ḅe na Devid ḅe oria jịn-a fịrịtịḅịnị na vinpịkị ḅomẹ ini mun ọḅụ owupaka nyọ ḅụ, tọn-aye ini nwọse chụa ḅomẹ ọfọịn aye ḅaraḅụ. Anị sịkị mị ḅụ Abna ḅe ọ̀ ḅarị Hibrọn mị ḅieḅụ ofori-ẹ, anịatịḅị Devid ḅe ori ọ̀ fịrịma pakụmasam pịkị ḅereni ọ̀ pịrịmẹ na gbọrịye sọ ọ̀ la-ẹkẹ.

²³ Joab ḅe na oria owuapụma na ḅola sịkị, ini ḍuko ọ̀ pịrịmẹ na Abna ḅe ori amanyanaḅọ Devid ḅe damaḅomẹ, na gbọrịye sọ ọ̀ la-ẹkẹ Devid ḅe nwọ ḅereni ọ̀ pịrị se ọ̀ fịrịma pakụmasam.

²⁴ Anị Joab ḅe so amanyanaḅọ ḅe damamun se nwọse ọ̀ ḅẹye-ẹ, “Mị cheye ị́ nwọ mịẹ? Abna ḅe ị́ damaḅo ọkụma nde ị́ gose papa ọ̀ wẹrịso se ò soye?

²⁵ Ò ḅo epele se ị́ ti-eḅomẹ, pịkị ị́ mịẹarịye goyegoye nwọ ḍọkị pakụmaḅo, pịkị ị́ ḅọrọ àrị nyọ goyegoye nwọ nemiḅịa gose. Pikipikiye ofori-ẹ na anị mị ị́ nemimẹ!”

²⁶ Ò Devid ḅe koromaso se, Joab ḅe oria okumun-apụ ma fịrịmamẹ na ini mun Abna ḅe ọkịḅo, se Sera tiḅe mị nyọ ḅụ ini mun ori ọkịḅomẹ; Devid ḅe ngịsị nemika ḅaraḅụ.

²⁷ Abna ḅe ḅo Hibrọn mị ḅie lasịkị, Joab ḅe ori ọkị se onu ḅọkọ ḅụ sikimase, epele ḅaraḅụ ori na miniminima ọkwẹịn ọ̀ pịrị ḅịa ḅara mịẹse kingi se ọ̀ ḅụlọ ḅie temi chumẹ. Mịn ini Abna ḅe nini ḅaa ọkụ-ẹ, ò Joab numbireowu Asahẹl ḅe ḅaa ẹrẹchị.

²⁸ Devid ḅe ḅo ḅẹrẹ mị naa sịkị, ọ̀ nwọ ḅẹmẹ, “Nyanaḅọ Ḅe ò nemimẹ na ị̀ chukuḅie sime apụma na ị̀rị̀ na ngịsị mịna ḅara Abna ḅe oria fị mị ḅie ofori-ẹ.

²⁹ Ye anịa fomuḅara mị sime Joab ḅe na ò furo mị mgba na pịrị! Ò furo ḅie ọgị obi kọnḅọ, anịkanịka ḅalafama ojukiri obi kọnḅọ anịkanịka eremeniḅọ fịrị kẹngẹ ineda nwọ nwẹngịḅịa owuḅọ anịkanịka ọmụ ḅie ini ḅaaḅọ, anịkanịka fịḅịaye nyanakaḅọ sime mun ḅụọḅụọ nwọ la!”

³⁰ Mịn anị Joab ḅe na Abishaị ḅe na inia numbireowu Asahẹl ḅe tịḅị sowu mị ḅi ọkụ-ẹ Abna ḅe ḅụ, ori inia numbireowu ḅe ḅaaye ẹrẹchị Gibiọn ọmụ mị ḅieḅụ.

Ini Abna Ḅe Ḍipimẹ

³¹ Anịsịkị Devid ḅe kụrọ pịrịmẹ na Joab ḅe na oria owuapụma na ini inia ḅụchụayema kan, se okuru ḅiriaye chụa, se ḍụẹịn ḍin Abna ḅe pịrị. Ḍụẹịn ḍipi sịkị mị ḅụ Amanyanaḅọ Devid ḅe ḍụẹịn igbe mị ọḅụju ḅụ ọ̀ nwẹngị anị ḍukomunmẹ.

³² Hibrọn mị ḅie ini Abna ḅe ḍipimẹ, se amanyanaḅọ ḅe iḍupu mị aka sịkị ḅụ oloku owumẹ, se tomoni mamgba pịkị ọkọ mịẹmẹ.

³³ Devid ḅe mị kururu nime mị chumẹ Abna ḅe gose: “Cheye gose Abna ḅe oḅoriḅọ fị ọkụ fịḅe?

³⁴ Ini ọ̀ ḅarama fịnakẹ, Ini pịkị ọ̀ ḅụọma sọnị fịnakẹ; Siyemịẹapụ ḅaaḅọ fị ọkụ anị ọ̀ fị ọkụ-ẹ!” Se tomonima sọ pịkịna ò gose owumẹ.

³⁵ Bebe ene mị mgba tomonima mịẹse Devid ḅe yefịḅịa ọkụ nwọ ḍọkịmẹ, ọkụma yeḅereni kụrọma ḅụ ọ̀ nwọ ḅẹmẹ, “Ye Tamụnọ Ḅe ị̀ fomuḅaa à nemikase ene mị ma ḅọrọka simeogbo yefịmẹ ḅẹḅẹ!”

³⁶ Tomonima mịn ye mị ḅụ ini elekima chụamẹ anị pịkị inia ḅụḅẹlẹmẹ. Kọkọmaye ḅụ, amanyanaḅọ ḅe mịẹye goyegoye inia ḅụḅẹlẹmẹ.

³⁷ Anị bebe Devid ḅe oria tomonima na pịkị Izrẹl mị ḅie sime apụ mamgba na ḅụokoromẹ na amanyanaḅọ ḅe ini Abna ḅe ḅaaye mị ọ̀ ḅụḅẹlẹkẹ ngịsị.

³⁸ Amanyanaḅọ ḅe nwọse oria tịḅịnị fịrịnwẹngịapụma ḅẹmẹ, “Ó nemika na mịmgba Izrẹl mị ḅieḅụ opu tomoniḅọ fịsam?

³⁹ Ị̀rị̀ anị Tamụnọ Ḅe ḅarana pulo se tịḅịḅụ sara amanyanaḅọ ḅe-ẹ, ịnyọ ị̀ ḅụ fasam mịmgba. Mịna Zẹruaya owuapụ awọma inia owoi mị opuma saḅaḅọrọmẹ ị̀ ḅụ. Ye Nyanaḅọ Ḅe mịna siyemịẹapụ ma mịẹ siye mị ḅe fomuḅara seni ini pịrị!”